ភ្នំពេញ: កីឡាករវ៉េង សុភ័ក្ត្រ បានស្តារមុខមាត់ឡើងវិញ តាមរយៈការយកឈ្នះជើងខ្លាំងថៃ Den Phichhith ដោយពិន្ទុ ដើម្បីទទួលបាន ៣ ពិន្ទុបន្ថែម ក្នុងការប្រកួតប្រដាល់គុនខ្មែរដណ្តើមខ្សែក្រវាត់ Barrley Black ទម្ងន់ ៦៣,៥ គីឡូក្រាមរដូវកាលទី ២ វគ្គជម្រុះសន្សំពិន្ទុកាលពីល្ងាចថ្ងៃអាទិត្យ ទី ២៥ ខែកុម្ភៈ ឆ្នាំ ២០១៨ នៃសង្វៀនអាស៊ីអាគ្នេយ៍។
ចំណែកកីឡាករឌុម កែវដា បានបន្តចាញ់កីឡាករជើងខ្លាំងថៃ Loom Leng ដោយពិន្ទុបន្ទាប់ពីតស៊ូប្រកួតគ្នាពេញ ៥ ទឹក ហើយជ័យជម្នះរបស់គេនេះសុទ្ធតែមានលក្ខណៈតឹងតែងដូចគ្នា។ ក្នុងការប្រកួតនេះ វ៉េង សុភ័ក្ត្រ មកពីក្លិបទ័ពឆត្រយោង ៩១១ មានប្រៀបឈ្នះសឹងតែគ្រប់ទឹកទៅលើកីឡាករថៃ ពោលគឺចាប់ពីទឹកទី ២ រហូត ទឹកទី ៥ ខណៈដែលទឹកទី ១ មានភាពប្រហាក់ប្រហែលគ្នា។
វ៉េង សុភ័ក្ត្រ ប្រើស្នៀតទាត់ជង្គង់ និងធាក់ចេញការពារបានល្អដោយគេចផុតពីស្នៀតកណ្តាប់ដៃរបស់ជើងខ្លាំង Den Phichhith។ ទោះជាយ៉ាងណា ក្នុងទឹកទី ៣ និងទឹកទី ៤ កណ្តាប់ដៃរបស់ Den Phichhith បានវាយចូល ២ ដៃធ្ងន់ៗបណ្តាលឲ្យកីឡាករកម្ពុជាយ៉ាប់ម្តងៗដែរ ប៉ុន្តែ នៅតែមានប្រៀបដោយសារតែ សុ័ភ័ក្ត្រ វាយបានល្អចំនួន ៣ ទឹកកន្លងមក។
លទ្ធផលផ្លូវការពីសំណាក់ចៅក្រមទាំង ៥ និងការសម្រេចពីគណៈកម្មាធិការបច្ចេកទេសបានប្រកាសជាផ្លូវការ ដើម្បីឲ្យ វ៉េង សុភ័ក្ត្រ ឈ្នះពិន្ទុជាឯកច្ឆន្ទ ៥ ទល់នឹង ០ ដើម្បីទទួលបាន ៣ ពិន្ទុបន្ថែម។
ចំណែកកីឡាករឌុម កែវដា មកពីក្លិបមកុដរាជសីហ៍នៃក្រសួងមហាផ្ទៃ មិនអាចស្វែងរក ៣ ពិន្ទុបានទេ ក្រោយពីបានចាញ់កីឡាករ Loom Leng ដោយពិន្ទុក្នុងការតស៊ូប្រកួតបានចំនួន ៥ ទឹកពេញយ៉ាងស្វិតស្វាញ។
ឌុម កែវដា មានប្រៀបនៅទឹកទី ២ និងទឹកទី ៣ ប៉ុន្តែបានចាញ់ប្រៀបកីឡាករថៃ នៅទឹក ៤ ដោយអាជ្ញាកណ្តាលលោកឡុង វិបុល បានរាប់ទៅលើឌុម កែវដា នៅទឹកទី ៤ បន្ទាប់ពីទទួលរងការទាត់ចូលក្បាលឲ្យដួលនោះ។
ឌុម កែវដា បានវាយស្តារបានពិន្ទុមកវិញខ្លះដែរ ប៉ុន្តែអ្វីៗហាក់បីដូចខកពេលអស់ទៅហើយដោយមិនអាចផ្តួលឲ្យកីឡាករថៃ Loom Leng ឲ្យសន្លប់បាន។ ចប់ការប្រកួត ចៅក្រមទាំង ៥ ផ្តល់ឲ្យកីឡាករថៃឈ្នះពិន្ទុដោយឯកច្ឆន្ទ ៥ ទល់នឹង ០។
ឌុម កែវដា បាននិយាយថា៖ «ខ្ញុំមានការខកចិត្តដោយសារការប្រកួតចាញ់ទាំង ២ លើក។ ខ្ញុំប្រឹងវ៉ៃអស់ពីសមត្ថភាព ហើយមានប្រៀបផងដែរ ប៉ុន្តែភ្លាត់ស្នៀតចាញ់ថៃត្រឹមរាប់ប៉ុណ្ណោះក្រៅពីនេះខ្ញុំធ្វើបានល្អ»។
ជាមួយគ្នានេះ ពុយ វណ្ណៈ មកពីក្លិបឃ្លាំងមឿងខេត្តពោធិ៍សាត់ ឈ្នះ ចេង គា ក្លិបវិបុលជារិទ្ធិពោធិ៍សែនជ័យ ក្នុងទម្ងន់ ៦៣,៥ គីឡូក្រាម ដោយពិន្ទុ៕