ភ្នំពេញៈ សហព័ន្ធកីឡាជាតិ ចំនួន ៣៣ សុទ្ធតែទទួលបានសិទ្ធិរៀបចំការប្រកួតជើងឯកថ្នាក់ជាតិ ដោយស្វ័យប្រវត្តិ នៅឆ្នាំ ២០១៨ ក្រោមកញ្ចប់ថវិកាពីក្រសួងអប់រំ យុវជន និងកីឡា ប៉ុន្តែបើសហព័ន្ធណា មិនបានរៀបចំការប្រកួតថ្នាក់ជាតិឬធ្វើសកម្មភាពទៅតាមកម្មវិធីរបស់ខ្លួន គឺក្រសួង អាចនឹងដកថវិកាយកទៅវិញ និងឈប់គាំទ្រ ដល់សកម្មភាពសហព័ន្ធនោះ។
លោក ហ៊ុន សាមុត ប្រធាននាយកដ្ឋានអប់រំកាយ និងកីឡា បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «សហព័ន្ធកីឡាជាតិ (ទាំង ៣៣) ត្រូវតែចាយលុយ និងរៀបចំការប្រកួតនេះហើយ ព្រោះបើក្រសួងឲ្យលុយហើយ បែរជាមិនរៀបចំការប្រកួត ឬធ្វើសកម្មភាពរបស់ខ្លួន គឺមានតែសហព័ន្ធនោះ អត់ដើរ»។
លោកបញ្ជាក់ថា៖ «ការទម្លាក់ថវិកាទៅឲ្យសហព័ន្ធកីឡាជាតិទាំងនេះធ្វើសកម្មភាព គឺក្រសួង មានការចុះកិច្ចព្រមព្រៀងគ្នាជាមួយសហព័ន្ធ អ៊ីចឹងបើសហព័ន្ធអត់ដើរ ក្រសួងអាចនឹងដកថវិកាទាំងនោះមកវិញ ហើយនៅឆ្នាំក្រោយទៀត យើងអត់គាំទ្រទៀតទេ បើសិនជាសហព័ន្ធណាមួយអត់អនុវត្តតាមកម្មវិធីរបស់ខ្លួន នៅឆ្នាំនេះ»។
សហព័ន្ធកីឡាជាតិទាំង ៣៣ ដែលទទួលបានសិទ្ធិរៀបចំការប្រកួតជើងឯកថ្នាក់ជាតិ នៅឆ្នាំនេះមាន សូហ្វតិន្នីស ទាញព្រ័ត្រ ស្គីទឹកកក ការ៉ាតេ បាល់ទាត់ (អាយុក្រោម ១៥ ឆ្នាំ និងក្រោម ១៧ ឆ្នាំ) វូស៊ូ វាយកូនបាល់ សីដក់ ល្បុក្កតោ វាយកូនឃ្លីលើតុ ប៉េតង់ ចំបាប់ បាល់ឱប កាយសម្ព័ន្ធ វ៉ូវីណាម អត្តពលកម្ម តេក្វាន់ដូ (ITF) ប្រដាល់សកល បេស្បល ហែលទឹក វាយសី បាល់ទះ សូរិនហ្ស៊ិកាំប៉ូ តុងហ្គីលម៉ូដូ យូដូ បាញ់កាំភ្លើង ទ្រីយ៉ាត្លុង ទោចក្រយាន តេក្វាន់ដូ (WTF) បាល់បោះ គុនដាវ កីឡាឡើងភ្នំ និងទូកប្រពៃណីខ្នាតអន្តរជាតិ និងកានូ កាយ៉ាក់។ នេះបើតាមការជូនដំណឹងរបស់ក្រសួងអប់រំ ដែលបានចេញជាផ្លូវការ កាលពីថ្ងៃទី ១២ ខែកុម្ភៈ។
តាមការជូនដំណឹងដដែលនេះ ឲ្យទៀតថា ការប្រកួតជ្រើសរើសជើងឯកថ្នាក់ជាតិ ឆ្នាំ ២០១៨ នេះ នឹងចាប់ផ្តើមធ្វើពីថ្ងៃទី ២០ ខែមីនាតទៅ នឹងគ្រោងបញ្ចប់នៅថ្ងៃទី ១០ ខែធ្នូ ហើយការប្រកួតភាគច្រើន ត្រូវធ្វើនៅរាធានីភ្នំពេញ ប៉ុន្តែការប្រកួតទាញព្រ័ត្រ និងកីឡាឡើងភ្នំធ្វើនៅខេត្តសៀមរាប។ ការប្រកួតបាល់ទាត់អាយុក្រោម ១៥ ឆ្នាំ និងក្រោម ១៧ ឆ្នាំ ធ្វើនៅភ្នំពេញផង និងតាមខេត្តផង ចំបាប់ ធ្វើនៅខេត្តកណ្តាល បេស្បល ធ្វើនៅខេត្តកំពង់ធំ ទូកប្រពៃណីខ្នាតអន្តរជាតិ និងកានូ កាយ៉ាក់ ធ្វើនៅខេត្តកណ្តាល ហើយទ្រីយ៉ាត្លុង និងកីឡា ទោចក្រយាន ធ្វើនៅខេត្តកែប។
សហព័ន្ធកីឡាសូហ្វតិន្នីសកម្ពុជា នឹងបើកការប្រកួតមុនគេ ដោយត្រូវធ្វើពីថ្ងៃទី ២០ ដល់ទី ២៤ ខែមីនា បន្ទាប់មកកីឡាទាញព្រ័ត្រ ពីថ្ងៃទី ១ ដល់ទី ៥ ខែមេសា កីឡាស្គីទឹកកក ពីថ្ងៃទី ៤ ដល់ទី ៧ ខែមេសា កីឡាការ៉ាតេ នៅថ្ងៃទី ៦ ខែមេសា កីឡាបាល់ទាត់អាយុក្រោម ១៥ និងក្រោម ១៧ ឆ្នាំ ពីថ្ងៃទី ១៧ ខែឧសភា ដល់ថ្ងៃទី ៣ ខែកញ្ញា។
កីឡាវាយកូនបាល់ ពីថ្ងៃទី ២៦ ដល់ទី ៣០ ខែមិថុនា កីឡាសីដក់ ពីថ្ងៃទី ១ ដល់ទី ៧ ខែកក្កដា កីឡាល្បុក្កតោ ពីថ្ងៃទី ៦ ដល់ទី ៩ ខែកក្កដា កីឡាវាយកូនឃ្លីលើតុ ពីថ្ងៃទី ១០ ដល់ទី ១៣ ខែកក្កដា កីឡាប៊ូល និងប៉េតង់ ពីថ្ងៃទី ២៥ ដល់ទី ២៩ ខែកក្កដា កីឡាបាល់ឱប ពីថ្ងៃទី ៩ ដល់ទី ១៤ ខែកញ្ញា។
ចំណែកកីឡាកាយសម្ព័ន្ធ ពីថ្ងៃទី ១៣ ដល់ ១៨ ខែកញ្ញា វ៉ូវីណាម ពីថ្ងៃទី ១៤ ដល់ទី ១៧ ខែកញ្ញា អត្តពលកម្ម ពីថ្ងៃទី ១៨ ដល់ទី ២៤ ខែកញ្ញា តេក្វាន់ដូ (ITF) ពីថ្ងៃទី ២៦ ដល់ទី ៣០ ខែកញ្ញា ប្រដាល់សកល ពីថ្ងៃទី ១៦ ដល់ទី ១៩ ខែតុលា បេស្បល ពីថ្ងៃទី ២៤ ដល់ទី ២៧ ខែតុលា ហែលទឹក ពីថ្ងៃទី ១ ដល់ទី ៥ ខែតុលា វាយសី ពីថ្ងៃទី ១៥ ដល់ទី ២០ ខែតុលា កីឡាបាល់ទះ ពីថ្ងៃទី ១ ដល់ទី ៨ ខែតុលា កីឡាសូរិនហ្ស៊ិកាំប៉ូ ពីថ្ងៃទី ២៤ ដល់ទី ២៨ ខែតុលា កីឡាតុងហ្គីលម៉ូដូ ពីថ្ងៃទី ២៦ ដល់ទី ២៩ ខែតុលា។
ចំពោះកីឡាយូដូ ពីថ្ងៃទី ២៧ ដល់ទី ៣១ ខែតុលា កីឡាទូកប្រពៃណីខ្នាតអន្តរជាតិ និងកានូ កាយ៉ាក់ ពីថ្ងៃទី ២៦ ដល់ទី ៣១ ខែតុលា កីឡាបាញ់កាំភ្លើង ពីថ្ងៃទី ៦ ដល់ទី ៨ ខែវិច្ឆិកា ទ្រីយ៉ាត្លុង ពីថ្ងៃទី ៩ ដល់ទី ៨ ខែវិច្ឆិកា កីឡាទោចក្រយាន ពីថ្ងៃទី ៩ ដល់ទី ១១ ខែវិច្ឆិកា កីឡាតេក្វាន់ដូ (WTF) ពីថ្ងៃទី ៩ ដល់ទី ១២ វិច្ឆិកា កីឡាបាល់បោះ ពីថ្ងៃទី ២ ដល់ទី ១៧ ខែធ្នូ កីឡាគុនដាវ ពីថ្ងៃទី ៨ ដល់ទី ៩ ខែធ្នូ និងកីឡាឡើងភ្នំ នឹងធ្វើពីថ្ងៃទី ៧ ដល់ទី ១០ ខែធ្នូ៕