ភ្នំពេញ: ការសម្រេចសេចក្តីរបស់គណៈកម្មការនៃសង្វៀនអាស៊ីអាគ្នេយ៍ឲ្យកីឡាករកម្ពុជាមឿន សុខហ៊ុច ទទួលលទ្ធផលស្មើជាមួយកីឡាករថៃ Yort Sensak ក្នុងការប្រកួតល្ងាចថ្ងៃអាទិត្យ ទី ២៨ ខែមករា ឆ្នាំ ២០១៨ បានធ្វើឲ្យមហាជនអ្នកទស្សនាភាគច្រើនលាន់មាត់ថា ជាទង្វើអាក្រក់ភ្នែកបំផុត ដែលនាំឲ្យអាប់ឱនខ្លាំងដល់កិត្តិយស និងសេចក្តីថ្លៃថ្នូរនៃប្រដាល់គុនខ្មែររបស់ជាតិទាំងមូល។
លទ្ធផលស្មើត្រូវបានប្រកាសឡើង បើទោះបីមឿន សុខហ៊ុច បានចាញ់ប្រៀបទាំងផ្នែកកម្លាំង និងបច្ចេកទេសរបស់ថៃ ក្រោយពីកីឡាករថៃរូបនេះ បានទាត់ផ្កាប់ចានឲ្យអាជ្ញាកណ្តាលរាប់។
ជាមួយគ្នានេះ កីឡាករយុគ យក្សគីល មកពីក្លិបរាជសីហ៍កងចក្រ ដែលឃ្លាតពីសង្វៀនជាង ៦ ឆ្នាំនោះ បានវិលមកប្រកួត មុននឹងចាញ់កីឡាករថៃ Phiem Sayam ដោយពិន្ទុក្នុងការតស៊ូស្វិតស្វាញប្រកួតចំនួន ៥ ទឹកពេញ។ មឿន សុខហ៊ុច ២ ប្រកួតចុងក្រោយក្នុងខែមករានេះ ប្រកួតស្មើជាមួយកីឡាករថៃទាំង ២ លើក ហើយអ្នកទស្សនាភាគច្រើនបានកត់សម្គាល់ថា គណៈកម្មការប្រកួតហាក់បីដូចលើកស្ទួយសុខហ៊ុច ខ្លាំងណាស់ ទោះបីចាញ់ប្រៀបកីឡាករថៃក៏ដោយ។
ក្នុងការប្រកួតកាលពីល្ងាចថ្ងៃអាទិត្យនេះ កីឡាករមឿន សុខហ៊ុច មានប្រៀបលើកីឡាករថៃ Yort Sensak ក្នុងទឹកទី ១ និងទឹកទី ៣ បន្តិចបន្តួច ប៉ុន្តែចាញ់ប្រៀបកីឡាករថៃដាច់ចំនួន ៣ ទឹកគឺទឹកទី ២ ទី ៤ និងទី ៥ ពិសេសក្នុងទឹកទី ២ កីឡាករ Yort Sensak បានទាត់ផ្កាប់ចានបណ្តាលឲ្យដួល និងក្រោកវិញទាំងលំបាក ក្រោយពីអាជ្ញាកណ្តាលលោកម៉ាក់ សាមឿន បានរាប់ចំនួន ៨ ទើបងើបមកប្រកួតបាន។ នៅទឹកទី ៣ សុខហ៊ុច មានប្រៀបផ្នែកជង្គង់បានខ្លះនៅចុងទឹក ដោយប្រឹងប្រែងអស់ពីសមត្ថភាព ប៉ុន្តែនៅ ២ ទឹកចុងក្រោយចាញ់កម្លាំងកីឡាករថៃ និងបានដួលញឹកញាប់ទៀតផង។ ទោះជាយ៉ាងណា ចប់ការប្រកួត ៥ ទឹកពេញ គណៈវិនិច្ឆ័យបានប្រកាសឲ្យមឿន សុខហ៊ុច ស្មើជាមួយ Yort Sensak។
លោករាជ សុផែន ប្រធានវិនិច្ឆ័យប្រចាំសង្វៀនអាស៊ីអាគ្នេយ៍មិនអាចសុំការពន្យល់ពីបច្ចេកទេសដាក់ពិន្ទុពីសំណាក់ចៅក្រមទាំង ៥ នេះបានទេ ហើយលទ្ធផលពិន្ទុក៏មិនត្រូវបានបង្ហាញឲ្យដឹងឡើយ។
លោកញាន សុធី នាយកគ្រប់គ្រងកម្មវិធីប្រចាំសង្វៀននេះ បានបញ្ជាក់ថា លោកមិនគ្រប់គ្រងខាងបច្ចេកទេសនោះទេ គឺមន្ត្រីខាងសហព័ន្ធកីឡាប្រដាល់គុនខ្មែរ ប៉ុន្តែ បានទទួលស្គាល់ថា៖ «តាមខ្ញុំមើលឃើញគឺសុខហ៊ុច ចាញ់ប្រៀបកីឡាករថៃ Yort Sensak មែន ប៉ុន្តែ ក៏មិនមែនចាញ់ដាច់នោះទេ»។
លោកបានបន្ថែមទៀតថា៖ «ខ្ញុំគិតថាឲ្យស្មើគឺល្អ ពីព្រោះជាការប្រកួតមិត្តភាព ហើយក៏បានលើកទឹកចិត្តដល់ការប្រឹងប្រែងរបស់មឿន សុខហ៊ុច ផងដែរ ដើម្បីត្រៀមខ្លួនបន្ត ប៉ុន្តែ យើងនឹងសុក្រឹត និងយុត្តិធម៌ ពេលប្រកួតខ្សែក្រវាត់»៕