Search form

Login - Register | FOLLOW US ON

Logo of Phnom Penh Post newspaper Phnom Penh Post - សំណាង ឌីណា ប្រាថ្នា​ចង់វ៉ៃ​អន្តរជាតិ ដើម្បី​ឆាប់​បានល្បី

Content image - Phnom Penh Post
សំណាង ឌីណា បាន​បង្ហាញ​ពាន និង​មេដាយ ដែលគេ​ដណ្តើម​បាន​កន្លងមក​។ យឺន ពន្លក

សំណាង ឌីណា ប្រាថ្នា​ចង់វ៉ៃ​អន្តរជាតិ ដើម្បី​ឆាប់​បានល្បី

ភ្នំពេញៈ កីឡាករ​ឆ្នើម​វ័យ ២០ ឆ្នាំ សំណាង ឌីណា ដែលមាន​ឈ្មោះពិត​ក្នុង​បញ្ជី​ជាតិ ខេង ឌីណា មកពី​ក្លិប​បាត់ដំបង​ពាយព្យ បាន​ស្វែងរក​ការប្រកួត​លក្ខណៈ​អន្តរជាតិ មិនទាន់​បាន ស្របពេល​ដែល​មិត្តរួម​អាជីព​ប្រដាល់​ដូចគ្នា ធ្លាប់ចាញ់​រូបគេ​ផង បែរជា​ទទួលបាន​ឱកាស​ប្រកួត​អន្តរជាតិ​អស់ទៅ​ហើយនោះ។

ឌីណា ជា​កូនទី ២ ក្នុង​គ្រួសារ​កំព្រា​ឪពុក​មានតែ​ម្តាយ​ឈ្មោះ អឹម សុនី រស់នៅ​ភូមិ​អូរអណ្តូង សង្កាត់​ព្រែកប្រា។ ឌីណា បាន​បោះបង់​ចោល​ការសិក្សា និង​បានហាត់​ប្រដាល់ ដើម្បី​ឡើង​ប្រកួត​យកប្រាក់​ជួយ​គ្រួសារ កាលពី​ឆ្នាំ ២០១៤ ហើយគេ​ទទួលបាន​លទ្ធផល​ល្អ ដោយធ្លាប់​ឈ្នះ​ជើងខ្លាំងៗ​មួយចំនួន និង​ធ្លាប់ឈ្នះ​ជើងឯក និង​ពានរង្វាន់​ធំ ១ នៅ​សង្វៀន​បាយ័ន ព្រមទាំង​ឈ្នះមេដាយ​ថ្នាក់ជាតិ​ចំនួន ៣ ដែរ។

សំណាង ឌីណា បានផ្តល់​បទសម្ភាស​កាលពី​ម្សិលមិញ​ថា៖ «អ្នក​ប្រដាល់​ជើង​ខ្លាំង​វ័យក្មេង​ទម្ងន់ ៥៤ គ.ក្រ​ដូចខ្ញុំ គឺខ្ញុំ​បាន​ប្រកួតឈ្នះ​ភាគច្រើន ប៉ុន្តែខ្ញុំ​នៅតែ​មិនទាន់​បាន​ប្រកួត​អន្តរជាតិ ស្របពេល​អ្នកធ្លាប់​ចាញ់ខ្ញុំ បាន​ប្រកួត​លក្ខណៈ​អន្តរជាតិ​សឹងតែ​អស់​ទៅហើយ»។

កីឡាករ​មាន​កម្ពស់ ១,៦៧ ម៉ែត្រ រូបនេះ បញ្ជាក់ថា៖ «ខ្ញុំ​ពិតជា​ចង់​ស្វែងរក​ការប្រកួត​ជាមួយ​កីឡាករ​បរទេស ពិសេស​កីឡាករ​ថៃ ដោយសារ​ការប្រកួត​បែបនោះ គេស្គាល់​ច្រើន ឆាប់ល្បី និង​ទទួលបាន​តម្លៃខ្លួន​ប្រកួត​ខ្ពស់ ស្របតាម​បំណងប្រាថ្នា និងចំណង់​ចំណូលចិត្ត​របស់ខ្ញុំ»។

ក្នុងការ​ប្រកួត ៣ ឆ្នាំនេះ សំណាង ឌីណា មានកំណត់​ត្រាល្អ​ដោយ​ប្រកួត​បាន ៧០ ដង ឈ្នះ ៦៣ និងចាញ់ ៧ ដង ហើយ ឌីណា​ធ្លាប់ផ្តួល​ដៃគូឲ្យ​សន្លប់ ២១ ដង ហើយ​គេធ្លាប់​បាន​ប្រកួត​ជាគូឯក​ផងដែរ។ ប្រវត្តិ​ប្រកួត​របស់ ឌីណា ធ្លាប់​ឈ្នះ រៀវ ចំណាប់ របស់​ក្រសួង​ការពារជាតិ ម៉ន រដ្ឋា និង ម៉ន បារាំង ក្លិបព្រែក​ឯង រឿង សារ័ត្ន ក្លិប​កងទ័ព​ពិសេស​ឆត្រយោង ៩១១ ចៅ រស់ ក្លិបសុភា​នូមានជ័យ ឯម សុធី និង ចាន់ សាន់ ក្លិបនិរោធ​មានជ័យ ដែលអ្នក​ទាំងនេះ​សុទ្ធតែ​អ្នក​ប្រដាល់​កំពុង​ពេញនិយម។

អ្វីដែល​ជាការ​កត់សម្គាល់​ពិសេស​នោះ សំណាង ឌីណា បញ្ជាក់ថា៖ «ជើងខ្លាំងៗ​វ័យក្មេង​ទម្ងន់ ៥៤ គីឡូក្រាម​ដូចគ្នា​ដែល​ធ្លាប់​ចាញ់ខ្ញុំ​នោះ រួមមាន រឿង សារ័ត្ន,ម៉ន រដ្ឋា,ចៅ រស់,ចាន់ សាន់, ឯម សុធី សុទ្ធតែ​ទទួលបាន​ឱកាស​ប្រកួត​លក្ខណៈ​អន្តរជាតិ​អស់ហើយ គឺ​នៅតែ​ខ្ញុំកំពុង​តែ​ស្វែងរក​ការប្រកួត ហើយ​មិនដឹងថា ថ្ងៃណា​ដល់​វេនខ្ញុំ​បានប្រកួត​នោះ​ឡើយ»។

លោក ជួន សំណាង គ្រូបង្វឹក សំណាង ឌីណា បាន​និយាយថា លោក​កំពុងតែ​ស្នើសុំ​ទៅគណៈកម្មការ​ផ្គូផ្គង​នៅ​សង្វៀន​ប្រដាល់​មួយ​ចំនួន ដើម្បី​សុំឲ្យ ឌីណា បាន​ប្រកួត​អន្តរជាតិ ប៉ុន្តែ​មិនទាន់​ទទួលបាន​ចម្លើយ​នៅឡើយ។ លោក​បន្តថា បញ្ហា​ឱកាស​បានប្រកួត​អន្តរជាតិ​នោះ គឺវា​មាន​កន្លែង​ចង្អៀត​ណាស់ ព្រោះ​តម្លៃខ្លួន​ប្រកួត​របស់​កីឡាករ​មានតម្លៃ​ខ្ពស់ ការប្រកួត​ប្រជែង​មាន​កីឡាករ​ច្រើន ហើយកត្តា​សំខាន់​នោះ ត្រូវមាន​ប្រិយភាព និងមាន​ខ្សែរយៈ​ជាចម្បង​ផងដែរ ព្រោះ​កីឡាករ​ខ្លះ មាន​សមត្ថភាព​អន់​ជាង សំណាង ឌីណា ផង ប៉ុន្តែគេ​ទទួលបាន​ឱកាស ព្រោះ​គេមាន​ខ្សែរយៈ​បក្ខពួក គឺ​មិនចាំបាច់​ឆ្ងល់​នោះ​ឡើយ។

ចំណែក​លោក តែម ម៉ឺន ប្រធាន​សហព័ន្ធ​កីឡាប្រដាល់​កម្ពុជា បាន​បកស្រាយ​លើ​បញ្ហានេះ​ថា លោក​មិនមែនជា​អ្នក​ផ្គូផ្គង​ទេ គឺវា​ជាសិទ្ធិ​របស់​គណៈកម្មការ​ផ្គូផ្គង​រវាង​មន្ត្រី​បច្ចេកទេស​ប្រចាំ​សង្វៀន និង​ខាងស្ពនស័រ ព្រមទាំង​ខាង​ប៉ុស្តិ៍ ដែល​ឯកភាពគ្នា ប៉ុន្តែ​កន្លងមក​ក៏វា​មិនទាន់​បាន​ល្អ​ឥតខ្ចោះ ១០០ ភាគរយ​ដែរ គឺវា​អាស្រ័យ​យើង​ទំនាក់ទំនង​បង្ហាញពី​សមត្ថភាព​របស់​កីឡាករ​យើង ឲ្យគេ​ស្គាល់​សិន បន្ទាប់មក​នឹងបាន​ជា​បន្តបន្ទាប់​គ្នា​មិនខាន។ ហេតុនេះ សហព័ន្ធ នៅតែ​ទទួលយក​សំណូមពរ ដើម្បី​កែទម្រង់​ការដឹកនាំ​ឲ្យបាន​ប្រសើរ​ជា​បន្តបន្ទាប់ និងផ្តល់​កម្លាំងចិត្ត​ដល់​កីឡាករ​ណា ដែលមាន​សមត្ថភាព​ល្អ​ទៅតាម​កម្មវិធី ដែល​ត្រូវការ​កីឡាករ​ឆ្នើមនោះ៕

0

Comments

Please, login or register to post a comment