ភ្នំពេញៈ ព្រឹត្តិការណ៍បុណ្យទន្លេ ដែលគ្រោងកីឡាចំនួន ៩ ប្រភេទ ឲ្យប្រកួតគ្នានោះ បានបន្ថែមឲ្យមានការប្រកួតប្រដាល់មិត្តភាពអន្តរជាតិរវាងកម្ពុជា និងថៃ ទៅលើប្រភេទកីឡាគុនខ្មែរ ហើយគូអន្តរជាតិនោះ គឺតម្រូវទៅលើជើងខ្លាំងរបស់កម្ពុជា រឿង សោភ័ណ្ឌ និងអ្នកប្រយុទ្ធរបស់ថៃ ឃុនផែន ដោយមានការផ្សាយផ្ទាល់តាមទូរទស្សន៍អាស៊ីអាគ្នេយ៍។
ការវិលមកជួបគ្នា ក្នុងទម្ងន់ ៧០ គ.ក្រ រវាង រឿង សោភ័ណ្ឌ និង ឃុនផែន ក្នុងបុណ្យទន្លេ នៅក្រុងតាខ្មែរ ខេត្តកណ្តាល នាថ្ងៃទីថ្ងៃទី ៩ ដល់ទី ១១ ខែមីនា ខាងមុខនេះ វាបានផ្តល់ឱកាសឲ្យ ឃុនផែន សងសឹក រឿង សោភ័ណ្ឌ ព្រោះការជួបគ្នា ៤ លើកកន្លងមកនេះ សោភ័ណ្ឌ បានឈ្នះ ២ ចាញ់ ១ និងស្មើ ១ ដង ហើយចុងក្រោយ សោភ័ណ្ឌ បានម៉ាត់ឲ្យ ឃុនផែន សន្លប់ធំនៅសង្វៀន CNC។
លោក វ៉ាត់ ចំរើន អគ្គលេខាធិការ NOCC និងជាប្រធានអនុគណៈកម្មការកីឡាប្រចាំបុណ្យទន្លេ បានប្រាប់ភ្នំពេញ ប៉ុស្តិ៍ ថា ការប្រកួតកីឡាប្រដាល់គុនខ្មែរ នៅបុណ្យទន្លេ យើងរៀបចំឲ្យមានការប្រកួតចំនួន ២ ថ្ងៃ គឺថ្ងៃសុក្រ និងថ្ងៃអាទិត្យ ទី ៩ និងទី ១១ ខែមីនា ឆ្នាំ ២០១៨ ដែលមានទីតាំងនៅជាប់មាត់ទន្លេក្បែរអ្នកតាចិន ខាងកើតស្ពានដែកតាខ្មៅ ដោយក្នុងនោះ ល្ងាចសុក្រ យើងមានប្រកួតចំនួន ៧ គូ និងថ្ងៃអាទិត្យ ដែលមានគូអន្តរជាតិនោះ មាន ៧ គូទៀតដូចគ្នា។
លោកបន្តថា៖ «យើង មានគូប្រដាល់ពិសេសឆ្នើមប្រចាំនៅកម្ពុជា គឺរឿង សោភ័ណ្ឌ ត្រូវប្រកួតជាមួយថៃ ឃុនផែន ក្រៅពីនោះមានគូប្រដាល់សកលអាជីពជម្រើសជាតិ និងគូប្រកួតថ្នាក់ជាតិជាច្រើន ដើម្បីឲ្យមហាជន បានទស្សនាដោយសេរី»។
ជុំវិញការបន្ថែមឲ្យមានការប្រកួតអន្តរជាតិ ១ គូនេះ លោក ចំរើន បញ្ជាក់ថា៖ «ពីដំបូងយើងត្រៀមរៀបចំប្រកួតតែកម្រិតថ្នាក់ជាតិទេ គឺធ្វើទៅតាមលទ្ធភាព និងថវិកាប៉ុន្តែកីឡាករលំដាប់ជម្រើសជាតិមួយចំនួនរបស់យើងជាប់ប្រកួតតាមប៉ុស្តិ៍ អ៊ីចឹងយើងត្រូវតែបង្ខំចិត្ត បន្ថែមគូអន្តរជាតិ តាមសំណូមពររបស់បងប្អូនមហាជន និងដើម្បីញ៉ាំងកម្មវិធីឲ្យបានល្អ ដោយមានការផ្សាយផ្ទាល់ផង»។
ទាក់ទងនឹងការប្រកួតនេះ កីឡាករ រឿង សោភ័ណ្ឌ បាននិយាយថា៖ «ខ្ញុំមានកិត្តិយសដែលត្រូវបានគណៈកម្មការជ្រើសរើសឲ្យទៅប្រកួត នៅបុណ្យទន្លេ នៅឆ្នាំនេះ ទោះបីតម្លៃខ្លួនប្រកួត បានតិចជាងការប្រកួតតាមសង្វៀនប៉ុស្តិ៍ឯកជន ក៏ដោយ ហើយដៃគូ ដែលខ្ញុំត្រូវជួបលើកនេះ ខ្ញុំធ្លាប់ស្គាល់ និងធ្លាប់ប្រកួតគ្នា ៤ លើកហើយ ដោយខ្ញុំឈ្នះ ២ ចាញ់ ១ និងស្មើ ១ ដង»។
ម្ចាស់ខ្សែក្រវាត់ ៦ ស្ថាប័នរូបនេះ បានបន្ថែមថា៖ «កីឡាករថៃ ឃុនផែន រូបនេះល្អជង្គង់ និងកម្លាំងខ្លាំង ហើយជាកីឡាករលំដាប់ល្អមួយរូប លំបាកប្រកួតណាស់ ប៉ុន្តែគេនឹងលំបាកទប់ទល់ជាមួយកណ្តាប់ដៃរបស់ខ្ញុំមិនខាន»។
ទោះជាយ៉ាងណា សោភ័ណ្ឌ មិនហ៊ានអះអាងពីលទ្ធផលឈ្នះនោះឡើយ ដោយរូបគេបញ្ជាក់ថា៖ «ការឈ្នះឬចាញ់ អាស្រ័យពេលប្រកួតជាក់ស្តែង ដែលយើងអាចមើលឃើញចន្លោះដៃគូថា មានចំណុចខ្សោយកន្លែងណា ឬខ្លាំងកន្លែងណា ទើបយើងត្រូវផ្តាច់យកជ័យជម្នះ តាមរបៀបណា»។
ក្រៅពី រឿង សោភ័ណ្ឌ និងថៃ មានកីឡាករល្អៗជាច្រើនទៀត ត្រូវប្រកួតគ្នា ក្នុងបុណ្យទន្លេ ឆ្នាំនេះដែរ ដូចជា ប្រាក់ ឌីណា ត្រូវប៉ះ សរ សួ ខណៈ លី តឿន ជួប គឿម សុវណ្ណនឿត។ រីឯ ខេម ចាន់ ត្រូវតទល់នឹង សង គង់ ហើយ ម៉ន សាម៉េត ប៉ះ មាស សារៈ, សោម វិច្ឆ័យ ប្រកួតជាមួយ រិទ្ធ មុន្នី,ហ៊ឹម សារ៉ាន់ ប៉ះ ធា នុរាជ និង ឡូញ វណ្ណឌី ត្រូវជួប សំ ភក្តី ជាដើម។
លោក ខ្វៃ អាទិត្យា អគ្គនាយកទូរទស្សន៍អប្សរា បានប្រាប់ភ្នំពេញពេញ ប៉ុស្តិ៍ កាលពីម្សិលមិញថា៖ «សកម្មភាពប្រកួតប្រដាល់គុនខ្មែរ នៅបុណ្យទន្លេ ទូរទស្សន៍អប្សរា ទទួលបានការអនុញ្ញាតពីគណៈកម្មការបុណ្យ ផ្សាយផ្ទាល់ពីក្រុងតាខ្មៅទាំង ២ ថ្ងៃ ពីម៉ោង ៤ ដល់ម៉ោង ៦ ល្ងាច ដើម្បីចែកជូនដល់បងប្អូន បានទស្សនាទូទាំងប្រទេស និងបានចូលរួមអភិវឌ្ឍវិស័យកីឡា និងវប្បធម៌ជាតិទាំងអស់គ្នា»៕