Search form

Login - Register | FOLLOW US ON

Logo of Phnom Penh Post newspaper Phnom Penh Post - វ៉ាន់​សាន្ត ត្រៀម​ធ្វើ​គ្រូបង្វឹក​នៅ​កម្ពុជា ក្រោយ​ជាប់​ខ្សែ​ក្រវាត់​ខ្មៅ

Content image - Phnom Penh Post
លោក​ជា វ៉ាន់សាន្ត គ្រោង​វិល​មក​កម្ពុជា​វិញ ដើម្បី​ធ្វើ​ជា​គ្រូបង្វឹក។ រូប សហការី

វ៉ាន់​សាន្ត ត្រៀម​ធ្វើ​គ្រូបង្វឹក​នៅ​កម្ពុជា ក្រោយ​ជាប់​ខ្សែ​ក្រវាត់​ខ្មៅ

ភ្នំពេញ: យុវជន​ជា វ៉ាន់សាន្ត អ្នក​ហាត់​កីឡា​ហាប់គីដូ​នៅ​កូរ៉េ​យ៉ាង​សកម្ម បាន​ប្រឡង​ឡើង​ខ្សែក្រវាត់​ខ្មៅ ៣ ដាន់​ជាប់​ជាស្ថាពរ​កាល​ពី​ម្សិលមិញ​នៅ​មជ្ឈមណ្ឌល​កីឡា​ហាប់គីដូ​នៅ​ប្រទេស​កូរ៉េខាងត្បូង ក្រោយ​ពី​ចំណាយ​ពេល​ហ្វឹកហាត់​ជា​ប្រចាំ​រាល់​ចុង​សប្តាហ៍​អស់​រយៈពេល​ជិត ១០ ឆ្នាំ​កន្លង​មក។

ជា វ៉ាន់​សាន្ត ទទួល​បាន​ខ្សែក្រវាត់​ខ្មៅ ៣ ដាន់ និង​លិខិត​បញ្ជាក់​ពី​ស្ថាប័ន​កីឡា​ហាប់គីដូ​កូរ៉េ​លំដាប់​ថ្នាក់​អន្តរជាតិ។ នេះ​តាមការ​បញ្ជាក់​របស់​គេ​ប្រាប់​ភ្នំពេញ ប៉ុស្តិ៍ កាល​ពី​ម្សិលមិញ​តាម​បណ្តាញ​សង្គម Facebook។

លោក​ជា វ៉ាន់សាន្ត បាន​ប្រាប់​ថា៖ «ខ្ញុំ​នឹង​បញ្ចប់​កិច្ចសន្យា​ការងារ​នៅ​ប្រទេស​កូរ៉េ​នៅ​ខែធ្នូ ឆ្នាំ ២០១៧ ខាងមុខ​នេះ ដើម្បី​វិល​មក​ចូលរួម​ចំណែក​ជាមួយ​សហព័ន្ធ​កីឡា​ខ្មែរ​ហាប់គីដូ​នៅ​មាតុ​ប្រទេស​ក្នុង​ឋានៈ​ជា​គ្រូបង្វឹក​ក្នុងការ​បណ្តុះបណ្តាល​អ្នក​ហាត់គុន​ហាប់គីដូ​កម្ពុជា​បច្ចុប្បន្ន ដែល​កំពុង​មាន​សិស្ស​កើន​ឡើង​ជា​លំដាប់ និង​ខ្វះខាត​សមត្ថភាព​ធនធាន​គ្រូបង្វឹក​នៅ​ឡើយ»។

លោក​បន្ថែម​ថា៖ «ខ្ញុំធ្លាប់​ហ្វឹកហាត់​កីឡា​ហាប់គីដូ​ដំបូង​ជាមួយ​លោកគ្រូ​គង់ ចាន់ធីណា ក្នុង​លក្ខណៈ​ខ្វះខាត​ទីលាន​គឺ​ហាត់​តាម​ទីសាធារណៈ​ប៉ុណ្ណោះ ហើយ​បច្ចុប្បន្ន​បើ​តាម​លោកគ្រូ​គង់ ចាន់ធីណា គាត់​ចង់​ឃើញ​ហាប់គីដូ​មាន​ទីតាំង​ហ្វឹកហាត់​សមរម្យ​ក្នុង​ប្រទេស​ដូច​ប្រភេទ​កីឡា​ដទៃ»។

ជា វ៉ាន់សាន្ត បាន​និយាយ​ថា៖ «ការប្រឡង​ឡើង​ខ្សែក្រវាត់​នេះ​មាន​លក្ខណៈ​តឹងតែង​ទៅ​លើ​ស្នៀត​ទាត់ លោត​កម្ពស់ ស្នៀត​កាច់ និង​វិញ្ញាសា​ឆ្លងកាត់​ឧបសគ្គ​មួយ​ចំនួន​ទៀត ដែល​សុទ្ធតែ​លំបាក»។

វ៉ាន់សាន្ត បាន​បន្តថា៖ «ការប្រឡង​ឡើង​នេះ​ជា​ព្រឹត្តិការណ៍​ធំ​ប្រចាំ​ឆ្នាំ ២០១៧ ដែល​មាន​សិស្ស​ចម្រុះ​មកពី​សាលាគុន​នានា​ក្នុង​ប្រទេស​ចំនួន ៦០០ នាក់ ក្នុង​នោះ​មាន​មក​ពី​បរទេស​ចំនួន ២០ ប្រទេស​ផងដែរ»។

លោក​គង់ ចាន់ធីណា អគ្គលេខាធិការ​ខ្មែរ​ហាប់គីដូ និង​ជា​គ្រូបង្វឹក បាន​និយាយ​ថា៖ «ហាប់គីដូ​ពីដំបូង​មានការ​លំបាក ដោយ​ខ្ញុំ​ប្រឹងប្រែង​តស៊ូ​រយៈពេល​ជាង ១០ ឆ្នាំ​មក​ហើយ ប៉ុន្តែ​បច្ចុប្បន្ន​នេះ​ហាប់គីដូ​ទទួល​បាន​លទ្ធផល​គួរ​ឲ្យ​មោទនៈ​ល្អ​ណាស់ ដោយ​យើង​មាន​ទីលាន​ហ្វឹកហាត់​ល្អ​សមរម្យ ពោល​គឺ​យើង​នៅ​ខ្វះ​តែ​ធនធាន​គ្រូបង្វឹក​តែប៉ុណ្ណោះ»។

លោក​បន្ថែម​ឲ្យដឹង​ទៀត​ថា៖ «ប្រសិន​ជា​យុវជន​ជា វ៉ាន់​សាន្ត សម្រេចចិត្ត​វិល​មក​ស្រុក​ខ្មែរ​យើង​រួម​ចំណែក​ជា​គ្រូបង្វឹក​នោះ វាជា​រឿង​ដែល​ប្រសើរ​បំផុត​សម្រាប់​កីឡា​ហាប់គីដូ​យើង។

បច្ចុប្បន្ន​ហាប់គីដូ មិនមាន​ការ​ហ្វឹកហាត់​តាម​ទីសាធារណៈ​ដូច​មុន​ឡើយ ដោយសារ​សហព័ន្ធ​ទទួល​បាន​ទីតាំង​ហ្វឹកហាត់​ល្អ និង​ស្ថិតក្នុង​កម្រិត​ស្តង់ដារ​ដែល​ជា​អំណោយ​របស់​លោក​ជា ប៊ុនហេង ទីប្រឹក្សា​សម្តេច​ស ខេង និង​ជា​ប្រធាន​អង្គភាព​កីឡា​ក្រសួង​មហាផ្ទៃ»៕

0

Comments

Please, login or register to post a comment