.jpg)
លោក Antonio Conte (ឆ្វេងទី២) គ្រូបង្វឹករបស់ក្រុម Chelsea ចាប់ដៃជាមួយនឹងខ្សែប្រយុទ្ធ Lionel Messi របស់ Barcelona។ AFP
ក្រុងឡុងដ៍: លោក Antonio Conte អ្នកចាត់ការទូទៅរបស់ក្រុម Chelsea ជឿជាក់ថា ក្រុមម្ចាស់ជើងឯករបស់អង់គ្លេសមួយនេះ អាចធ្វើ «រឿងដ៏មិនគួរឲ្យជឿ» តាមរយៈការទម្លាក់ក្រុម Barcelona ឲ្យធ្លាក់ចេញពីក្របខ័ណ្ឌ Champions League នៅកីឡដ្ឋាន Camp Nou នៅថ្ងៃទី១៤ ខែមីនា ខាងមុខនេះ បើទោះបីបានបោះបង់ការនាំមុខ ដើម្បីបញ្ចប់ក្នុងលទ្ធផលស្មើ ១-១ ក្នុងការប្រកួតជើងទី ១ នៃវគ្គ ១៦ ក្រុមចុងក្រោយរបស់ពួកគេក៏ដោយ។
Willian បានផ្តល់ផលតបស្នងចំពោះការជ្រើសរើសយកក្រុមដ៏គួរឲ្យភ្ញាក់ផ្អើលរបស់លោក Conte កាលពីថ្ងៃអង្គារ តាមរយៈការជួយឲ្យក្រុមស្ថិតក្នុងក្របខ័ណ្ឌ Premier League មួយនេះ នាំមុខមុន បន្ទាប់ពីនាទី ទី ៦០ ក្រោយពីបានស៊ុតបាល់ប៉ះរបារទី ២ ដងក្នុងតង់ទី ១។
ប៉ុន្តែ ទោះបីជាយ៉ាងណា ក្រុម Barca បានដណ្តើមយកប្រៀបទៅលើការប្រព្រឹត្តកំហុសដ៏កម្ររបស់ក្រុម Chelsea នៅរាត្រីនោះ ខណៈដែល Andres Iniesta បានរត់ដណ្តើមបាល់ពីការបញ្ជូនរបស់ខ្សែការពារ Andreas Christensen និងបានបោះបាល់ទៅឲ្យ Lionel Messi ដែលបានរកគ្រាប់បាល់បញ្ចូលទីជាលើកទី១របស់គេក្នុងចំណោមការប្រកួត៩លើកជាមួយនឹងក្រុម Chelsea។
លោក Conte បានឲ្យដឹងថា៖ «យើងត្រូវតែមានភាពប្រាកដនិយម។ យើងកំពុងតែនិយាយពី Barcelona។ ពួកគេបង្ហាញថា ពួកគេជាក្រុមដ៏ខ្លាំង និងអស្ចារ្យនៅរាត្រីនេះ»។
គ្រូបង្វឹកសញ្ជាតិអ៊ីតាលី រូបនេះបានបន្ថែមទៀតថា៖ «យើងបានបង្ហាញថា ប្រសិនបើយើងត្រៀមលក្ខណៈរួចរាល់ ក្នុងការខិតខំព្យាយាមធ្វើការរួមគ្នានៅតំបន់ការពារ ប៉ុន្តែ បន្តរក្សាមានអារម្មណ៍ល្អ នៅពេលដែលអ្នកទទួលបានបាល់ និងនៅពេលដែលយើងមានឱកាសក្នុងការរកគ្រាប់បាល់ យើងអាចបង្កើតរឿងដ៏មិនគួរឲ្យជឿនៅកីឡដ្ឋាន Nou Camp»៕ IS
ខ្សែបម្រើ Willian (កណ្តាល) របស់ Chelsea ព្យាយាមគ្រប់គ្រងបាល់ក្រោមសម្ពាធពី Sergi Roberto (ឆ្វេង) និង Sergio Busquets របស់ Barcelona។ AFP
