.jpg)
កីឡាករ ទេស សំខាន់ ពេលចូលវះយកសាច់ដុះខាងក្នុង និងក្រៅពោះវៀន។ សហការី
ភ្នំពេញៈ អ្នកប្រដាល់ ទេស សំខាន់ ដែលមានឈ្មោះពិត ឃុន សំខាន់ របស់ក្លិបកងពលតូចលេខ ៧០ កំពុងរង់ចាំការជួយពីសប្បុរសជន ខណៈរូបគេបានចូលវះកាត់ពោះ ដោយបញ្ហាដុះសាច់ក្នុង និងក្រៅ ពោះវៀន ជាថ្មី ដោយសារការវះកាត់លើកមុន គឺក្រោយកីឡាករថៃ បុកជង្គង់បណ្តាលឲ្យដាច់ពោះវៀន ក្នុងការប្រកួតនៅសង្វៀន SEATV កាលពីថ្ងៃទី ៤ ខែមករា ឆ្នាំ ២០១៧ ធ្វើមិនបានល្អនោះ។
គិតមកដល់នេះ ទេស សំខាន់ បានចូលសម្រាកព្យាបាលវះកាត់ធ្ងន់បែបនេះ ចំនួន ៤ លើកហើយ ព្រោះកន្លងមក កីឡាកររូបនេះ ធ្លាប់រងរបួសធ្ងន់ ដោយសារការប្រកួតជាមួយកីឡាករថៃ គឺថៃបានវាយឲ្យបាក់ថ្គាម បាក់ដៃ និងដាច់ពោះវៀននេះ។ ប៉ុន្តែ ទេស សំខាន់ បានប្រាប់ ភ្នំពេញប៉ុស្តិ៍ ថា៖ «ទោះជារបួស ឬគ្រោះថ្នាក់ធ្ងន់ ដោយសារប្រដាល់ ប៉ុន្តែមុខរបរឈឺសាច់នេះ ខ្ញុំមិនអាចបោះបង់ចោលទេ គឺនៅពេលខ្ញុំបានជាសះស្បើយពីជំងឺ ខ្ញុំនឹងសុំគេឡើងប្រដាល់ទៀត»។
ទេស សំខាន់ បានខកខានការប្រកួតជាង ១ ឆ្នាំហើយ ហើយកាលពីថ្ងៃទី ២ ខែមីនា ឆ្នាំ ២០១៨ រូបគេបានចូលទៅវះកាត់ នៅមន្ទីរពេទ្យព្រះកេតុមាលា ហៅពេទ្យ ១៧។ សំខាន់ និយាយថា៖ «ខាងមន្ទីរពេទ្យ ជួយវះកាត់ និងព្យាបាលយ៉ាងយកចិត្តទុកដាក់ ដោយមិនយកប្រាក់ទេ ប៉ុន្តែការចំណាយផ្សេងៗ ដូចជាទិញថ្នាំបន្ថែម ការហូបចុក ព្រមទាំងកូនឈឺផងនោះ ធ្វើឲ្យជីវភាពរបស់ខ្ញុំជួបបញ្ហាលំបាកខ្លាំង នៅពុំទាន់មានអ្នកឧបត្ថម្ភទេ»។
ទេស សំខាន់ បានបញ្ជាក់ថា៖ «ការខកខានប្រកួតយូរ ហើយមានប្រពន្ធ ធ្វើការជាកម្មការិនីរោងចក្រ មិនអាចទប់ទល់ការចំណាយក្នុងជីវភាពប្រចាំថ្ងៃបានទេ ដូច្នេះខ្ញុំសូមអំពាវនាវដល់សប្បុរសជនមេត្តាជួយខ្ញុំផង ទម្រាំខ្ញុំបានជាសះស្បើយ បានឡើងប្រកួតទៀត គឺខ្ញុំមិនបោះបង់មុខរបរប្រដាល់នេះជាដាច់ខាត»។
គួររំឭកថា ទេស សំខាន់ ជាកីឡាករគុនខ្មែរឆ្នើមម្នាក់ មានប្រវត្តិប្រកួតជាង ១៣០ ដង ក្នុងនោះ ឈ្នះភាគច្រើន និងធ្លាប់ដណ្តើមបានខ្សែក្រវាត់ចំនួន ២ ស្ថាប័ន គឺឈ្នះខ្សែក្រវាត់ស្រាបៀរលីអូ ទម្ងន់ ៦០ គីឡូក្រាម នៅសង្វៀនស៊ីធីអិន និងឈ្នះខ្សែក្រវាត់ Black Panther ទម្ងន់ ៦៣,៥ គ.ក្រ នៅសង្វៀនប៉ុស្តិ៍លេខ ៣ កាលពីឆ្នាំ ២០១៥៕
