.jpg)
លោក Jupp Heynckes គ្រូបង្វឹករបស់ក្រុម Bayern Munich និយាយក្នុងសន្និសីទសារព័ត៌មានមួយកាលពីថ្ងៃចន្ទ។ AFP
ក្រុងមុយនិក: លោក Jupp Heynckes គ្រូបង្វឹករបស់ក្រុម Bayern Munich បានទទួលស្គាល់ថា លោកកំពុងតែឈឺក្បាលក្នុងការជ្រើសរើសកីឡាករ និងការរៀបចំក្រុម សម្រាប់ការប្រកួតក្របខ័ណ្ឌ Champions League វគ្គ ១៦ ក្រុមចុងក្រោយ ជើងទី ១ ជាមួយនឹងក្រុម Besiktas នៅរាត្រីនេះ។
ក្រុម Bayern នឹងឈានទៅកាន់ការប្រកួតនេះដោយគ្មានការបារម្ភពីបញ្ហារបួសកីឡាករសោះ ខណៈដែលរាល់កីឡាករទាំងអស់របស់ពួកគេសុទ្ធសឹងអាចចូលលេងបានសម្រាប់ការប្រកួតនារាត្រីនេះ នៅកីឡដ្ឋាន Allianz Arena។
លោក Heynckes ដែលបានដឹកនាំឲ្យក្រុម Bayern ឈ្នះពាន Champions League កាលពីឆ្នាំ ២០១៣ នោះ នឹងឈានចូលវ័យ ៧ ៣ឆ្នាំ នៅខែឧសភាខាងមុខនេះ ប៉ុន្តែ គ្រូបង្វឹករូបនេះបានបញ្ជាក់ថា លោកនៅតែមានអារម្មណ៍តានតឹងចំពោះការត្រៀមលក្ខណៈផ្សេងៗ សម្រាប់ការប្រកួតក្របខ័ណ្ឌកំពូលអឺរ៉ុបមួយនេះ។
លោកត្រូវធ្វើការសម្រេចចិត្តដ៏លំបាកៗជាច្រើន ខណៈ អ្នកចាំទី Manuel Neuer គឺជាកីឡាករតែម្នាក់ដែលអវត្តមាន ក្រោយពីរូបគេទើបតែជាសះស្បើយពីបញ្ហារបួសប្រអប់ជើងរបស់គេ។
លោក Heynckes បាននិយាយក្នុងសន្និសីទសារព័ត៌មានកាលពីថ្ងៃចន្ទថា៖ «ខ្ញុំមានក្រុម A ឬ ក្រុម B ឡើយ ប៉ុន្តែ មានតែក្រុម Bayern តែមួយប៉ុណ្ណោះ។ រាល់កីឡាករទាំងអស់ដឹងពីតួនាទីរបស់ពួកគេ និងយល់គ្នាទៅវិញទៅមក ហេតុនេះ ខ្ញុំគិតថា យើងមិនមានបញ្ហាច្រើនឡើយក្នុងការដាក់ឲ្យកីឡាករលេងចុះឡើងនោះ»។
ការប្រកួតនេះនឹងចាប់ផ្តើមនៅម៉ោង ២:៤៥ ទៀបភ្លឺ៕ IS
ខ្សែបម្រើ Franck Ribery (ឆ្វេង) និងខ្សែបម្រើ Javier Martinez របស់ក្រុម Bayern Munich កម្តៅសាច់ដុំមុនការប្រកួតនៅរាត្រីនេះ។ AFP
