.jpg)
កីឡាកររបស់កម្ពុជា រិន សារ័ត្ន (ស្តាំ) នឹងត្រូវប្រកួត MMA ជាមួយអ្នកប្រដាល់របស់ម្ចាស់ផ្ទះឥណ្ឌូនេស៊ី នៅយប់ថ្ងៃសៅរ៍។ រូបថត ឈន ណន
ឥណ្ឌូនេស៊ី៖ កីឡាករកម្ពុជា រិន សារ័ត្ន បានបង្ហាញពីភាពជឿជាក់ ក្នុងការប្រើក្បច់ក្លេ យកឈ្នះលើអ្នកប្រយុទ្ធរបស់ ឥណ្ឌូនេស៊ី Sunoto Peringkat ដើម្បីបង្ហាញឲ្យពិភពលោកបានឃើញពីភាពខ្លាំងរបស់ក្បាច់គុនខ្មែរ ក្នុងការប្រកួតយុទ្ធគុនចម្រុ (MMA) នៃព្រឹត្តិការណ៍ ONE: Kings Of Courage ដែលនឹងត្រូវធ្វើ នៅប្រទេស ឥណ្ឌូនេស៊ី នាយប់ថ្ងៃសៅរ៍ ស្អែកនេះ ប៉ុន្តែ Sunoto ក៏បានធ្វើឲ្យប្រជាជនឥណ្ឌូនេស៊ី មានការភ្ញាក់ផ្អើល ជាមួយការប្តេជ្ញាចិត្តយ៉ាងមុតមាំរបស់គេផងដែរ។
ការសម្រេចដាក់ឲ្យកីឡាការិនី Tiffany Teo មកពីសិង្ហបុរី ប្រកួតដណ្តើមយកខ្សែក្រវាត់ពិភពលោក ផ្នែកនារី ក្នុងទម្ងន់ចន្លោះពី ៥២,៣ ទៅ ៥៦,៧ គីឡូក្រាម ជាមួយកីឡាការីនីជើងខ្លាំងរបស់ចិន Jing Nan Xiong វាបានធ្វើឲ្យការប្រកួត ONE: King Of Courage ក្លាយជាព្រឹត្តិការណ៍គួរឲ្យចាប់អារម្មណ៍ថ្មីមួយទៀត ដោយផ្តោតសំខាន់ទៅលើការលើកកម្ពស់នារី ក្នុងការប្រកួត MMA នេះ ហើយលោក Chatri Sityodtong ជា CEO របស់ ONE Championship បានបញ្ជាក់ថា ដើម្បីធ្វើឲ្យ ONE Championship ឆ្ពោះទៅរកភាពល្បីល្បាញ នៅទូទាំងពិភពលោក។
ចំណែក ការជួបគ្នារវាងកីឡាករកម្ពុជា រិន សារ័ត្ន និងកីឡាករម្ចាស់ផ្ទះ Sunoto បានក្លាយជាការប្រកួតដ៏គួរឲ្យចាប់អារម្មណ៍មួយ ចំពោះប្រជាជនឥណ្ឌូនេស៊ី ក្នុងចំណោមគូប្រកួតទាំង ១០ ដែលត្រូវបានដាក់ឲ្យប្រកួតក្នុងព្រឹត្តិការណ៍ ONE: King Of Courage នៅទីក្រុង Jakarta នេះ ព្រោះអ្នកទាំង ២ នេះ សុទ្ធតែបានអះអាងពីការប្តេជ្ញាចិត្ត ដើម្បីលើកមុខមាត់ក្បាច់គុនឲ្យប្រទេសរបស់ពួកគេរៀងៗខ្លួន។
កីឡាករ Sunoto ដែលធ្លាប់បានផ្តួលអ្នកប្រដាល់ចាស់វស្សារបស់ កម្ពុជា ចាន់ ហេង ឲ្យសន្លប់ក្នុងទឹកទី ១ ក្នុងការប្រកួត ONE Championship នៅក្រុង Jakarta ប្រទេស ឥណ្ឌូនេស៊ីនេះ កាលពីខែ មករា ឆ្នាំ ២០១៧ បាននិយាយថា៖ «ខ្ញុំនឹងប្រើបច្ចេកទេស ដែលខ្ញុំមាន ដើម្បីបង្ហាញដល់អ្នកទាំងអស់គ្នា ក្នុងព្រឹត្តិការណ៍នេះ ហើយខ្ញុំនឹងព្យាយាមយកឈ្នះ រិន សារ័ត្ន ដើម្បីមុខមាត់របស់ប្រជាជននៅឥណ្ឌូនេស៊ី»។
.jpg)
កីឡាការិនីរបស់សិង្ហបុរី (ឆ្វេង) Tiffany Teo ត្រូវប្រកួតដណ្តើមខ្សែក្រវាត់ជាមួយនារីជើងខ្លាងមកពីចិន Jin Nan Xiong។ រូបថត ឈន ណន
ការប្តេជ្ញាចិត្តរបស់ Sunoto បានធ្វើឲ្យប្រព័ន្ធផ្សព្វផ្សាយ និងមន្រ្តីកីឡារបស់ ឥណ្ឌូនេស៊ី ដែលបានចូលរួម ក្នុងសន្និសីទកាសែតស្តីពីការប្រកួត ONE: King Of Courange នៅទីក្រុង Jakarta កាលពីល្ងាចថ្ងៃ ព្រហស្បតិ៍ ម្សិលមិញ មានការចាប់អារម្មណ៍ខ្លាំង និងរំពឹងថា Sunoto នឹងអាចផ្តួល រិន សារ័ត្ន បានដូចការប្តេជ្ញាចិត្តរបស់គេ។
យ៉ាងណាក៏ដោយ ចំពោះ រិន សារ័ត្ន ក៏បានបញ្ជាក់ពីការប្តេជ្ញាចិត្តរបស់ខ្លួន ដើម្បីឆ្លើយតបទៅនឹងការប្តេជ្ញាចិត្តរបស់ Sunoto ផងដែរ។
រិន សារ័ត្ន បានប្រាប់ ភ្នំពេញ ប៉ុស្តិ៍ ក្រោយសន្និសីទ កាសែតថា៖ «គេប្តេជ្ញាចិត្តយកឈ្នះខ្ញុំ ដើម្បីប្រជាជនរបស់គេ ចំណែកខ្ញុំក៏នឹងប្រឹងប្រែង ផ្តួលរូបគេ ដើម្បីប្រជាជនកម្ពុជា និងផ្សព្វផ្សាយក្បាច់គុនខ្មែរ ឲ្យពិភពលោកបានឃើញផងដែរ»។
ជាមួយការប្តេជ្ញាចិត្តនេះ រិន សារ័ត្ន បានបន្ថែមថា៖ «កីឡាកររបស់ឥណ្ឌូនេស៊ី ម្នាក់នេះ គេល្អចាប់ និងពូកែក្លេជើងក្រោម ប៉ុន្តែខ្ញុំក៏បានហ្វឹកហាត់ ដើម្បីទប់ទល់ក្បាច់សម្លាប់របស់គេដែរ ហើយខ្ញុំនឹងប្រើក្បាច់ក្លេសងទៅលើគេវិញ»។
ទាក់ទងទៅនឹងគម្រោងប្រើក្បាច់ក្លេ ចង់ផ្តួល Sunoto នេះ រិន សារ័ត្ន បានបញ្ជាក់ថា៖ «ច្បាស់ណាស់ គេនឹងចូលចាប់ក្រោម ដើម្បីផ្តួលខ្ញុំ រួចវ៉ៃប្រហារមកលើខ្ញុំ ប៉ុន្តែគាត់ប្រហែលជាមិនបានចាប់អារម្មណ៍ជាមួយក្បាច់ក្លេរបស់ខ្ញុំ នោះទេ ហេតុនេះខ្ញុំនឹងប្រើក្បាច់ក្លេសងទៅលើគាត់វិញ ដើម្បីយកឈ្នះកីឡាករម្ចាស់ផ្ទះឥណ្ឌូនេស៊ី ម្នាក់នេះ គឺខ្ញុំនឹងព្យាយាមឲ្យអស់ពីសមត្ថភាព ហើយខ្ញុំមានសង្ឃឹម ៧០ ភាគរយថា ខ្ញុំនឹងធ្វើបាន ដើម្បីយកឈ្នះលើគាត់»៕
