ភ្នំពេញ: កីឡាករកម្ពុជាឈ្នះទាំង ២ គូ ក្នុងនោះគូចាប់អារម្មណ៍ និងជក់ចិត្តបំផុត គឺការប្រកួតរវាងកីឡាករសេង ស្រឿន មកពីក្លិបមហិទ្ធិឫទ្ធិដំបងដែក និងកីឡាករថៃ Kong Kanvan ដែលបានចាញ់ដោយពិន្ទុ ក្នុងការប្រកួតប្រដាល់គុនខ្មែរមិត្តភាពអន្តរជាតិនៃសង្វៀនអាស៊ីអាគ្នេយ៍កាលពីល្ងាចថ្ងៃសៅរ៍។
ចំណែកកីឡាករកម្ពុជាម្នាក់ទៀតស៊ឹម វណ្ណដេត បានផ្តួលជើងខ្លាំងថៃ Chhat Pichhit ឲ្យសន្លប់ធំក្នុងទឹកទី ២ យ៉ាងលឿន ដោយស្នៀតកែងវាយប្តូរជាមួយស្នៀតជង្គង់របស់កីឡាករថៃ។
ក្នុងពេលចាប់ផ្តើមប្រកួតនៅទឹកទី ១ អ្នកទស្សនាភាគច្រើនរំពឹងទុកថា សេង ស្រឿន មិនអាចទៅរួចជាមួយកីឡាករជើងចាស់ Kong Kanvan នោះទេ ហើយនៅក្នុងទឹកទី ១ និងទី ២ នោះ កីឡាករថៃ Kong Kanvan ក៏មានប្រៀបបន្តិចបន្តួចផងដែរ។ ទោះបីជាយ៉ាងណា ស្ថានភាពប្រកួតជាក់ស្តែងចាប់ផ្តើមប្រែប្រួលចាប់ពីទឹកទី ៣ ដោយសេង ស្រឿន បានទាត់ជើងក្រោមញឹកញាប់ និងបានវាយប្តូរដោយកណ្តាប់ដៃចូលគោលដៅបានល្អ ហើយសេង ស្រឿន មានពិន្ទុនាំមុខវិញ។
ចំណុចដែលសេង ស្រឿន វាយបានល្អបំផុតនៅទឹកទី ៤ ក្រោយពីរូបគេបានបញ្ជូនកណ្តាប់ដៃចូលមុខផ្ទួនៗ និងបន្ថែមដោយស្នៀតទាត់ជើងក្រោម ធ្វើឲ្យកីឡាករថៃរូបនេះដួលជាញឹកញាប់រហូតដល់អាជ្ញាកណ្តាលរាប់ដល់ ៨ ចំនួន ១ លើក ក្នុងទឹកនោះ។ ឈានចូលដល់ទឹកទី ៥ សេង ស្រឿន នៅតែបន្តគ្រប់គ្រងជ័យជម្នះបានរហូតចប់ទឹក។ សេង ស្រឿន បានឈ្នះពិន្ទុដាច់ជាឯកច្ឆន្ទលើកីឡាករជើងចាស់ថៃ Kong Kanvan។
ជ័យជម្នះរបស់សេង ស្រឿន ត្រូវបានគេសរសើរ ហើយគណៈកម្មការផ្គូផ្គងនឹងរៀបចំឲ្យសេង ស្រឿន ឡើងប្រកួតជាមួយថៃដើម្បីដណ្តើមខ្សែក្រវាត់នៅដើមខែកុម្ភៈ ឆ្នាំ ២០១៨ ខាងមុខ។ ចប់ការប្រកួត កីឡាករថៃ Kong Kanvan និយាយថា៖ «ខ្ញុំមិននឹកស្មានថា ប្រកួតចាញ់សោះ ប៉ុន្តែទទួលស្គាល់ថាការចាញ់នេះ គឺអស់ចិត្តដោយបញ្ហាស្រុតកម្លាំងព្រមទាំងឈឺជើងលំបាកទប់ទល់»។
ចំណែកគូមិត្តភាពអន្តរជាតិមួយទៀត កីឡាករស៊ឹម វណ្ណដេត មកពីក្លិបថ្មគោលពោធិ៍សែនជ័យ បានចំណាយពេលតែ ២ ទឹកប៉ុណ្ណោះ ដើម្បីផ្តួលកីឡាករថៃ Chhat Pichhit ឲ្យងើបលែងរូចដោយស្នៀតកែង និងកណ្តាប់ដៃបន្ទាប់ពីពួកគេវាយសម្រុកប្តូរស្នៀតគ្នាយ៉ាងអស្ចារ្យបំផុត។ ចំពោះគូប្រកួតមិត្តភាពថ្នាក់ជាតិវិញ កីឡាករថន ភឿត មកពីក្លិបឃ្លាំងមឿងខេត្តពោធិ៍សាត់ បានយកឈ្នះពិន្ទុកីឡាករឈាន រស្មី មកពីក្លិបតាឡីមានរិទ្ធ។ កីឡាករវ៉ែន ហុងជីវ៉ុង ខេត្តមកពីបាត់ដំបង បានសងសឹកកីឡាកររិទ្ធ មុន្នី មកពីក្លិបមកុដរាជសីហ៍បានសម្រេចទាំងត្រដាបត្រដួស៕