Search form

Login - Register | FOLLOW US ON

Logo of Phnom Penh Post newspaper Phnom Penh Post - រុស្ស៊ី ជាប់​បម្រាម​ក្នុង​អូឡាំពិក​រដូវ​រងា​លើ​សារធាតុ​ហាម​ឃាត់

Content image - Phnom Penh Post
លោក Putin (កណ្តាល) ថត​ជាមួយ​អត្ត​ពលិក​រុស្ស៊ី កន្លងមក។ AFP

រុស្ស៊ី ជាប់​បម្រាម​ក្នុង​អូឡាំពិក​រដូវ​រងា​លើ​សារធាតុ​ហាម​ឃាត់

ក្រុងលួសាន: រុស្ស៊ី ត្រូវ​បាន​ដាក់​បម្រាម​កាល​ពី​ថ្ងៃ​អង្គារ មិន​ឲ្យ​ចូលរួម​ក្នុង​ព្រឹត្តិការណ៍​អូឡាំពិក​រដូវរងា​ឆ្នាំ ២០១៨ ដោយ​គណៈ​កម្មាធិការ​អូឡាំពិក​អន្តរជាតិ (IOC) ជុំវិញ​កម្មវិធី​ប្រើប្រាស់​សារធាតុ​ហាម​ឃាត់​គាំទ្រ​ដោយ​រដ្ឋ​របស់​ពួកគេ ប៉ុន្តែ អត្តពលិក​រុស្ស៊ី​ដែល​ស្អាត​ស្អំ នឹង​ត្រូវ​អនុញ្ញាត​ឲ្យ​ចូលរួម​ប្រកួត​ក្រោម​ទង់ជាតិ​របស់​អូឡាំពិក។

ការដាក់​ទណ្ឌកម្ម​នេះ ត្រូវ​បាន​ចាត់​ទុក​ថា ជា​ទណ្ឌកម្ម​ដ៏​តឹងរ៉ឹង​បំផុត​មិន​ធ្លាប់​មាន​ពី​មុន​មក ដោយ IOC សម្រាប់​ករណី​បន្លំ​ការ​ប្រើប្រាស់​សារធាតុ​ហាម​ឃាត់ និង​បាន​កើត​ឡើង​ក្នុង​រយៈពេល​ត្រឹម​តែ ៦៥ ថ្ងៃ នៅ​មុន​ពេល​ឈាន​ទៅ​ព្រឹត្តិការណ៍​អូឡាំពិក​រដូវ​រងា​ក្នុង​ទីក្រុង Pyeongchang កូរ៉េខាងត្បូង។

ក្នុងការ​ប្រកាស​ពីការ​សម្រេច​ចិត្ត​នេះ លោក Thomas Bach ប្រធាន IOC បាន​ចោទ​ប្រកាន់​រុស្ស៊ី ពីបទ​ប្រព្រឹត្ត​ការ​វាយ​ប្រហារ​ដែល​មិន​ធ្លាប់​មាន​ពី​មុន​មក​ទៅ​លើ​បូរណភាព​នៃ​អូឡាំពិក និង​កីឡា។

ការចេញផ្សាយ​ព័ត៌មាន​មួយ​ពី​ភ្នាក់ងារ​ប្រឆាំង​នឹង​សារធាតុ​ហាម​ឃាត់​ពិភពលោក​ហៅ​កាត់​ថា WADA និង​ការ​ស៊ើប​អង្កេត​ពីរ​លើក​បន្ត​បន្ទាប់​គ្នា​ទៀត​របស់ IOC បាន​បញ្ជាក់​ថា អត្តពលិក​រុស្ស៊ី បាន​ចូលរួម​ក្នុង​កម្មវិធី​បន្លំ​ការ​ប្រើប្រាស់​សារធាតុ​ហាម​ឃាត់​យ៉ាង​ប្រុង​ប្រយ័ត្ន ដែល​បាន​ឈាន​ដល់​ចំណុច​កំពូល អំឡុង​ព្រឹត្តិការណ៍​អូឡាំពិក​រដូវ​រងា​ក្នុង​ទីក្រុង Sochi កាល​ពី​ឆ្នាំ ២០១៤។

ភ័ស្តុតាង​ជាច្រើន​បាន​បង្ហាញ​ថា ករណី​នៃ​ការ​បន្លំ​នេះ បាន​ជាប់​ទាក់​ទង​នឹង​មន្ត្រី​ជាន់​ខ្ពស់​របស់​រដ្ឋាភិបាល ក្នុង​នោះ​រាប់​បញ្ចូល​ទាំង​រដ្ឋមន្ត្រី​កីឡា​របស់​រុស្ស៊ី​ផងដែរ ក្រោម​ជំនួយ​ពី​ភ្នាក់​ងារ​សម្ងាត់​របស់រ​ដ្ឋ។

IOC ក៏បាន​ដាក់​ពិន័យ​ព្យួរ​ឧបនាយក​រដ្ឋមន្ត្រី​រុស្ស៊ី លោក Vitaly Mutko ដែល​មាន​តួនាទី​ជា​រដ្ឋមន្ត្រី​កីឡា​អំឡុង​ព្រឹត្តិការណ៍​កីឡា​អូឡាំពិក​ក្នុង​ទីក្រុង Sochi អស់​មួយ​ជីវិត​ផងដែរ។

លោក Mutko បច្ចុប្បន្ន​គឺជា​ប្រធាន​គណៈកម្មការរ​រៀបចំ​សម្រាប់​ព្រឹត្តិការណ៍ World Cup ឆ្នាំ ២០១៨ ដែល​រុស្ស៊ី ធ្វើ​ជា​ម្ចាស់​ផ្ទះ។ ការ​ចាប់​អារម្មណ៍​ផ្សេងៗ នឹង​ផ្តោត​ទៅ​លើ​ថា តើ​អង្គភាព​គ្រប់គ្រង​កីឡា​បាល់ទាត់​ពិភពលោក FIFA អនុញ្ញាត​ឲ្យ​មន្ត្រី​ពោរ​ពេញ​ដោយ​រឿង​អាស្រូវ​ដែល​ជា​សម្ព័ន្ធមិត្ត​របស់​លោក​ប្រធានាធិបតី Vladimir Putin រូប​នេះ រក្សា​តួនាទី​របស់​លោក​ក្នុង World Cup ឬ​យ៉ាង​ណា?

ក្នុង​សេចក្តី​ប្រកាស​មួយ FIFA បាន​បញ្ជាក់​ថា ខ្លួន​បាន​ធ្វើការ​កត់​សម្គាល់​ទៅ​លើ​ការ​ចេញ​សេចក្តី​សម្រេច​របស់ IOC ប៉ុន្តែ វា​មិន​ប៉ះពាល់​ដល់​ការ​ត្រៀម​លក្ខណៈ​សម្រាប់​ព្រឹត្តិការណ៍​នៅ​រុស្ស៊ី ឆ្នាំ ២០១៨ ឡើយ។

IOC ក៏បាន​ដាក់​ពិន័យ​ព្យួរ​ទៅ​លើ​គណៈកម្មាធិការ​អូឡាំពិក​របស់​រុស្ស៊ី និង​ប្រធាន​របស់​អង្គភាព​នេះ​គឺ​លោក Alexander Zhukov ដែរ៕

0

Comments

Please, login or register to post a comment

ព័ត៌មានពាក់ព័ន្ធ