.jpg)
កីឡាករថៃ Kolap Dam (ស្តាំ) និង Luok Ton។ សហការី
ភ្នំពេញ: ការប្រកួតប្រដាល់គុនខ្មែរវគ្គជម្រុះសន្សំពិន្ទុដណ្តើមខ្សែក្រវាត់ Barrley Black ទម្ងន់ ៦៥ គីឡូក្រាម នឹងឈានចូលដល់សប្តាហ៍ទី ៦ វគ្គជម្រុះ ជុំទី ៣ នាថ្ងៃអាទិត្យ ទី ១៨ ខែមីនា ឆ្នាំ ២០១៨ របស់សង្វៀនអាស៊ីអាគ្នេយ៍។
វេង សុ័ក្ត្រ របស់កម្ពុជា មកពីក្លិបកងទ័ពឆត្រយោង ៩១១ ត្រូវដល់វេនប៉ះជើងខ្លាំងកីឡាករថៃ Kolap Dam ដែលជាការប្រកួតមួយលំបាកឈ្នះបំផុត ប៉ុន្តែ ឌុម កែវដា មកពីក្លិបមកុដរាជសីហ៍ អាចនឹងជួបការប្រកួតងាយស្រួលជាងនេះ ខណៈដែលរូបគេត្រូវប៉ះជាមួយនឹង Louk Ton ដែលគួរតែមិនមានជាឧបសគ្គធំឡើយ។
យោងទៅតាមទិន្នន័យប្រកួតចំនួន ២ លើកកន្លងមកក្នុងរង្វង់ខ្សែក្រវាត់នេះ វេង សុភ័ក្ត្រ ឈ្នះ ១ ប្រកួត ចាញ់ ១ ប្រកួត មាន ៤ ពិន្ទុ ឈរក្នុងលំដាប់លេខ ៣ ក្នុងពូលកីឡាករខ្មែរ បន្ទាប់ពីកីឡាករផាន់ គ្រាន់ និងមាស ច័ន្ទមាន ខណៈឌុម កែវដា ចាញ់ទាំង ២ ប្រកួត មាន ២ ពិន្ទុឈរនៅបាតតារាង។ ទោះជាយ៉ាងនេះក្តី សម្រាប់ការប្រកួតរវាងវេង សុភ័ក្ត្រ មកពីក្លិបកងទ័ពឆត្រយោង ៩១១ ជាមួយ កីឡាករថៃ Kolap Dam មិនមែនជារឿងងាយស្រួលនោះទេ ពីព្រោះ Kolap Dam បើនិយាយពីការប្រកួតនៅស្រុកខ្មែរប្រហែលជាង ១០ លើក ទើបតែចាញ់មួយលើកប៉ុណ្ណោះ ពោលគឺចាញ់ផាន់ គ្រាន់ ទាំងប្រផិតប្រផើយកាលពីថ្ងៃ ៤ ខែមីនា ឆ្នាំ ២០១៨ ហើយក្រៅពីនេះឈ្នះទាំងអស់។
Kolap Dam មានកម្ពស់ខ្ពស់ល្អក្បាច់ជង្គង់ និងទាត់ល្អ ប៉ុន្តែ វាយឆ្មក់មួយៗតាមបច្ចេកទេស មិនឆេវឆាវវាយសម្រុកខ្លាំងពុះកញ្ជ្រោលនោះឡើយ។ វេង សុភ័ក្ត្រ ជាកីឡាករវ័យក្មេងចិត្តធំ វាយសម្រុកមិនដកថយ ប៉ុន្តែចាញ់ប្រៀបផ្នែកកម្ពស់ និងក្បាច់ជង្គង់។ តាមការវាយតម្លៃព្យាករក្រៅផ្លូវការពីអ្នកទស្សនាភាគច្រើន Kolap Dam ត្រូវបានរំពឹងទុកថា មានប្រៀបឈ្នះច្រើនជាង។
លោកហង់ សឿន គ្រូបង្វឹក វេង សុភ័ក្ត្រ បាននិយាយថា៖ «រឿងចាញ់ ឬឈ្នះមិនអាចនិយាយមុនបានទេ ពីព្រោះកូនសិស្សរបស់ខ្ញុំធានាថា ឡើងទៅដឹងតែពីវាយអស់ពីសមត្ថភាព ប៉ុន្តែលទ្ធផលយ៉ាងណា មិនហ៊ានទស្សន៍ទាយមុនឡើយ»។
លោកបន្តថា៖ «ទោះបីជាដៃគូគឺកីឡាករថៃនោះល្អ ប៉ុន្តែយើងមិនបោះបង់ចោលការព្យាយាមនោះឡើយ ដោយការប្រកួតវាយអស់ពីសមត្ថភាពក្នុងបំណងយកឈ្នះឲ្យបាន»។
ការប្រកួតគូទៀតឌុម កែវដា ជាមួយ Louk Ton ២ ប្រកួតកន្លងមកចាញ់ ២ លើកដូចគ្នា។ ឌុម កែវដា មួយរយៈនេះការប្រកួតធ្លាក់ចុះ ដោយប្រកួតចាញ់ទាំងក្នុងរង្វង់ដណ្តើមខ្សែក្រវាត់នេះ និងការប្រកួតមិត្តភាពអន្តរជាតិផ្សេងទៀត។
ទោះជាយ៉ាងណាសម្រាប់ការជួបជាមួយកីឡាករថៃ Louk Ton ឌុម កែវដា គួរតែមិនជួបឧបសគ្គធ្ងន់ធ្ងរនោះទេ អាចនិយាយថា ការប្រកួតធូរស្រាលជាងមុន៕
