Search form

Login - Register | FOLLOW US ON

Logo of Phnom Penh Post newspaper Phnom Penh Post - ល្បុក្កតោ ត្រូវ​បញ្ចូល​ក្នុង​កម្មវិធី​សិក្សា​របស់​រដ្ឋ

Content image - Phnom Penh Post
ការ​សម្តែង​ល្បុក្កតោ នៅ​ក្នុងសិក្ខាសាលា ស្តី​ពី​គុណ​តម្លៃ គុនល្បុក្កតោ នាពេល​កន្លង​មក។ ស្រេង ម៉េងស្រ៊ុន

ល្បុក្កតោ ត្រូវ​បញ្ចូល​ក្នុង​កម្មវិធី​សិក្សា​របស់​រដ្ឋ

ភ្នំពេញ: កីឡា​ប្រពៃណី និង​វប្បធម៌​ខ្មែរ​គឺ​ល្បុក្កតោ ត្រូវ​បាន​ដាក់​បញ្ចូល​ក្នុង​កម្មវិធី​សិក្សា ជា​មុខវិជ្ជា​កីឡា​មួយ​ប្រភេទ​របស់​សិស្សានុសិស្ស​នៃ​ក្រសួង​អប់រំ យុវជន និង​កីឡា។

ការសម្រេច​ដាក់​បញ្ចូល​នូវ​ក្បាច់គុន​កីឡា​ល្បុក្កតោ​សម្រេច​នេះ បន្ទាប់​ពីការ​ស្រាវជ្រាវ​ចងក្រង និង​មានការ​ប្រឹងប្រែង​ពី​លោក​សាន គឹមស៊ាន និង​ថ្នាក់​ដឹកនាំ​មួយ​ចំនួន​ទៀត ដែល​ចំណាយ​ពេល​ជិត ២០ ឆ្នាំ​ឯណោះ ហើយ​ថ្មីៗ​នេះ​សហព័ន្ធ​កីឡា​ល្បុក្កតោ​កម្ពុជា បាន​បោះពុម្ព​ចេញ​នូវ​សៀវភៅ ដែល​មាន​ឈ្មោះ​ថា៖ «គុន​ល្បុក្កតោ» ថ្នាក់​ក្រមា «ស» ដែល​ជាស្នាដៃ​ចងក្រង​របស់​លោក​គ្រូតា​ក្រមាមាស សាន គឹមស៊ាន​មាន​ជាង ២០០ ទំព័រ មាន ២២ ជំពូក ដែល​ពន្លេច​ដោយ​រូបភាព​ជាគំនូរ​កាយវិការ ចលនា​ក្បាច់គុន​កម្រិត​បឋម​នៅ​ឡើយ។

លោក សាន គឹមស៊ាន ស្ថាបនិក ដែល​បាន​ចងក្រង​ក្បាច់គុន​ល្បុក្កតោ​កម្ពុជា​ឡើង​វិញ បាន​ថ្លែង​ថា៖ «ខ្ញុំបាន​ចំណាយ​ពេល​ចងក្រង​ជា​ក្បួនច្បាប់​នេះ​ជិត ២០ ឆ្នាំ។ ស្នាដៃ​នេះ​មិនមែន​តែខ្ញុំ​ម្នាក់ទេ គឺមាន​ការចូលរួម​លើក​ទឹកចិត្ត​ពីថ្នាក់​ដឹកនាំ​មួយ​ចំនួន​ដូចជា លោក សុខ អាន លោក ជាម យៀប លោក ថោង ខុន លោក វ៉ាត់ ចំរើន លោក ស៊ន សំណាង លោក ឌី ខាំបូលី លោក​សេង សារី លោក​មិត្ត ការេន ព្រមទាំង​ព្រឹទ្ធាចារ្យ​ដទៃ​ទៀត ទើប​ល្បុក្កតោ​របស់​យើង មាន​មុខមាត់ និង​ទទួល​ស្គាល់​ដល់​ពេល​នេះ។ ចំណែក​ការដាក់​ចូលក្នុង​កម្មវិធី​សិក្សា​សាលារៀន​នេះ​ជាបំណង​របស់ខ្ញុំ ដែល​ស្រមៃ​ចង់បាន​យូរណាស់​មក​ហើយ ព្រោះ​ជាកីឡា​ប្រពៃណី ព្រលឹង​ជាតិខ្មែរ បន្សល់ទុក​តាំងពី​បុរាណកាល»។

ក្នុងវ័យ​ជាង ៧០ឆ្នាំ លោក សាន គឹមស៊ាន បាន​ចំណាយ​កម្លាំងកាយ ចិត្ត ប្រាជ្ញា​ស្មារតី យ៉ាង​អស្ចារ្យ មិនសូវ​បានគិត​គូរ​អំពី​បញ្ហា​ជីវភាព​សំខាន់​នោះ​ឡើយ ហើយ​ស្នាដៃ​របស់​លោក បាន​ធ្វើឲ្យ​កីឡា​ល្បុក្កតោ មាន​អំណះអំណាង​គ្រប់គ្រាន់ និងមាន​ប្រយោជន៍​សម្រាប់​អប់រំកាយ និង​កីឡា ហើយ​ក្រសួង​អប់រំ យុវជន និង​កីឡា សម្រេច​ទទួល​យក​ដាក់​ចូលក្នុង​កម្មវិធីសិក្សា។

លោក វ៉ា​ត់ ចំរើន អគ្គលេខាធិការ NOCC និងជា​ប្រធាន​សហព័ន្ធ​កីឡា​ល្បុក្កតោ​កម្ពុជា​បានឲ្យ​ដឹងថា ពេលនេះ​ក្រសួង​អប់រំ បាន​សម្រេច​ដាក់បញ្ចូល​កីឡា​ល្បុក្កតោ​ទៅក្នុង​កម្មវិធីសិក្សា​លើ​មុខវិជ្ជា​អប់រំកាយ ជា​ផ្លូវការ​ហើយ ក្រោយ​មានការ​ស្នើសុំ​ពីសហព័ន្ធ​កីឡា​ល្បុក្កតោ​កម្ពុជា និង​អ្នកជំនាញ​ស្រាវជ្រាវ​ឯកសារ​ប្រវត្ដិសាស្ដ្រ ដោយ​ឆ្លងកាត់​ការត្រួតពិនិត្យ ជាច្រើន​ឆ្នាំ​មក ដោយ​ធ្វើឡើង​តាមរយៈ​អគ្គនាយកដ្ឋាន​កីឡា សម្រេច​ដាក់​បញ្ចូល​ក្នុង​កម្មវិធី​សិក្សា​ពី​ថ្នាក់ទី ៧ ដល់ទី ៩ ដែល​បាន​បញ្ចូល​ក្បាច់ ស្នៀត និង​ទ្រឹស្ដី​មូលដ្ឋានគ្រឹះ​មួយ​ចំនួន​ធំ ឲ្យ​សិស្សានុសិស្ស​បាន​សិក្សា​ស្វែងយល់ ដើម្បី​រួមចំណែក​អភិរក្ស និង​អភិវឌ្ឍ ព្រលឹង​ក្បាច់គុន​វប្បធម៌​ខ្មែរ»។

ចំណែក​លោក ស៊ាន បូរ៉ា​ត រដ្ឋលេខាធិការ​ក្រសួង​អប់រំ យុវជន និង​កីឡា បាន​សាទរ​ចំពោះ​ការដាក់​បញ្ជូល​កម្មវិធី​កីឡា​ល្បុក្តតោ​នេះ ប៉ុន្តែ​លោក​បាន​អះអាង​ថា ទាក់ទង​ទៅនឹង​បច្ចេកទេស និង​ពេលវេលា​នោះ គឺ​លោក​មិនទាន់​ហ៊ាន​លម្អិត​ឲ្យច្បាស់​ទេ ព្រោះ​លោក​កំពុង​មាន​បេសកកម្ម​នៅ​ក្រៅ​ប្រទេស​នៅ​ឡើយ។

លោក ហុក ឈាងគីម ជា​ស្ថាបនិក​ដែរ ថ្លែងថា៖ «ការដាក់​ល្បុក្កតោ បញ្ចូល​ក្នុង​កម្មវិធីសិក្សា​របស់​ក្រសួង​អប់រំ​នេះ គឺល្អ​ណាស់ ហើយ​បើ​និយាយ​ជាក់ស្តែង​វិញ​ខ្ញុំផ្ទាល់​ជាអ្នក​បង្ហាត់​កូនសិស្ស​នូវ​ក្បាច់គុន​ល្បុក្កតោ​នេះ​នៅ​សាលា​ឯកជន​ច្រើន​ឆ្នាំ​ហើយ​និង​មានកូន​សិស្ស​រាប់ពាន់​នាក់​ឯណោះ។ ប៉ុន្តែ​ល្បុក្កតោ ក្នុង​សាលា​គឺគ្រាន់​តែថ្នាក់​បាត​គ្រឹះ​ប៉ុណ្ណោះ ដែល​យើង​ហៅថា​កម្រិត​ក្រមា «ស» ហើយ​បើ​ទៅ​កម្រិត​ខ្ពស់ ឬ​អាជីព គឺ​ចាប់ពី​ក្រមា​បៃតង ខៀវ ក្រហម ត្នោត ខ្មៅ​និង​ខ្មៅ ១០ ជាន់​ឯណោះ៕

0

Comments

Please, login or register to post a comment