ភ្នំពេញ: ផង់ សុភាព មកពីក្លិបតាឡីមានឫទ្ធិ ដែលបានចាញ់កីឡាករថៃសន្លប់យ៉ាងលឿនក្នុងទឹកទី ១ កាលពីខែធ្នូ ឆ្នាំ ២០១៧ នោះ ត្រូវផ្គូផ្គងដាក់ឲ្យប្រកួតជាមួយកីឡាករថៃចំណូលថ្មី Sen Khoum ក្នុងទម្ងន់ ៦៥ គីឡូក្រាម ដើម្បីស្វែងរកជ័យជម្នះស្តារមុខមាត់ឡើងវិញ។
ចំណែក ឃីម បូរ៉ា មកពីខេត្តបន្ទាយមានជ័យ ត្រូវបានដាក់ឲ្យប្រកួតជាមួយកីឡាករចាស់វស្សាមកពីប្រទេសថៃ Reda ដែលមានអាយុច្រើន និងជាកីឡាករធ្លាប់ប្រកួតជាមួយមួយឪពុករបស់គេគឺលោកហេង ប៊ុនឃីម កាលពីជាង ១០ ឆ្នាំមុនមកម្ល៉េះ។
ការប្រកួតគូមិត្តភាពអន្តរជាតិ ២ គូនេះនឹងប្រកួតគ្នានៅសង្វៀនអាស៊ីអាគ្នេយ៍ នៅរសៀលថ្ងៃអាទិត្យ ទី ១៤ ខែមករា ឆ្នាំ ២០១៨ ក្រោមការឧបត្ថម្ភពីស្រាបៀរ Barrley Black។ ដៃគូរបស់ផង់ សុភាព គឺ Sen Khoum ជាកីឡាករថ្មីមិនធ្លាប់មកប្រកួតស្រុកខ្មែរទេ។
តាមស្ថិតិដែលភ្នំពេញប៉ុស្តិ៍ទទួលបានពីគណៈកម្មការ ផ្គូផ្គង Sen Khoum មានកម្ពស់ ១,៦៥ ម៉ែត្រ ធ្លាប់ប្រកួតបានចំនួន ៦៦ លើក ឈ្នះ ៥៩ លើក ចាញ់ ៦ លើក និងស្មើ ១ លើក។
លោកគ្រូបង្វឹកថៃ Tham Valek បានឲ្យដឹងថា៖ «Sen Khoum ជាជើងខ្លាំងមួយរូប ល្អទាត់ និងជង្គង់ ប៉ុន្តែអាចលំបាកទប់ទល់ជាមួយផង់ សុភាព ត្រង់ស្នៀតកែងរូសនេះតែម្តង»។
ផង់ សុភាព បាននិយាយថា៖ «ប្រកួតនៅសប្តាហ៍នេះ នឹងប្រឹងយកឈ្នះឲ្យបានដើម្បីស្តារមុខមាត់ឡើងវិញ»។
កីឡាកររូបនេះបានប្រាប់បន្តថា៖ «ការប្រកួតចាញ់កីឡាករថៃ Phlay Noy ក្នុងដើម្បីទឹកទី ១ នោះ ជារឿងដែលខ្ញុំសោកស្តាយបំផុត និងមិនធ្លាប់មានសោះសម្រាប់អាជីពប្រដាល់របស់ខ្ញុំ។ ការប្រកួតលើកនេះ ខ្ញុំត្រៀមបានល្អ និងសង្ឃឹមឈ្នះថៃ ៩០ ភាគរយ»។
លោកម៉ាក់ សុខន គ្រូបង្វឹក បាននិយាយថា៖ «ខ្ញុំមានជំនឿថា ផង់ សុភាព អាចស្តារមុខមាត់បានឡើងវិញ ដោយការហ្វឹកហាត់បានល្អប្រសើរ និងធានាវាយអស់ពីសមត្ថភាព»។
ចំណែក Reda ធ្លាប់ឈ្នះអតីតកីឡាករហេង ប៊ុនឃីម ជាឪពុករបស់ឃីម បូរ៉ា ហើយថ្មីៗកន្លងមកនេះ ឃីម បូរ៉ា ក៏ធ្លាប់ចាញ់កីឡាករថៃ Reda ផងដែរ។ Reda ទោះបីមានអាយុជាង ៤០ ឆ្នាំទៅហើយ ប៉ុន្តែកម្លាំងថាមពលអាចប្រកួតបាន ៥ ទឹក និងរឹងមាំល្អណាស់ ខណៈដៃគូប្រកួតទាត់គេមិនស្រុតនោះឡើយ។
កីឡាករថៃរូបនេះ មានកម្ពស់ ១,៦៤ ម៉ែត្រ ប្រកួតបានច្រើនណាស់ ប៉ុន្តែចុះបញ្ជីបានចំនួន ១០៨ លើក ឈ្នះ ៩២ លើក ចាញ់តែ ១៥ និងធ្លាប់ស្មើ ១ លើក។
កីឡាករវ័យក្មេងឃីម បូរ៉ា មានអាយុត្រឹម ២០ ឆ្នាំ កម្ពស់ ១,៦៨ ម៉ែត្រ ធ្លាប់ប្រកួតបានចំនួន ១០១ លើក ឈ្នះ ៧៦ លើកចាញ់ ២៣ លើក និងស្មើ ២ លើក មកពីក្លិបភូមិគាប ខេត្តបន្ទាយមានជ័យ។
លោកហេង ប៊ុនឃីម គ្រូបង្វឹក និងជាឪពុកបង្កើត បាននិយាយថា៖ «ការហ្វឹកហាត់បានល្អ ប៉ុន្តែលំបាកឈ្នះ ខណៈដែលកីឡាករថៃរូបនេះមានភាពអំណត់ និងរឹងមាំណាស់ មិនងាយផ្តួលបានឡើយ៕