Search form

Login - Register | FOLLOW US ON

Logo of Phnom Penh Post newspaper Phnom Penh Post - សៀវភៅ​គុន​ល្បុក្កតោ បោះពុម្ព​ចេញ​លើកទី ១

Content image - Phnom Penh Post
លោក សាន គឹមស៊ាន បានបង្ហាញ​សៀវភៅ​គុនល្បុក្កតោ ដែល​បានបោះ​ពុម្ពរួច​​។ ស្រេង ម៉េងស្រ៊ុន

សៀវភៅ​គុន​ល្បុក្កតោ បោះពុម្ព​ចេញ​លើកទី ១

ភ្នំពេញ: ថ្នាក់ដឹកនាំ​សហព័ន្ធ​កីឡា​ល្បុក្កតោ​កម្ពុជា និងអ្នក​អភិរក្ស​គុន​ល្បុក្កតោ ជាច្រើន​នាក់ទៀត បានបើក​សន្និសីទ​កាសែត​មួយ នៅ​ទីស្នាក់ការ NOCC កាលពី​ព្រឹកថ្ងៃ​ព្រហស្បតិ៍​ម្សិលមិញ ដើម្បី​ប្រាប់ពី​ដំណឹង​ល្អមួយ​ដល់ជន​រួមជាតិ គឺការ​ចងក្រង​សៀវភៅ​គុន​ល្បុក្កតោ ភាគ ១ បាន​ជាង ៣ ពាន់ក្បាច់​ហើយ ដែល ជាស្នាដៃ​របស់​លោកតា​ក្រមា​មាស សាន គឹមស៊ាន។

លោក សាន គឹមស៊ាន បាន​បញ្ជាក់ថា៖ «នេះជា​សៀវភៅ​ព្រលឹង​ជាតិ​ល្បុក្កតោ លើកទី ១ នៅកម្ពុជា ដែល​ខ្ញុំបាន​ខិតខំ​ចងក្រង​ទាំងយប់​ទាំងថ្ងៃ គឺឲ្យ​តែភ្នែក​ខ្ញុំនៅ​បើក ខ្ញុំធ្វើ​វារាល់​ពេលវេលា​ទាំងអស់ ហេតុនេះ​បើអាច​សូម​បងប្អូន​ទាំងអស់​ជួយជាវ​សៀវភៅ​នេះ​ទុកជា​អនុស្សាវរីយ៍ ព្រោះ​ជាព្រលឹង​ជាតិ​យើង»។

លោក សាន គឹមស៊ាន ដែលជា​ស្ថាបនិក​អ្នកស្រាវជ្រាវ និង​ចងក្រង​សៀវភៅ​គុន​ល្បុក្កតោ​នេះ បាន​ប្រាប់​ភ្នំពេញ ប៉ុស្តិ៍ បន្ថែមថា៖ «មកដល់​ពេលនេះ​ខ្ញុំចងក្រង​បានជាង ៣ ពាន់ក្បាច់​ហើយ ដោយមាន​កម្រិត​ក្រមាស បៃតង ខៀវ ក្រហម ត្នោត និងខ្មៅ​ជាន់ទី ១ ដល់ទី ៣ ដោយ​ខ្ញុំបាន​ចំណាយពេល​អស់​ជាង ១០ ឆ្នាំហើយ ប៉ុន្តែគុន​ល្បុក្កតោ​មានជាង ១ ម៉ឺនក្បាច់​ឯណោះ។ ហេតុនេះ​បើចង់​ឲ្យខ្ញុំ​មាន​ពេលអាច​ចងក្រង​បាន​រួចរាល់ លុះត្រាតែ​បងប្អូន​ប្រជាពលរដ្ឋ​ខ្មែរ ចូលរួម​ជួយ​ជាវ​សៀភៅ​នេះ ដើម្បីឲ្យ​ជីវភាព​រស់នៅ​ខ្ញុំបាន​ស្រួល​នឹងគេ ព្រោះ​ពេលនេះ​ខ្ញុំមាន​អាយុ ៧២ ឆ្នាំ​ហើយ»។

នៅក្នុង​សន្និសីទកាសែត ដែល​និយាយ​ផ្តោត​ទៅលើ​ការ «អភិរក្ស ដើម្បី​អភិវឌ្ឍន៍​គុន​ល្បុក្កតោ» នោះ​លោក សាន គឹមស៊ាន និង​លោក វ៉ាត់ ចំរើន អគ្គលេខាធិការ NOCC និងជា​ប្រធាន​សហព័ន្ធ​កីឡា​ល្បុក្កតោ​កម្ពុជា ក៏បាន​ពណ៌នា​ត្រួសៗ​ពីប្រវត្តិ​ក្បាច់គុន​ផ្សេងៗ​នៅតំបន់​អាស៊ី និង​ប្រវត្តិ​ក្បាច់គុន​ល្បុក្កតោ​ផងដែរ ដោយ​អ្នកទាំង ២ បាន​លើកឡើង​ស្រដៀង​គ្នាថា ល្បុក្កតោ ជា​ក្បាច់គុន​របស់​ព្រះព្រហ្ម ហើយ​ក្បាច់គុន​នេះក៏​ត្រូវបាន​ប្រើ​សម្រាប់​ច្បាំង ដើម្បី​ការពារ​ទឹកដី​កម្ពុជា​ផងដែរ។

លោក វ៉ាត់ ចំរើន បាន​ថ្លែងថា៖ «នេះជា​សៀវភៅ​គុន​ល្បុក្កតោ​លើកដំបូង ដែលជា​មូលដ្ឋាន​នៃប្រវត្តិ​ក្បាច់គុន​ល្បុក្កតោ ហើយ​ល្បុក្កតោ ពិតជា​រំលេច​នូវ​អត្តសញ្ញាណ​របស់​ខ្មែរមែន។ ប៉ុន្តែ​យើង​នៅមាន​ភារកិច្ច​សំខាន់ ២ ដែល​ត្រូវធ្វើ​ទៀត គឺទី ១ ធ្វើយ៉ាង​ណាឲ្យ​ការចូលរួម​គាំទ្រ និង​ថែរក្សា​ឲ្យបាន​ទូទាំង​ប្រទេស ហើយទី ២ យើងត្រូវ​រៀបចំ​ក្បាច់គុន​នេះ​ចុះបញ្ជី​ផ្លូវការ នៅក្នុង​សម្បត្តិ​បេតិកភណ្ឌ​មនុស្សជាតិ​របស់​អង្គការ​យូណេស្កូ នៅក្នុង​ខែ ៣ (ខែមីនា) ខាងមុខ​នេះ»។

ទាក់ទង​នឹងការ​ដាក់គុន​ល្បុក្កតោ ទៅជា​សម្បត្តិ​បេតិកភណ្ឌ​មនុស្សជាតិ ក្នុង​ខែមីនា​ខាងមុខនេះ លោក គឹមស៊ាន បាន​បញ្ជាក់ថា៖ «សៀវភៅ​នេះ​ចេញមក​សម្រាប់​ព្រះរាជាណាចក្រ​កម្ពុជា ទុកជូន កូនចៅ​ខ្មែរ​ជំនាន់​ក្រោយ ដោយ​នៅពេលនេះ​យើង​កំពុងជិះ​យានហោះហើរ ពាំ​នាំនូវ​ក្បាច់គុន​ល្បុក្កតោ​ទៅកាន់​ពិភពលោក ហើយ​នៅថ្ងៃ​អនាគត​ដ៏ខ្លី​ខាងមុខនេះ ល្បុក្កតោ នឹង​ហោះ​នៅលើ​ពិភពលោក​ជាអមតៈ អស់​មួយជីវិត»៕

0

Comments

Please, login or register to post a comment