.jpg)
កីឡាកររឿង សោភ័ណ្ឌ (កណ្តាល) អបអរការឈ្នះពាន និងខ្សែក្រវាត់ ក្រោយផ្តួលកីឡាករថៃ។ យឺន ពន្លក
ភ្នំពេញ: ខ្សែក្រវាត់គោជល់វគ្គទី ៨ ទម្ងន់ ៦៩ គ.ក្រសង្វៀន CNC បានធ្លាក់ដល់ដៃកីឡាករ រឿង សោភ័ណ្ឌ ក្លិបមកុដរាជសីហ៍ក្រសួងមហាផ្ទៃ ក្រោយពីរូបគេបានប្រើកណ្តាប់ដៃផ្តួលជើងខ្លាំងរបស់ថៃ Opor ឲ្យសន្លប់ងើបលែងរួចក្នុងទឹកទី ៤ ដើម្បីឈ្នះខ្សែក្រវាត់ ១ អមដោយប្រាក់ ២០ លានរៀល និងខ្សែកមាស ៣ ជី ខណៈលេខ ២ Opor បានប្រាក់ ១០ លាន និងខ្សែកមាស ៣ ជី។
មុននឹងទទួលបានជ័យជម្នះ រឿង សោភ័ណ្ឌ បានជួបឧបសគ្គធំណាស់ ដោយការវាយសម្រុកក្នុងទឹកទី ១ ដោយគ្មានសំចៃកម្លាំងនោះ ធ្វើឲ្យរូបគេបែកឈាមក្បែរភ្នែកស្តាំ ហើយទឹកទី ២ និងទី ៣ Opor បានបង្កើនការចូលបុកជង្គង់យ៉ាងខ្លាំង ដែលធ្វើឲ្យ សោភ័ណ្ឌ ដែលជម្នះចូលម៉ាត់នោះ ជួបការលំបាកច្រើន។
ទោះជាយ៉ាងណា នៅចុងទឹកទី ៤ Opor បានផ្ទុះកំហឹង ក្រោយ សោភ័ណ្ឌ វាយកែងឲ្យបែកក្រោមភ្នែកឆ្វេង ដោយគេបានប្រើក្បាច់ជង្គង់ហោះបំណងផ្តួល សោភ័ណ្ឌ ប៉ុន្តែត្រូវសោភ័ណ្ឌ ម៉ាត់ឆ្វេងចូលថ្គាមបណ្តាលឲ្យសន្លប់តែម្តង។
Opor បាននិយាយក្រោយពេលចាញ់ថា៖ «ការចាញ់នេះ ដោយសារខ្ញុំមានចិត្តខឹង ចង់សង្គ្រប់វាយឲ្យ សោភ័ណ្ឌ សន្លប់ដោយក្បាច់ជង្គង់ ប៉ុន្តែកណ្តាប់ដៃគេលឿនជាង មកដល់មុន»។
តាមលទ្ធផលនេះបានធ្វើឲ្យ រឿង សោភ័ណ្ឌ ឈ្នះទាំង ៦ ប្រកួតក្នុងការប្រកួតខ្សែក្រវាត់នេះ។ រឿង សោភ័ណ្ឌ បាននិយាយក្រោយការប្រកួតថា៖ «ការប្រកួតនេះលំបាកតឹងតែងណាស់ ពីព្រោះគេខ្លាំងណាស់។ ប្រសិនបើនៅទឹកទី ៤ ធ្វើមិនបានសម្រេចទេនៅទឹកទី ៥ ជាទឹកផ្តាច់ព្រ័ត្រ ខ្ញុំបានតាំងចិត្តថា មានម្នាក់គឺគេ ឬខ្ញុំត្រូវសន្លប់ គឺមិនឲ្យចៅក្រម ឬគណៈកម្មការ លំបាកដាក់ពិន្ទុនោះទេ»។
គិតចាប់តាំងពីឆ្នាំ ២០១២ មកដល់ពេលនេះ រឿង សោភ័ណ្ឌ បានឈ្នះខ្សែក្រវាត់ ៦ ស្ថាប័ន ក្នុងនោះមានខ្សែក្រវាត់មកពីអាស៊ី អីរ៉ុប នៅប្រទេសបារាំងចំនួន ២ ខ្សែក្រវាត់ស្រាបៀរកម្ពុជា ១ ខ្សែក្រវាត់គោជល់វគ្គ ៤ ចំនួន១ ខ្សែក្រវាត់គុនខ្មែរអន្តរជាតិ ១ និងចុងក្រោយ បានឈ្នះខ្សែក្រវាត់គោជល់វគ្គ ៨ នេះ។
រឿង សោភ័ណ្ឌ បាននិយាយថា៖ «ក្រោយឈ្នះខ្សែក្រវាត់នេះ ខ្ញុំនឹងសុំសម្រាកមួយរយៈដោយចូលពិនិត្យសុខភាពសិន។ ទោះជាយ៉ាងណា ការប្រកួតរបស់ខ្ញុំអាចចាប់ផ្តើមទៅចុងខែកុម្ភៈ ឆ្នាំ ២០១៨។ ការប្រកួតខ្ញុំមិនប្រកាន់សង្វៀនដូចកីឡាករខ្លះទេ ហើយក៏គ្មានអ្នកណាទិញ ឬចងជើងខ្ញុំមិនឲ្យប្រកួតបានដែរ។ ឲ្យតែមានឱកាសគេផ្តល់ជូន នៅប៉ុស្តិ៍ណាក៏ខ្ញុំទៅប្រកួតបានដែរ ព្រោះខ្ញុំមានថ្ងៃនេះដោយសារមានបងប្អូនគាំទ្រ និងលើកទឹកចិត្តខ្ញុំខ្លាំងណាស់»។
គូប្រដាល់យកចំណាត់ថ្នាក់លេខ ៣ និងលេខ ៤ ថៃប៉ះថៃ ដែលការប្រកួតហាក់បីដូចមិនសូវល្អមើល ដោយសារពួកគេទាំង ២ ជាមិត្តរួមជាតិហូបចុកស្នាក់នៅ និងធ្វើដំណើរជាមួយគ្នា ហើយការប្រកួតត្រូវបានអាជ្ញាកណ្តាលព្រមានចំនួន ២ លើក ខណៈដែលវាយគ្នាទំនងជាប់សង្ស័យមិនអស់ពី សមត្ថភាព។ ប៉ុន្តែ Natrakeat ឈ្នះលេខ ៣ ដោយផ្តួលមិត្តរួមជាតិរបស់ខ្លួន Farmaeongkorn ឲ្យសន្លប់ទឹក ៤ និងបាក់ដៃស្តាំ។
មានគូមិត្តភាពសងសឹកមួយគូទៀត ផាន់ គ្រាន់ របស់កម្ពុជា បានបន្តឈ្នះ Peyman Ordozadeh មកពីប្រទេសអ៊ីរ៉ង់ក្នុងទម្ងន់ ៦៥ គីឡូក្រាម៕
