ភ្នំពេញៈ កីឡាការិនី ហេង ស៊ីវឡាង គ្រោងនឹងដកខ្លួនចេញពីក្រុមជម្រើសជាតិកីឡាប្រណាំងកង់កម្ពុជា បន្ទាប់ពីអ្នកស្រី បាននាំយកមេដាយមាស ជាប្រវត្តិសាស្ត្រឲ្យកម្ពុជា ពីការប្រកួតកីឡាប្រណាំងកង់ជើងឯកអាស៊ី Asian Road & Para Cycling Championship 2018 នៅប្រទេសមីយ៉ាន់ម៉ាកាលពីយប់ថ្ងៃចន្ទ កន្លងមកនេះ។
សម្រាប់ការប្រកួត ដែលចាប់ផ្តើមពីថ្ងៃទី ៦ និងបានបញ្ចប់ កាលពីថ្ងៃទី ១២ ខែកុម្ភៈ កន្លងមកនេះ ហេង ស៊ីវឡាង បានឈ្នះមេដាយមាស លើវិញ្ញាសាជិះកង់ចម្ងាយ ២២ គីឡូម៉ែត្រ ផ្នែកអាយុ ៣៥ ឆ្នាំឡើង ហើយកីឡាការិនី ហេង ស៊ីវហ្គិច ដែលជាបងស្រីរបស់ ស៊ីវឡាង បានឈ្នះមេដាយប្រាក់ លើវិញ្ញាសានេះដែរ ប៉ុន្តែកីឡាករជិះកង់របស់កម្ពុជា ៣ នាក់ទៀត ដែលប្រកួតក្នុងកម្រិតអាយុក្រោម ១៨ ឆ្នាំ និងក្រោម ២៣ ឆ្នាំ មិនដណ្តើមបានមេដាយទេ។
កីឡាការិនី ហេង ស៊ីវឡាង បានប្រាប់ភ្នំពេញ ប៉ុស្តិ៍ ថា៖ «ខ្ញុំបានព្យាយាមលើជំនាញនេះជាច្រើនឆ្នាំមកហើយ និងបានឆ្លងកាត់ការលំបាកមិនតិចនោះដែរ មុនពេលខ្ញុំបានជាប់ជាជម្រើសជាតិ នៅឆ្នាំ ២០១៣ អ៊ីចឹងហើយការឈ្នះបានមេដាយមាស ពីការប្រកួតជើងឯកអាស៊ី ជាលើកដំបូង នៅពេលនេះ វាយុត្តិធម៌ណាស់ចំពោះរូបខ្ញុំ ដែលបានខិតខំប្រឹងប្រែងហ្វឹកហាត់រហូតមក»។
យ៉ាងណាក៏ដោយ បន្ទាប់ពីបានទទួលបាន ការស្វាគមន៍យ៉ាងកក់ក្តៅពីលោក នុត សាអាន ប្រធានសហព័ន្ធខ្មែរកីឡាទោចក្រយាន ព្រមទាំងមន្ត្រីកីឡាតំណាងមកពីក្រសួងអប់រំ យុវជន និងកីឡា និង NOCC ពិសេសក្រុមអត្តពលិកកីឡាប្រណាំងកង់ និងក្រុមគ្រួសារ នៅព្រលានយន្តហោះអន្តរជាតិភ្នំពេញ កាលពីយប់ថ្ងៃចន្ទនោះ ហេង ស៊ីវឡាង បានទម្លាយនូវរឿងដ៏គួរឲ្យគោរពមួយ គឺអ្នកស្រី នឹងឈប់ពីក្រុមជម្រើសជាតិ ដើម្បីទុកកៅអីរបស់គាត់ ដល់អ្នកជំនាន់ក្រោយ។
អ្នកស្រី ហេង ស៊ីវឡាង ដែលជាអាជីវករលក់កង់ និងមានស្វាមីជាឧកញ៉ាផងនោះ បានបញ្ជាក់ថា៖ «ពិតណាស់ បន្ទាប់ពីការប្រកួតនេះទៅ ខ្ញុំនឹងផ្អាកចូលក្រុមជម្រើសជាតិ ព្រោះខ្ញុំចង់ទុកឱកាសនេះ ឲ្យអត្តពលិកក្មេងៗ បានចូលហ្វឹកហាត់ក្នុងក្រុមជម្រើសជាតិវិញម្តង ដើម្បីឲ្យពួកគាត់ អាចបានហ្វឹកហាត់ពេញលេញ និងបានប្រាក់ខែ ពីការប្រមូលផ្តុំ សម្រាប់ការចំណាយផ្សេង»។
យ៉ាងណាក៏ដោយអ្នកស្រី ស៊ីវឡាង បានបញ្ជាក់ថា៖ «ប៉ុន្តែខ្ញុំនៅតែបន្តហ្វឹកហាត់ដោយខ្លួនឯង ហើយបច្ចេកទេស ដែលខ្ញុំមានទាំងប៉ុន្មាន ខ្ញុំនឹងចូលរួមផ្តល់ឲ្យក្មេងៗ ជំនាន់ក្រោយ ដើម្បីឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ នៅកម្ពុជា ហើយខ្ញុំគិតថា បើសិនជាយើងមានកន្លែងហ្វឹកហាត់ត្រឹមត្រូវ និងមានការហូបចុកគ្រប់គ្រាន់នោះ គឺអត្តពលិកខ្មែរយើង នឹងមានសមត្ថភាព ក្នុងការដណ្តើមយកមេដាយមាស ជាបន្តទៀត»។
ចំណែកលោកឧត្តមសេនីយ៍ត្រី ឧកញ៉ា វង្ស ខាន់ពៅ ដែលជាអគ្គលេខាធិការសហព័ន្ធខ្មែរកីឡាទោចក្រយាន និងជាស្វាមីរបស់អ្នកស្រី ហេង ស៊ីវឡាង បានថ្លែងថា៖ «នេះជាប្រវត្តិសាស្ត្ររបស់សហព័ន្ធយើង ដណ្តើមបានមេដាយមាស និងមេដាយប្រាក់ ពីការប្រកួតជើងឯកអាស៊ី។ នេះជាមោទនភាពខ្លាំងបំផុត ហើយតាមរយៈការឈ្នះមេដាយនេះ នឹងអាចជួយទាក់ទាញយុវជនជំនាន់ក្រោយ ឲ្យចូលមកលេងកីឡាប្រណាំងកង់បានច្រើន ដើម្បីយើងអាចមានសញ្ញាល្អ ឆ្ពោះទៅកាន់ស៊ីហ្គេម ឆ្នាំ ២០២៣ នៅកម្ពុជា»៕