.jpg)
លោកអាជ្ញាកណ្តាល បានលើកដៃ វ៉េង សុភ័ក្រ និង Kolap Dam ឲ្យស្មើពិន្ទុគ្នា កាលពីថ្ងៃអាទិត្យ។ យឺន ពន្លក
ភ្នំពេញៈ កីឡាករ សូត្រ ប៊ុនធី មកពីក្លិបបក្សីស្លាបដែកនៃក្រសួងមហាផ្ទៃ បានបន្តយកឈ្នះថៃ PhayakLek ដោយពិន្ទុទាំងត្រដាបត្រដួស សម្រាប់ការប្រកួតប្រដាល់គុនខ្មែរអន្តរជាតិ នៅលើសង្វៀន SEATV កាលពីល្ងាចថ្ងៃអាទិត្យ ចំណែកកីឡាករវ័យក្មេង វ៉េង សុភ័ត្រ របស់ក្លិបកងទ័ពឆត្រយោង ៩១១ បានត្រឹមស្មើជាមួយជើងខ្លាំងរបស់ថៃ Kolap Dam ក្នុងទម្ងន់ ៦៣,៥ គីឡូក្រាម។
មួយរយៈនេះ សូត្រ ប៊ុនធី ប្រកួតមិនដែលចាញ់ទេ ហើយជាង ៣ ឆ្នាំចុងក្រោយនេះរូបគេ បានឱកាសប្រកួតនឹងកីឡាករបរទេសជានិច្ច ហើយកាលដើមខែមករា ឆ្នាំ ២០១៨ នេះ សូត្រ ប៊ុនធី ក៏បានយកឈ្នះកីឡាកររុស្ស៊ី ដើម្បីទទួលបានខ្សែក្រវាត់គុនខ្មែរអន្តរជាតិ ក្នុងទម្ងន់ ៦០ គីឡូក្រាមមួយផងដែរ។
សម្រាប់ការប្រកួតលើកនេះ សូត្រ ប៊ុនធី នៅតែរក្សាបាននូវជ័យជម្នះបន្តទៀត ដោយមានប្រៀបពិន្ទុនាំមុខបន្តិចបន្តួចប៉ុណ្ណោះ ព្រោះក្នុងការប្រកួត ៥ ទឹកពេញ Phayak Lek ហាក់បីដូចវ៉ៃមិនអស់ពីសមត្ថភាព ដោយព្យាយាមដកថយច្រើនជាងការវ៉ៃលុក។
ទាក់ទងការប្រកួតមិនល្អមើលនេះ លោក ថៃ អ៊ូ ប្រតិភូនាំកីឡាករថៃមកប្រកួត បាននិយាយថា៖ «យើងមិនអាចដឹងពីទឹកចិត្តប្រកួតរបស់វា បានទេ ប៉ុន្តែសកម្មភាពប្រកួតរបស់កីឡាករម្នាក់ ពេលខ្លះល្អ ពេលខ្លះមិនល្អ ដូចតែកីឡាករខ្មែរយើងដែរ»។
ចំណែក វ៉េង សុភ័ត្រ បានស្មើជាមួយថៃ Kolap Dam ហើយក្នុងការប្រកួតចំនួន ៥ ទឹកពេញ ពួកគេហាក់បីដូចខ្លាចគ្នា ដោយមិនសូវចូលវាយសម្រុកគ្នាខ្លាំងប៉ុន្មាននោះឡើយ។ ពីទឹកទី ១ ដល់ទឹកទី ៥ ការប្រកួតរបស់អ្នកទាំង ២ ធ្វើឲ្យអ្នកទស្សនា មិនសប្បាយចិត្តនិងបានស្រែកចំអក ពីការប្រកួតមិនល្អមើល ឬវ៉ៃហាក់ដូចជាទំនងមិនអស់ពីសមត្ថភាពនេះ។
តាមការកត់សម្គាល់ទៅលើសមត្ថភាពប្រកួត គឺកីឡាករ ថៃ Kolap Dam នេះ មានវិជ្ជាគុនល្អ ហើយធ្លាប់មកប្រកួតស្រុកខ្មែរ មិនទាន់ស្គាល់រសជាតិចាញ់ម្តងណាឡើយ ប៉ុន្តែការប្រកួតលើកនេះហាក់បីដូចមិនសូវសម្រុកខ្លាំងក្លា ដូចលើកមុនៗទេ។ ចំណែក វ៉េង សុភ័ត្រ ហាក់បីដូចខ្លាចៗមិនសូវចូលវាយសម្រុកដូចគ្នា។
ចប់ការប្រកួតចំនួន ៥ ទឹក ចៅក្រម និងប្រធានវិនិច្ឆ័យ ហាក់បីដូចលំបាក ក្នុងការផ្តល់ពិន្ទុឈ្នះ-ចាញ់ណាស់ ព្រោះសកម្មភាពប្រកួត ហាក់មិនអស់ពីសមត្ថភាព ទើបសម្រេចផ្តល់លទ្ធផលឲ្យស្មើគ្នាតែម្តង។
លោក រាជ សុផែន ប្រធានវិនិច្ឆ័យប្រចាំនៅ SEATV បាននិយាយថា៖ «តាមបច្ចេកទេស ចៅក្រមទាំង ៥ នាក់ ពិតជាលំបាកផ្តល់ពិន្ទុណាស់ គឺមិនដឹងខាងណាមានប្រៀបនោះទេ។ ហេតុនេះការផ្តល់ពិន្ទុឲ្យស្មើនេះ គឺវាសមហេតុសមផល តាមការប្រកួតរបស់ពួកគេហើយ»៕
