.jpg)
កីឡាកររឿង សោភ័ណ្ឌ នឹងត្រូវចេញទៅថៃ និងបារាំង។ យឺន ពន្លក
ភ្នំពេញ: រឿង សោភ័ណ្ឌ ដែលមានឈ្មោះក្នុងបញ្ជីជាតិថា ទិត្យ សោភ័ណ្ឌ បានចុះហត្ថលេខាលើកុងត្រាមួយដើម្បីចេញទៅប្រកួតនៅក្នុងកម្មវិធីប្រដាល់ថៃហ្វៃ នៅទីក្រុងបាងកកមួយលើក និងចេញទៅប្រកួតថ្នាក់អាស៊ី-អីរ៉ុប នៅប្រទេសបារាំងចំនួន ៣ លើក ក្នុងរយៈពេល ៣ ខែ។
នេះតាមការឲ្យដឹងពីអ្នកគ្រប់គ្រងរបស់សមាគមប្រដាល់ក្រសួងមហាផ្ទៃដែលជាក្លិបរបស់រឿង សោភ័ណ្ឌ។ ការចុះកុងត្រាប្រកួតនេះបានកើតឡើង ក្រោយពីអ្នកលេងកណ្តាប់ដៃ សោភ័ណ្ឌ បានឈ្នះខ្សែក្រវាត់គោជល់ លើកទី ៨ នៃសង្វៀន CNC កាលពីខែមករា ឆ្នាំ ២០១៨ កន្លងមក ដែលជាខ្សែក្រវាត់ទី ៦ ក្នុងអាជីពប្រដាល់រយៈពេលត្រឹមជាង ១០ ឆ្នាំរបស់គេ។
រឿង សោភ័ណ្ឌ បានឈ្នះខ្សែក្រវាត់ចុងក្រោយរបស់គេ កាលពីខែមករា ឆ្នាំ ២០១៨ ព្រឹត្តិការណ៍ភេសជ្ជៈគោជល់ ទម្ងន់ ៦៩ គីឡូក្រាម នៅសង្វៀន CNC ដែលអមដោយទឹកប្រាក់ចំនួន ៥០០០ ដុល្លារអាមេរិក ផងដែរ។
រឿង សោភ័ណ្ឌ បានផ្តល់សម្ភាសឲ្យភ្នំពេញ ប៉ុស្តិ៍ កាលពីម្សិលមិញថា៖ «ខ្ញុំបានជាប់កិច្ចសន្យាក្នុងការប្រកួតលក្ខណៈអន្តរជាតិចំនួន ៣ ប្រទេសគឺប្រកួតនៅសង្វៀនក្នុងប្រទេសយើង នៅប្រទេសថៃ និងនៅប្រទេសបារាំង»។
កីឡាកររូបនេះបានប្រាប់បន្តថា៖ «ក្នុងរយៈពេល ៤ ខែនេះ ខ្ញុំបានជាប់កិច្ចសន្យាប្រកួតចំនួន ៧ លើក ក្នុងនោះ ៣ ប្រកួតនៅក្នុងស្រុកខ្មែ នៅថ្ងៃទី ១៨ ខែកុម្ភៈ នៅសង្វៀន CNC។ ថ្ងៃទី ២៥ ខែកុម្ភៈ នៅសង្វៀនអាស៊ីអាគ្នេយ៍ និងថ្ងៃទី ៣ ខែមីនា នៅសង្វៀន CNC ម្តងទៀត»។
សោភ័ណ្ឌ បានបញ្ជាក់ថា៖ «បន្ទាប់ពីនេះ នៅថ្ងៃទី ២៤ ខែមីនា ឆ្នាំ ២០១៨ ខ្ញុំនឹងប្រកួតក្នុងកម្មវិធីថៃហ្វៃ នៅទីក្រុងបាងកក ហើយនៅថ្ងៃទី ៤ ខែមេសា ឆ្នាំ ២០១៨ ខ្ញុំប្រកួតនៅប្រទេសបារាំង ៣ ប្រកួត ក្នុងរយៈពេល ៣ ខែ ទើបត្រឡប់មកមាតុប្រទេសវិញ»។
រឿង សោភ័ណ្ឌ បានបន្ថែមថា៖ «ការប្រកួតនៅប្រទេសបារាំងចំនួន ៣ ប្រកួតនោះសុទ្ធតែដណ្តើមខ្សែក្រវាត់ជាមួយពួកអាស៊ី និងអីរ៉ុប ហើយខ្ញុំរំពឹងថា យ៉ាងហោចណាស់ក៏អាចឈ្នះខ្សែក្រវាត់ ១ មកមាតុភូមិដែរ»។
លោកមៀម ស៊ីសារ៉ា ប្រធានសហព័ន្ធកីឡាប្រដាល់គុនខ្មែរនៅប្រទេសបារាំង និងជាប្រធានសហព័ន្ធគុនខ្មែរអន្តរជាតិ បានឲ្យដឹងថា៖ «តាមគម្រោង ខ្ញុំនឹងដឹកនាំកីឡាកររឿង សោភ័ណ្ឌ ទៅប្រកួតនៅប្រទេសបារាំងដោយចេញដំណើរនៅដើមខែមេសា ឆ្នាំ ២០១៨»។
លោកបានបន្តថា៖ «ព្រឹត្តិការណ៍នេះធ្លាប់ប្រកួតជារៀងរាល់ឆ្នាំ ដែលមានប្រទេសមកពីអាស៊ី និងប្រទេសក្នុងអឺរ៉ុប ហើយរឿង សោភ័ណ្ឌ គ្រោងនឹងហ្វឹកហាត់ និងប្រកួតនៅប្រទេសបារាំងចំនួន ៣ ប្រកួតក្នុងរយៈពេល ៣ ខែទើបត្រឡប់មកវិញ»។
លោកបន្តថា ក្រៅពីរឿង សោភ័ណ្ឌ នឹងមានកីឡាករម៉ន សាម៉េត មកពីក្លិបកងចក្ររាជសីហ៍នៃក្រសួងមហាផ្ទៃម្នាក់ទៀត ត្រូវធ្វើការប្រកួតក្នុងទម្ងន់ ៥៧ គីឡូក្រាម ប៉ុន្តែគិតមកត្រឹមពេលនេះ មិនទាន់ច្បាស់ដោយសារខាងអ្នករៀបចំនៅប្រទេសបារាំងពុំទាន់មានទម្ងន់ស្រាលនេះនៅឡើយ។ លោកតែម ម៉ឺន ប្រធានសហព័ន្ធកីឡាគុនខ្មែរ បានប្រាប់ថា៖ «សហព័ន្ធគុនខ្មែរនឹងសម្រួលរៀបចំឯកសារចេញទៅប្រកួតជូនតាមការស្នើសុំរបស់ភាគីសហព័ន្ធគុនខ្មែរនៅប្រទេសបារាំង»។
លោកបានបន្ថែមថា៖ «យើងនឹងបំពេញបែបបទតាមទម្រង់ច្បាប់ដោយសុំការអនុញ្ញាតពីក្រសួងអប់រំ យុវជន និងកីឡា និងជូនដំណឹងទៅគណៈកម្មាធិការជាតិអូឡាំពិកកម្ពុជា ក្នុងនោះទាំងសាមីខ្លួនកីឡាករ ទាំងក្លិប ត្រូវយល់ព្រម»៕
