ភ្នំពេញ: ការប្រកួតប្រដាល់គុនខ្មែរដណ្តើមខ្សែក្រវាត់គូបូតាទម្ងន់ ៥៧ គីឡូក្រាមនៃសង្វៀនបាយ័នរាល់ល្ងាចថ្ងៃសុក្រ បានរកឃើញជើងខ្លាំងជំនាន់ថ្មីវ័យក្មេងចំនួន ២ នាក់ ក្រោយពីគឺឡុង ជិន មកពីក្លិបខ្លារខិននៃក្រសួងមហាផ្ទៃ និងកីឡាករសុខ ធី មកពីក្លិបសៅយ៉ាន់នាគា ខេត្តបន្ទាយមានជ័យ បានឡើងទៅវគ្គពាក់កណ្តាលផ្តាច់ព្រ័ត្រជាមួយកីឡាករថៃ ២ នាក់ទៀតមកពីពូល B ដែលមិនទាន់កំណត់បាននៅឡើយ។
ទាំង សុខ ធី និងឡុង ជិន បានឆ្លងកាត់ការប្រកួតក្នុងអំឡុងខ្សែក្រវាត់ចំនួន ៤ លើកដូចគ្នាជាមួយកីឡាករថៃ និងសុទ្ធតែទទួលបានជ័យជម្នះគួរឲ្យកោតសរសើរ ក្រោយពីបានបង្ហាញឲ្យឃើញពីសមត្ថភាពរបស់ពួកគេក្នុងនាមអ្នកប្រដាល់ជំនាន់ក្រោយវ័យក្មេង ស្ទើរតែគូប្រៀបក្នុងចំណោមកីឡាករទម្ងន់ស្មើគ្នាក្នុងស្រុក។
តាមរយៈការប្រកួតចំនួន ៤ លើកជាមួយថៃដូចគ្នា ពួកបានឈ្នះទាំង ៤ លើក មាន ១២ ពិន្ទុទទួលបានឱកាសបានឡើងទៅវគ្គពាក់កណ្តាលផ្តាច់ព្រ័ត្របន្តជាមួយកីឡាករថៃ ២ នាក់ទៀតមកពីពូល B។
ជាមួយគ្នានេះកីឡាករជើងខ្លាំងចាស់វស្សាកម្ពុជាចំនួន ២ នាក់ទៀតក្នុងពូល A រួមមាន ពេជ្រ ម្ទេសខ្មាំង មកពីក្លិបអរុណរះ និងចាន់ ស៊ីណាត មកពីនិរោធមានជ័យ មិនមានពិន្ទុគ្រប់គ្រាន់ដើម្បីឡើងទៅវគ្គបន្តបាននោះឡើយដោយរូបមន្តប្រកួតតម្រូវយកតែ ២ នាក់ប៉ុណ្ណោះក្នុងពូលនីមួយៗ។
ភាពរីកចម្រើនខាងវិជ្ជាគុនរបស់សុខ ធី និងឡុង ជិន បានទទួលនូវការកោតសរសើរជាច្រើន ហើយជាមួយនឹងការមានសមត្ថភាពដ៏ល្អ ព្រមទាំងកាយសម្បទាល្អ អាយុនៅក្មេង និងប្រវត្តិប្រកួតកន្លងមកធ្លាប់ឈ្នះជើងខ្លាំងៗជាច្រើននោះ ពួកគេនឹងក្លាយទៅជាជើងខ្លាំងក្នុងប្រដាល់គុនខ្មែរសម្រាប់តំណាងប្រទេសនាពេលខាងមុខ។
ប្រសិនបើក្នុងវគ្គពាក់កណ្តាលផ្តាច់ព្រ័ត្រ ពួកគេទាំង២ឆ្លងផុតឈ្នះកីឡាករថៃដូចគ្នានោះ ពួកគេនឹងជួបគ្នាដណ្តើមយកខ្សែក្រវាត់គូបូតាទម្ងន់ ៥៧ គីឡូក្រាមដែលអមទៅដោយទឹកប្រាក់ជាច្រើន។ទោះជាសមត្ថភាពរបស់អ្នកប្រដាល់ទាំង ២ នេះកំពុងមានសមត្ថភាពល្អ វ័យក្មេង និងមានប្រិយភាពខ្ពស់ក៏ដោយ ប៉ុន្តែនៅក្នុងបញ្ជីឈ្មោះក្រុមជម្រើសជាតិគុនខ្មែរទាំងឈុតថ្នាល និងឈុតធំ កីឡាករទាំង ២ មិនស្ថិតក្នុងជម្រើសជាតិប្រមូលផ្តុំរបស់ ក្រសួងអប់រំ យុវជន និងកីឡា នៅឡើយទេ សម្រាប់ឆ្នាំ ២០១៨។
សុខ ធី មានទីផ្សារប្រកួតច្រើននៅសង្វៀនប្រទេសថៃ និងធ្លាប់ផ្តួលកីឡាករជើងខ្លាំងនៅប្រទេសថៃបានញឹកញាប់ ប៉ុន្តែសម្រាប់សង្វៀនក្នុងស្រុកខ្មែរ រូបគេហាក់បីដូចមានការប្រកួតតិចតួចនៅឡើយ។ លោកសាន់ សៅយ៉ាន់ គ្រូបង្វឹក បាននិយាយថា៖ «ទីផ្សារប្រកួតនៅប្រទេសថៃ សុខ ធី ជាកីឡាករឆ្នើមមានតម្លៃខ្លួនប្រកួតថ្លៃច្រើនជាងក្នុងស្រុកជិត ៤ ដង ហើយសុខ ធី ជាប់កុងត្រាជាច្រើនប្រកួតក្នុងមួយឆ្នាំៗនៅសង្វៀនប្រទេសថៃ»៕