.jpg)
សកម្មភាពប្រកួតជម្រុះពានស្ពនស័រ នៅមណ្ឌលខេត្តសៀមរាប កន្លងមក។ រូប សហការី
ភ្នំពេញៈ គណៈកម្មការប្រកួតកីឡាហ្វុតសាលដណ្តើមពានរង្វាន់ស្ពនស័រ ឆ្នាំ ២០១៧ (Sponsor Futsal Cup) បានសម្រេចកែប្រែរូបមន្តប្រកួតជម្រុះប្រចាំនៅមណ្ឌលខេត្តព្រៃវែង ដែលនឹងត្រូវធ្វើនៅលើទីលានក្នុងក្លិបកីឡាសុកញ្ញា (អ្នកលឿង) នាថ្ងៃសៅរ៍ និងថ្ងៃអាទិត្យ ចុងសប្តាហ៍នេះ ដោយសារមណ្ឌលថ្មីមួយនេះ មានក្រុមចូលរួមមិនគ្រប់តាមការគ្រោងទុក។
បើតាមគោលការណ៍ដែលបានកំណត់ របស់គណៈកម្មការប្រកួតពានមួយនេះ គឺរាល់មណ្ឌលប្រកួតនីមួយៗ ត្រូវមានក្រុមចូលរួមតិចបំផុតត្រឹម ៣២ ក្រុម និងច្រើនបំផុត ៤០ ក្រុម ប៉ុន្តែការប្រកួតនៅមណ្ឌលខេត្តព្រៃវែងនេះ មានតែ ២០ ក្រុមចូលរួមទេ ហើយនេះជាមូលហេតុធ្វើឲ្យគណៈកម្មការប្តូររូបមន្តពីការប្រកួតចាញ់ធ្លាក់ៗ មកជាការផ្តល់ឱកាសឲ្យក្រុមចាញ់ បានប្រកួតគ្នាម្តងទៀត ដើម្បីរកក្រុមឈ្នះឡើងទៅប្រកួតវគ្គ ១៦ ក្រុម។
លោក សឹម សានត្រាន តំណាងភេសជ្ជៈស្ពនស័រ និងជាអ្នកគ្រប់គ្រងការប្រកួតហ្វុតសាលដណ្តើមពានរង្វាន់ស្ពនស័រនេះ បានប្រាប់កាលពីម្សិលមិញថា៖ «មណ្ឌលខេត្តព្រៃវែង ដែលជាមណ្ឌលថ្មី ក្នុងរដូវកាលនេះ មានតែ ២០ ក្រុមទេ បានដាក់ពាក្យចូលរួម ហើយការទទួលបានក្រុមតិចចូលរួមបែបនេះ ដោយសារតែក្រុមមួយចំនួន បានជាប់ប្រកួតបាល់ទាត់អបអរសាទរថ្ងៃ ៧ មករា ដែលត្រូវបានរៀបចំឡើង នៅតាមស្រុកមួយចំនួន ក្នុងខេត្តនេះ»។
ជាមួយនឹងចំនួនក្រុមចូលរួមត្រឹម ២០ នេះ លោក សឹម សានត្រាន និងក្រុមការងារបច្ចេកទេស បានកែប្រែរូបមន្តប្រកួត ជា ២ ដំណាក់កាល។ ដំណាក់កាលទី ១ គឺក្រុមទាំង ២០ ត្រូវចាប់ឆ្នោតប្រកួតគ្នា ហើយ ១០ ក្រុម ដែលឈ្នះក្នុងការប្រកួត ត្រូវឡើងទៅប្រកួតនៅវគ្គ ១៦ ក្រុម ឯក្រុមចាញ់ទាំង ១០ ត្រូវដាក់ឲ្យប្រកួតគ្នាម្តងទៀត ហើយក្រុមឈ្នះចំនួន ៥ រួមជាមួយក្រុមចាញ់ ដែលមានលទ្ធផលល្អជាងគេ ១ ក្រុមទៀត សរុប ៦ ក្រុម ត្រូវឡើងទៅប្រកួតវគ្គ ១៦ ក្រុម ជាមួយក្រុមឈ្នះទាំង ១០ ដែលអង្គុយចាំ។
ចំណែកការប្រកួតដំណាក់កាលទី ២ នៅក្នុងវគ្គ ១៦ ក្រុម ត្រូវប្តូររូបមន្តមកប្រកួតចាញ់ធ្លាក់ៗវិញ គឺ ១៦ ក្រុមជម្រុះយក ៨ ក្រុម ហើយ ៨ ក្រុមជម្រុះយក ៤ ក្រុម និង ៤ ក្រុមជម្រុះយកក្រុមឈ្នះចំនួន ២ ឡើងទៅប្រកួតនៅវគ្គផ្តាច់ព្រ័ត្រ ខណៈក្រុមឡើងមកដល់វគ្គផ្តាច់ព្រ័ត្រទាំង ២ នេះ នឹងក្លាយជាក្រុមតំណាងឲ្យមណ្ឌលខេត្តព្រៃវែង ដែលត្រូវឡើងមកប្រកួតជុំផ្តាច់ព្រ័ត្រ ជាមួយក្រុមខ្លាំងៗចំនួន ៨ មកពីមណ្ឌលភ្នំពេញ ខេត្តបន្ទាយមានជ័យ ខេត្តសៀមរាប និងមណ្ឌលខេត្តព្រះសីហនុ។
នៅត្រង់ចំណុចនេះ លោក សឹម សានត្រាន បានបន្ថែមថា៖ «បើទោះបីជា នៅមណ្ឌលខេត្តព្រៃវែង មានក្រុមចូលរួមតិច ប៉ុន្តែខ្ញុំសង្ឃឹមថា ក្រុមដែលបានចូលរួមទាំង ២០ នឹងប្រឹងបែងប្រកួតគ្នាអស់ពីសមត្ថភាព ដើម្បីជ្រើសរើសបានក្រុម មានសមត្ថភាពពិតប្រាកដចំនួន ២ ប្រចាំមណ្ឌលនេះ ឡើងទៅប្រកួតនៅជុំផ្តាច់ព្រ័ត្រ ដែលត្រូវធ្វើនៅភ្នំពេញ នាថ្ងៃទី ២០ ដល់ទី ២១ ខែមករា ខាងមុខនេះ»៕
