ក្រុងសេវីលល៍: លោក Jose Mourinho មានការព្រួយបារម្ភថា Ander Herrera រងរបួសដ៏ធ្ងន់ធ្ងរ ក្រោយពីខ្សែបម្រើអន្តរជាតិអេស្ប៉ាញរូបនេះ ត្រូវបានបង្ខំចិត្តប្តូរចេញ នៅដើមតង់ទី ១ ក្នុងពេលក្រុមខ្លួនបានបញ្ចប់ក្នុងលទ្ធផលស្មើ ០-០ ជាមួយនឹងក្រុម Sevilla ក្នុងការប្រកួតក្របខ័ណ្ឌ Champions League កាលពីថ្ងៃពុធ។
Herrera មិនបានចូលលេងដោះក្នុងការប្រកួត ៣ លើកកាលពីមុន របស់ក្រុម Man United ដោយសារតែបញ្ហារបួសសាច់ដុំ នៅមុនពេលត្រូវបានកោះហៅឲ្យចូលលេងក្នុងវគ្គ១៦ក្រុមចុងក្រោយ ជើងទី១ នាកីឡដ្ឋាន Sanchez Pizjuan។
ប៉ុន្តែ ទោះបីជាយ៉ាងណា រូបគេបានចូលលេងត្រឹមតែរយៈពេល១៧នាទីប៉ុណ្ណោះ មុននឹងត្រូវបានជំនួសដោយខ្សែបម្រើអន្តរជាតិបារាំង Paul Pogba។
បន្ទាប់ពីការប្រកួតនៅប្រទេសអេស្ប៉ាញ លោក Mourinho បានឲ្យដឹងថា៖ «ខ្ញុំគិតថា ជាការរងរបួសដ៏ធ្ងន់មួយ។ រូបគេមានបញ្ហារបួសតិចតួច ដែលបានធ្វើឲ្យអវត្តមាន២ប្រកួតចុងក្រោយ។ ប៉ុន្តែ ផ្នែកសុខាភិបាល បានធ្វើឲ្យរូបគេមានភាពរឹងមាំ១០០ភាគសម្រាប់លេងកាលពីថ្ងៃសៅរ៍មុន»។ យើងមិនដាក់ឲ្យរូបគេលេងច្រើនឡើយដើម្បីការពាររូបគេ ប៉ុន្តែ វាហាក់បង្ហាញថា គេមិនទាន់រឹងមាំទាំងស្រុងនៅឡើយទេ»៕ IS