ភ្នំពេញ: កីឡាករប្រដាល់ជើងថ្មី ស្បែកសច្រមុះស្រួច Ali Qaradaghi មកពី អ៊ីរ៉ាក់ មិនអាចតស៊ូជាមួយកីឡាករកម្ពុជាព្រំ សំណាង បានពេញ ៥ ទឹកនោះឡើយ ទោះបីអ្នកទស្សនាមើលឃើញថា កីឡាករកម្ពុជាទំនងជាបន្ធូរដៃឲ្យខ្លះក៏ដោយ។
ជាមួយគ្នានេះដែរ គូអន្តរជាតិជក់ចិត្តមួយគូទៀត ឌុម កែវដា មកពីក្លិបមកុដរាជសីហ៍នៃក្រសួងមហាផ្ទៃ បានចាញ់ពិន្ទុកីឡាករថៃ Den Phichit ទាំងប្រផិតប្រផើយកាលពីល្ងាចថ្ងៃសៅរ៍ ទី ២០ ខែមករា ឆ្នាំ ២០១៨ របស់សង្វៀនអាស៊ីអាគ្នេយ៍។
សមត្ថភាពប្រកួតរបស់ Ali Qaradaghi លើសង្វៀនផ្ទាល់នោះមិនអាចមានលទ្ធភាពតតាំងជាមួយកីឡាករព្រំ សំណាង បានក្នុងលក្ខណៈប្រហាក់ប្រហែល ឬសមគ្នានោះទេ ពីព្រោះគ្រាន់តែប្រវត្តិប្រកួត និងបទពិសោធឡើងសង្វៀននោះក៏តិចជាង ព្រំ សំណាង ដល់ទៅជិត ៤ ដងឯណោះ។
តាមការសន្និដ្ឋាន និងការលើកឡើងពីអ្នកទស្សនាមួយចំនួនដែលសុំមិនឲ្យបញ្ចេញឈ្មោះ គូនេះបានផ្លាស់ប្តូរគូប្រកួតភ្លាមៗដែលធ្វើឲ្យសមត្ថភាពខុសឆ្ងាយពីគ្នាដាច់។
ក្នុងការប្រកួតទឹកទី ១ កីឡាករព្រំ សំណាង បានប្រើស្នៀតកែងជង្គង់ និងទាត់វាយសន្ធាប់ទៅលើ Ali Qaradaghi មុននឹងធ្វើឲ្យកីឡាករអ៊ីរ៉ាក់រូបនេះស្ទើតែតស៊ូជាមួយមិនបានផង។
ប៉ុន្តែ ការប្រកួតបានឈានចូលដល់ទឹកទី ២ ព្រំ សំណាង ត្រូវបានគេមើលឃើញថា ទំនងជាបន្ធូរដៃឲ្យដៃគូខ្លះដោយមិនសូវចូលវាយសម្រុកខ្លាំងសន្ធាប់ដូចក្នុងទឹកទី ១ នោះឡើយ។
ទោះបីយ៉ាងណានៅទឹកទី ៣ Ali Qaradaghi មិនអាចគេចផុតពីការសន្លប់បានឡើយ បន្ទាប់ពីព្រំ សំណាង វាយចេញចំគោលដៅល្អ មានក្បាច់ទាត់ផ្ទួនៗ ដែលនាំឲ្យ Ali Qaradaghi ដួលអាជ្ញាកណ្តាលរាប់ចំនួន ២ លើក មុននឹងបញ្ឈប់ការប្រកួត ដោយសារតែគ្មានសមត្ថភាពប្រកួតបន្ត។
ចំណែកគូអន្តរជាតិមួយគូទៀត កីឡាករឌុម កែវដា ដែលសង្ឃឹមខ្ពស់ក្នុងការឈ្នះកីឡាករថៃនោះ ត្រូវទទួលរងនូវការបរាជ័យទៅវិញ ដោយរូបគេចាញ់ពិន្ទុរបស់កីឡាករថៃ Den Phichit ទាំងប្រផិតប្រផើយ ពិសេសក្រោយកីឡាករថៃវាយឲ្យអាជ្ញាកណ្តាលរាប់ចំនួន ១ លើកក្នុងទឹកទី ៣។
ក្នុងការប្រកួតចំនួន ៥ ទឹកពេញ ឌុម កែវដា មានប្រៀបឈ្នះពិន្ទុនាំមុខនៅដើមទឹកទី ២ និងមានប្រៀបនៅទឹកទី ៤ និងទី ៥ ប៉ុន្តែចៅក្រមបានសម្រេចឲ្យឌុម កែវដា ចាញ់ពិន្ទុនោះដោយសារនៅទឹកទី ៣ កីឡាករថៃ Den Phichit បានដាល់ចូលមុខកីឡាករឌុម កែវដា ចំនួន ២ ដៃ ដែលធ្វើឲ្យទ្រេតជំហរ នាំឲ្យអាជ្ញាកណ្តាលលោកយឹម សុខុម ចាប់រាប់ដល់ ៨ ចំនួនមួយលើក ទើបបន្តប្រកួតទៀត៕