.jpg)
ឡៅ ចន្ទ្រា បានវាយកែង ផ្តួលកីឡាករថៃ Chhan Chhai ត្រឹមទឹកទី ៣។ ស្រេង ម៉េងស្រ៊ុន
ភ្នំពេញៈ កីឡាករជើងខ្លាំងរបស់កម្ពុជា ឡៅ ចន្ទ្រា បានប្រើពេលត្រឹម ៣ ទឹកក្នុងការផ្តួលអ្នកប្រដាល់របស់ថៃ Chhan Chhai ក្នុងការប្រកួតបើកឆាកសន្សំពិន្ទុ ដណ្តើមពានរង្វាន់អន្តរជាតិ កំពូលអ្នកប្រដាល់កណ្តាប់ដៃដែក ISI PALM ទម្ងន់ ៦៧ គីឡូក្រាម កាលពីថ្ងៃអាទិត្យ ដើម្បីឡើងទៅឈរនៅលេខ ១ ពូលកម្ពុជា ប៉ុន្តែ មាស សុជាតិ បានចាញ់ថៃដាច់តែម្តង។
តាមរយៈការប្រកួតនៅលើសង្វៀន CNC កាលពីម្សិលមិញនោះ ឡៅ ចន្ទ្រា បានព្យាយាមចូលចាប់បុកជង្គង់ និងវាយកែងយ៉ាងសន្ធាប់ ទោះជា Chhan Chhai បានទាត់ ជង្គង់ និងកែងសងភ្លាម។
នៅក្នុងទឹកទី ២ ឡៅ ចន្ទ្រា បានបង្កើនការវាយលុកកាន់តែខ្លាំង ហើយការម៉ាត់ឆ្វេងស្តាំ ចូលពេញៗចំនួន ២ ដៃ បានធ្វើ Chhan Chhai អស់ជំហរ នាំឲ្យ ចន្ទ្រា អាចស្ទុះចូលបុកថែមមួយជង្គង់ទៀត បណ្តាលឲ្យថៃម្នាក់នេះដួលដេក និងត្រូវអាជ្ញាកណ្តាលរាប់ជាលើកទី ១ និងឈានដល់រាប់លើកទី ២ ក្នុងចុងទឹកទី ២ នេះ នៅពេល បានវាយកែងឆ្វេងចំថ្គាមពេញ បណ្តាលឲ្យ Chhan Chhai ដួលទាំងជំហរនោះ។
យ៉ាងណាក៏ដោយ នៅដើមទឹកទី ៣ ឡៅ ចន្ទ្រា បានទទួលរងការឈឺចាប់យ៉ាងខ្លាំង នៅពេល Chhan Chhai បានជ្រុលជើងទាត់ចំប្រដាប់ការពារពងស្វាសរបស់គេ ពេញមួយទំហឹងនោះ។ ភាពឈឺចាប់នេះ បានជំរុញឲ្យ ចន្ទ្រា កាន់តែមានអារម្មណ៍ពុះកញ្រ្ជល ក្នុងការតាមចាប់បុកជង្គង់ និងវាយកែងទៅលើ Chhan Chhai។
ជាមួយមហិច្ឆតានេះ ឡៅ ចន្ទ្រា បានបង្កើតឲ្យមានភាពភ្ញាក់ផ្អើល ដោយរូបគេបានបុកមួយជង្គង់ចំឆ្អឹងជំនីររបស់ Chhan Chhai រួចបានចាប់ទាញថៃម្នាក់នេះ បង្វិលមួយជុំ និងបានវាយកែងស្តាំប៊ិះចំថ្គាមពីចំហៀងយ៉ាងល្អបំផុត បណ្តាលឲ្យ Chhan Chhai ដួលដេកទាំងអាការវង្វេងស្មារតី នាំឲ្យអាជ្ញាកណ្តាលបញ្ឈប់ការប្រកួតតែម្តង។
ការយកឈ្នះ Chhan Chhai ត្រឹមទឹកទី ៣ នេះ បានជួយឲ្យ ឡៅ ចន្ទ្រា ឡើងទៅឈរនៅលេខ ១ ប្រចាំពូលកម្ពុជា ជាបណ្តោះអាសន្ន ក្នុងការប្រកួតសន្សំពិន្ទុ លើកទី ១ នេះ ដោយបានរុញទម្លាក់ ឆៃ សារ៉ា ដែលបានយកឈ្នះឡាវ Phan Chhai ដោយពិន្ទុ កាលពីសប្តាហ៍មុន មកឈរនៅលេខរៀងទី ២ វិញ។ រីឯ មាស សុជាតិ បានត្រឹម ១ ពិន្ទុដូច ពុទ្ធ ឆាយរិទ្ធី ដែលបានចាញ់ពិន្ទុថៃ Noeng Trakan កាលពីសប្តាហ៍មុន។
តាមរយៈការប្រកួត ៥ ទឹកពេញ កាលពីរសៀលថ្ងៃអាទិត្យនោះដែរ មាស សុជាតិ បានចាញ់ប្រៀបថៃ Rong Nakpha ទាំងការទាត់ ម៉ាត់ ពិសេសការបុកជង្គង់តែម្តង ដែលធ្វើឲ្យ សុជាតិ ចាញ់ពិន្ទុដាច់ និងទ្រមខ្លួនផងដែរ។ ប៉ុន្តែបេក្ខភាពទាំង ៨ នាក់នេះ នៅសល់ ៣ ប្រកួតទៀតដូចគ្នា ដើម្បីប្រជែងយក ៤ នាក់មានពិន្ទុខ្ពស់ជាងគេ ឡើងទៅប្រកួតវគ្គពាក់កណ្តាលផ្តាច់ព្រ័ត្រ។
ដោយឡែក មាស ច័ន្ទមាន បានក្លាយជាម្ចាស់ទឹកប្រាក់ ៤ លានរៀល ក្នុងការប្រកួតដណ្តើមប្រាក់លាន ទម្ងន់ ៦៣,៥ គីឡូក្រាម កាលពីយប់ថ្ងៃសៅរ៍ នៅសង្វៀន CNC នេះដែរ។ ច័ន្ទមាន បានម៉ាត់ថៃ Ton Routhlek ឲ្យសន្លប់ធំនៅទឹកទី ២ ក្នុងការប្រកួតជម្រុះ រួចបានបន្តយកឈ្នះជនរួមជាតិ ផាន់ គ្រាន់ ដោយពិន្ទុ ក្នុងវគ្គផ្តាច់ព្រ័ត្រ ព្រោះ ផាន់ គ្រាន់ បានឈ្នះពិន្ទុថៃ Thung Mun ក្នុងវគ្គជម្រុះដូចគ្នា៕
