ភ្នំពេញៈ អ្នកលេងកណ្តាប់ដៃ រឿង សោភ័ណ្ឌ កំពុងបង្កើនការហ្វឹកហាត់យ៉ាងយកចិត្តទុកដាក់ ដើម្បីឡើងប្រកួតផ្តាច់ព្រ័ត្រដណ្តើមខ្សែក្រវាត់គោជល់ ប្រភេទទម្ងន់ ៦៩ គីឡូក្រាម ជាមួយជើងខ្លាំងរបស់ថៃ Opor នៅលើសង្វៀន CNC នាយប់ថ្ងៃសៅរ៍នេះ ខណៈការប្រកួតនេះ សោភ័ណ្ឌ មានទំនុកចិត្តខ្ពស់បំផុត។
វាមិនមែនជាលើកទី ១ នោះទេ ដែល រឿង សោភ័ណ្ឌ និង Opor បានជួបគ្នា គឺពួកគេបានប្រកួតគ្នា ៤ ទៅ ៥ លើកមកហើយ និងធ្លាប់ឈ្នះ ចាញ់ គ្នាទៅវិញទៅមក។
យ៉ាងណាក៏ដោយ គេនៅចាំបានថា Opor ធ្លាប់បានធ្វើឲ្យ រឿង សោភ័ណ្ឌ ខកចិត្តខ្លាំង តាមរយៈការទម្លាក់ សោភ័ណ្ឌ ក្នុងវគ្គពាក់កណ្តាលផ្តាច់ព្រ័ត្រ ការប្រកួតដណ្តើមខ្សែក្រវាត់ នៅលើសង្វៀន SEATV កន្លងមក។
ចំណែកការជួបគ្នាក្នុងវគ្គជម្រុះដណ្តើមខ្សែក្រវាត់គោជល់ វគ្គ ៨ ក្នុងប្រភេទទម្ងន់ ៦៩ គីឡូក្រាម នៅលើសង្វៀន CNC នេះ រឿង សោភ័ណ្ឌ ត្រូវបានគណៈកម្មការប្រកាសឲ្យឈ្នះពិន្ទុ Opor ទាំងចម្រូងចម្រាស ព្រោះការប្រកួតនោះ សោភ័ណ្ឌ បានចាញ់ប្រៀប Opor ច្រើន ហើយ សោភ័ណ្ឌ ក៏ត្រូវបានអាជ្ញាកណ្តាលរាប់ ១ លើកផងដែរ។
យ៉ាងណាក៏ដោយ រឿង សោភ័ណ្ឌ ដែលកំពុងគ្រប់គ្រងខ្សែក្រវាត់ចំនួន ៥ ស្ថាប័នផ្សេងៗគ្នាតែម្នាក់ឯងនោះ មានការប្តេជ្ញាចិត្តខ្ពស់បំផុត ក្នុងការឈ្នះខ្សែក្រវាត់ទី ៦ នេះ។
សោភ័ណ្ឌ បានប្រាប់ភ្នំពេញ ប៉ុស្តិ៍ ថា៖ «ការហ្វឹកហាត់ និងការតាំងចិត្តប្រកួត ដើម្បីឈ្នះ ហើយនេះជាចំណុច ដែលខ្ញុំគិតថា មិនអាចឲ្យខ្សែក្រវាត់នេះ របូតពីដៃខ្ញុំបានទេ គឺខ្ញុំបានប្តេជ្ញាថា ខ្ញុំនឹងឈ្នះខ្សែក្រវាត់ទី ៦ ក្នុងដើមឆ្នាំ ២០១៨ នេះ ជាមិនខាន»។
ចំណែកលោក ឈិន ក្វាន់ចៃ គ្រូបង្វឹក រឿង សោភ័ណ្ឌ បានប្រាប់ កាលពីម្សិលមិញថា ៖ «ការជួបគ្នាកន្លងមក រឿង សោភ័ណ្ឌ ហាត់មិនសូវបានពេញចិត្តទេ ព្រោះគេមានជំងឺក្រពះ ផង និងឈឺពោះវៀនផង ប៉ុន្តែការជួបគ្នាលើកនេះ រឿង សោភ័ណ្ឌ បង្កើនការហ្វឹកហាត់បាន ៨០ ភាគរយហើយ ហើយខ្ញុំមានសង្ឃឹមរហូតដល់ ៨៥ ភាគរយថា រឿង សោភ័ណ្ឌ នឹងអាចយកឈ្នះ Opor ក្នុងការប្រកួតផ្តាច់ព្រ័ត្រនេះ»។
គ្រូបង្វឹករូបនេះ បានបញ្ជាក់ថា៖ «តាមរយៈការហ្វឹកហាត់នេះ រឿង សោភ័ណ្ឌ នឹងវាយចេញបានធ្ងន់ទាំងកណ្តាប់ដៃ និងកែង ហើយគុណភាពកម្លាំងរបស់គេ ក៏ពេញផងដែរ ចំណែកយុទ្ធសាស្ត្រវ៉ៃលើកនេះ យើងនឹងចេញកណ្តាប់ដៃឲ្យបានច្រើន រួចថែមដោយការវាយកែងតែម្តង គឺធ្វើយ៉ាងណា កុំឲ្យ Opor ចាប់បុកជង្គង់ ព្រោះថៃម្នាក់នេះ គេពូកែខាងចាប់បុកជង្គង់ខ្លាំងណាស់»។
បើទោះបីជាមានការជឿជាក់ និងអះអាងយ៉ាងនេះក្តី ប៉ុន្តែគេនៅមិនទាន់ច្បាស់ថា តើ រឿង សោភ័ណ្ឌ ឬ Opor ជាម្ចាស់ខ្សែក្រវាត់នោះទេ? ព្រោះ Opor ជាកីឡាករដែលមានសមត្ថភាពខ្លាំង មិនអាចនឹងចាញ់កីឡាករណាម្នាក់ដោយងាយឡើយ ហើយគេក៏ធ្លាប់ឈ្នះខ្សែក្រវាត់នៅកម្ពុជា កន្លងមកផងដែរ។
ចំណែកកីឡាករថៃ Natthakeat និង Farmaengkorn ត្រូវប្រកួតគ្នាដណ្តើមយកចំណាត់ថ្នាក់លេខ ៣ និងលេខ ៤ នៅយប់ថ្ងៃសៅរ៍នោះដែរ ខណៈការប្រកួតវគ្គពាក់កណ្តាលផ្តាច់ព្រ័ត្រ កន្លងមកនេះ Natthakeat បានចាញ់ Opor ឯ Farmaengkorn ចាញ់ពិន្ទុ រឿង សោភ័ណ្ឌ។ រីឯ កីឡាករកម្ពុជា ផាន់ គ្រាន់ ត្រូវដាក់ឲ្យប្រកួតមិត្តភាពអន្តរជាតិ ជាមួយអ្នកប្រដាល់អ៊ីរ៉ង់ Peyman Ordouzadeh ក្នុងទម្ងន់ ៦៥ គីឡូក្រាម នៅថ្ងៃសៅរ៍ នោះដែរ៕