ភ្នំពេញៈ លោក វ៉ាត់ ចំរើន ដែលទើបទទួលបានការគាំទ្រពីអង្គមហាសន្និបាត ឲ្យបន្តធ្វើជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ក្នុងអាណត្តិទី ៧ ថ្មី ឆ្នាំ ២០១៨ ដល់ឆ្នាំ ២០២២ បានធ្វើការបញ្ជាក់ពីចំណុចស្លាប់រស់ ដែលត្រូវអនុវត្តឲ្យបាន នៅក្នុងផែនការយុទ្ធសាស្ត្ររបស់ NOCC ក្នុងអាណត្តិថ្មីរបស់ខ្លួន ដើម្បីឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ។
នៅក្នុងបទសម្ភាសជាមួយ ភ្នំពេញ ប៉ុស្តិ៍ កាលពីថ្ងៃចន្ទ លោក វ៉ាត់ ចំរើន បានថ្លែងថា៖ «នៅក្នុងផែនការយុទ្ធសាស្ត្រទាំង ៩ ចំណុច ដែល NOCC បានដាក់ចេញ ក្នុងអាណត្តិថ្មីនេះវាមានសារៈសំខាន់បំផុត សម្រាប់ឆ្ពោះទៅកាន់ស៊ីហ្គេម ឆ្នាំ ២០២៣ ព្រោះវាជាផែនការយុទ្ធសាស្ត្រ ដែលផ្តោតទៅលើទិដ្ឋភាពនៃកាលានុវត្តភាពថ្មី ដោយត្រូវពិនិត្យទាំងលើវិទ្យាសាស្ត្រកីឡា និងជំនាញកីឡាជាក់ស្តែង មុនស៊ីហ្គេម ឆ្នាំ ២០២៣ មកដល់»។
លោកបញ្ជាក់ថា៖ «ចំណុចស្លាប់រស់ ក្នុងផែនការយុទ្ធសាស្ត្រទាំង ៩ ចំណុចរបស់យើង គឺយើងត្រូវធ្វើយ៉ាងណាអនុវត្តឲ្យបាននូវការប្តេជ្ញាចិត្តរបស់ប្រភេទកីឡានីមួយៗ ក្នុងកម្មវិធីប្រកួតស៊ីហ្គេម នាឆ្នាំ ២០២៣ ដោយដាក់ចេញជាសម្ទុះនៃចំនួនមេដាយ ដែលត្រូវដណ្តើមយក ប៉ុន្តែយើងមិនមានមហិច្ឆតាធំពេកទេ ដោយឯកឧត្តមបណ្ឌិតប្រធាន ថោង ខុន បានបញ្ជាក់ថា មហិច្ឆតារបស់យើង គឺត្រូវស្ថិតក្នុងចំណោមប្រទេសទាំង ៥ ដែលដណ្តើមបានមេដាយច្រើនជាងគេ ក្នុងចំណោម ១១ ប្រទេស»។
សម្រាប់ផែនការយុទ្ធសាស្ត្រទាំង ៩ ចំណុច ដែល NOCC បានដាក់ចេញ ក្នុងអាណត្តិទី ៧ ថ្មីនេះ រួមមាន ទី ១ បន្តកំណែទម្រង់ស៊ីជម្រៅលើសហព័ន្ធកីឡាជាតិ ដែលមានភាពមិនប្រក្រតី មានការអភិវឌ្ឍយឺត និងមានការរាំងស្ទះដល់យន្តការបច្ចេកទេសកីឡាជំនាញ ទី ២ ជំរុញការអនុវត្តផែនការយុទ្ធសាស្ត្រ ប្តេជ្ញាចិត្តលើសម្ទុះមេដាយ ដែលបានកំណត់ក្នុងការប្រកួតស៊ីហ្គេម លើកទី ៣០ ឆ្នាំ ២០១៩ លើកទី ៣១ ឆ្នាំ ២០២១ និងស៊ីហ្គេម លើកទី ៣២ ឆ្នាំ ២០២៣ នៅក្នុងប្រទេសកម្ពុជា។
ចំណែកទី ៣ ផ្តោតការយកចិត្តទុកដាក់ លើផែនការអភិវឌ្ឍបច្ចេកទេសរបស់សហព័ន្ធកីឡាជាតិ ដោយដាក់ចេញនូវយន្តការតាមដាន ត្រួតពិនិត្យ វាយតម្លៃច្បាស់លាស់ ឈានដល់ការដាក់ចេញនូវវិធានការដោះស្រាយ។ ទី ៤ សហការឲ្យបានជិតស្និទ្ធប្រកបដោយឆន្ទៈវិជ្ជមាន ក្នុងស្មារតីសាមគ្គី សហប្រតិបត្តិការ ជាមួយ ក្រសួងអប់រំ យុវជន និងកីឡា និងគណៈកម្មាធិការរៀបចំស៊ីហ្គេម ឆ្នាំ ២០២៣ «CAMSOC» សហព័ន្ធកីឡាជាតិ និងភាគីពាក់ព័ន្ធ ដើម្បីឆ្ពោះទៅរកប្រសិទ្ធភាព និងទទួលបានជោគជ័យនៅឆ្នាំ ២០២៣។
ចំណុចទី ៥ ត្រូវបន្តកៀរគរ សប្បុរសជន និងវិស័យឯកជនចូលរួមឧបត្ថម្ភ គាំទ្រសកម្មភាពកីឡា និងព្រឹត្តិការណ៍កីឡានានា រីឯទី ៦ បន្តកិច្ចសហការចូលរួមរៀបចំការប្រកួតកីឡាជាតិរៀលរាល់ ២ ឆ្នាំម្តង។ ទី ៧ ស្វែងរកមេដាយចំនួន ២ ខ្ទង់ (១០ មេដាយមាសឡើង) ពីការប្រកួតស៊ីហ្គេម ឆ្នាំ ២០១៩ និងឆ្នាំ ២០២១ ឯទី ៨ ស្វែងរកមេដាយឲ្យបានយ៉ាងតិចចំនួន ១ ក្នុងការប្រកួតកីឡាអាស៊ី ក្នុងឆ្នាំ ២០១៨ និងឆ្នាំ ២០២២ ហើយទី ៩ ជំរុញអត្តពលិកឲ្យដណ្តើមសិទ្ធិពេញលេញ (Qualified Athletes» ដើម្បីចូលរួមប្រកួតកីឡាអូឡាំពិករដូវក្តៅ ឆ្នាំ ២០២០ នៅ ប្រទេសជប៉ុន។
លោក វ៉ាត់ ចំរើន បានលម្អិតបន្ថែមលើផែនការយុទ្ធសាស្ត្រទាំង ៩ ចំណុចនេះថា៖ «ចំណុចសំខាន់ទី ១ នៅក្នុងគោលដៅយុទ្ធសាស្ត្រទាំងនោះ គឺសហព័ន្ធទាំងអស់ ត្រូវសម្រេចឲ្យបាននូវគោលដៅសម្ទុះមេដាយមាស ដែលត្រូវយកនៅឆ្នាំ ២០២៣ ហើយទី ២ ត្រូវបន្តធ្វើកំណែទម្រង់ ព្រោះនេះជាដំណាក់កាល ក្នុងការវះកាត់ ឬសម្រេចពីជោគវាសនារបស់សហព័ន្ធណា ដែលមានភាពមិនប្រក្រតី អភិវឌ្ឍយឺតយ៉ាវ និងមិនទទួលខុសត្រូវ លើការជំរុញគុណផលកីឡា និងច្ចេកទេសកីឡា ឲ្យឆ្ពោះទៅមុខ និងមានភាពរាំងស្ទះ ការអភិវឌ្ឍបច្ចេកទេស ប៉ុន្តែយើងត្រូវធ្វើការជំរុញ និងជួយដល់សហព័ន្ធមួយចំនួន ដែលមានការអភិវឌ្ឍយឺត»។
ជាមួយគ្នានេះ លោក ចំរើន ក៏បានគូសបង្ហាញពីសហព័ន្ធ ឬប្រភេទកីឡា ដែលមានសក្តានុពលខ្លាំង ក្នុងការប្រជែងយកមេដាយ ក៏ដូចជាជំរុញឲ្យការប្រកួតស៊ីហ្គេម ឆ្នាំ ២០២៣ ទទួលបានការគាំទ្រខ្លាំង ពីប្រជាពលរដ្ឋកម្ពុជា ផងដែរ ហើយចំណុចសំខាន់មួយចំនួន នឹងត្រូវចាប់ផ្តើមអនុវត្ត ពីឆ្នាំ ២០១៨ នេះ តទៅ។
លោកថ្លែងថា៖ «សហព័ន្ធកីឡា ដែលត្រូវបានដាក់ចេញជាយុទ្ធសាស្ត្រអាទិភាព ក្នុងស៊ីហ្គេម ឆ្នាំ ២០២៣ មាន ៣ គឺទី ១ សហព័ន្ធខ្មែរកីឡាអត្តពលិក និងហែលទឹក ដែលមានប្រភេទវិញ្ញាសាច្រើន ដូច្នេះយើងត្រូវជួយជំរុញ និងកែសម្រួល លើកទឹកចិត្ត និងកិច្ចសហការយ៉ាងស្អិតល្មួតជាមួយភាគីពាក់ព័ន្ធទាំងអស់ ដើម្បីរុញឲ្យសហព័ន្ធទាំង ២ នេះ ទៅដល់គោលដៅ»។
អ្នកជំនាញកីឡារូបនេះ បានបន្ថែមថា៖ «ចំណុចទី ២ សហព័ន្ធកីឡា ដែលជាអត្តសញ្ញាណជាតិ មានកីឡាគុន (ប្រដាល់គុនខ្មែរ+គុនល្បុក្កតោ) និងកីឡាអុកចត្រង្គ ហើយទី ៣ សហព័ន្ធ ឬក្រុមកីឡា ដែលមានប្រជាប្រិយភាពជាងគេ នៅក្នុងប្រទេសកម្ពុជា រួមមានបាល់ទាត់ បាល់ទះ និងបាល់បោះ។ ប្រភេទកីឡាទាំង ៣ នេះ ជាចំណុចគោលដៅយុទ្ធសាស្ត្រអាទិភាព ដែលយើងត្រូវយកចិត្តទុកដាក់ អ៊ីចឹងយើងត្រូវនាំគ្នាយកចិត្តទុកដាក់ទៅលើផែនការអនុវត្តបច្ចេកទេស ការអភិវឌ្ឍកីឡាករ កីឡាការិនី»។
លោក វ៉ាត់ ចំរើន បានបន្ថែមទៀតថា៖ «អ៊ីចឹងអ្វីៗទាំងអស់ យើងត្រូវសម្លឹងទៅលើបញ្ហាប្រឈមរបស់អត្តពលិក ដើម្បីស្វែងរកដំណោះស្រាយ ដែលធ្វើឲ្យពួកគេ និងសហព័ន្ធកីឡាជាតិរបស់យើង មានការរីកចម្រើនផ្នែកបច្ចេកទេស ហើយយើងត្រូវដោះស្រាយជាបណ្តើរៗ នូវបញ្ហាប្រឈមទាំងនោះ។ អ៊ីចឹងសហព័ន្ធកីឡាជាតិ នឹងទទួលបានការរៀបចំមួយដ៏មានប្រសិទ្ធភាព និងទទួលបាននូវភាពកក់ក្តៅមួយថា អ្វីដែលជាផែនការអភិវឌ្ឍជំនាញ និងអភិវឌ្ឍកម្រិតគុណភាពរបស់ខ្លួន បានដើរទៅមុខដោយមិនធាក់ថយ»។
ជាមួយនឹងអ្វី ដែលបានលើកឡើងនេះ លោក ចំរើន បញ្ជាក់ថា៖ «យើងត្រូវផ្តោតយកចិត្តទុកដាក់ទៅលើការហ្វឹកហាត់ ការកសាងហេដ្ឋារចនាសម្ព័ន្ធ ការអភិវឌ្ឍជំនាញ ការអភិវឌ្ឍទៅលើសម្ភារ និងឧបករណ៍ផ្សេងៗរបស់សហព័ន្ធ និងផ្តោតទៅលើការបញ្ជូនគ្រូបរទេស មានលក្ខណសម្បត្តិគ្រប់គ្រាន់ មកបង្វឹកនៅក្នុងប្រទេសរបស់យើង និងបញ្ជូនអត្តពលិករបស់យើង ចេញទៅហ្វឹកហាត់នៅក្រៅប្រទេស ចាប់ពីឆ្នាំ ២០១៨ នេះទៅ ហើយទាំងអស់ហ្នឹង ជាដំណើរឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ របស់យើង»៕