Search form

Login - Register | FOLLOW US ON

Logo of Phnom Penh Post newspaper Phnom Penh Post - អនុប្រធាន ​ស្ប៉េស្យាល់ សុំ​ឲ្យ​មានការ​ជួយ​ជនពិការ​បញ្ញា​ខ្សោយ

Content image - Phnom Penh Post
លោក សែម សុខា បាន​បំពាក់​មេដាយ ដល់​អ្នក​ទទួល​បាន​ជយលាភី​លើក​នេះ។ ស្រេង ម៉េងស្រ៊ុន

អនុប្រធាន ​ស្ប៉េស្យាល់ សុំ​ឲ្យ​មានការ​ជួយ​ជនពិការ​បញ្ញា​ខ្សោយ

ភ្នំពេញៈ ការប្រកួត​កីឡា​ ស្ប៉េស្យាល់ ​អូឡាំពិក​កម្ពុជា ប្រចាំ​ឆ្នាំ ២០១៧ ដែល​ត្រូវ​បាន​ធ្វើ​ឡើង​ពេញ​មួយថ្ងៃ នៅ​ពហុកីឡដ្ឋាន​ជាតិ កាល​ពី​ថ្ងៃ​ចន្ទ ត្រូវ​បាន​គេ​មើល​ឃើញ​ថា មាន​អ្នក​ចូលរួម​កាន់​តែ​ច្រើន ប៉ុន្តែ​លោក សែម សុខា អនុប្រធាន​គណៈកម្មាធិកា​រ​ជាតិ​ ស្ប៉េស្យាល់ ​អូឡាំពិក​កម្ពុជា បាន​អំពាវ​នាវ​ឲ្យ​អ្នក​ពាក់ព័ន្ធ យកចិត្ត​ទុកដាក់ និង​ជួយ​ដល់​ជនពិការ​ខ្សោយ​សតិបញ្ញា​ដោយ​ផ្តល់​ឱកាស​ពួកគេ​លេង​កីឡា​ឲ្យ​បាន​ច្រើន។

លោក សែម សុខា ដែល​ជា​រដ្ឋលេខាធិការ​ក្រសួង​សង្គមកិច្ច អតីត​យុទ្ធជន និង​យុវនីតិសម្បា​ទា ផង​នោះ បាន​ថ្លែង​ថា៖ «ខ្ញុំ​សូម​កោត​សរសើរ​ដល់​អ្នក​ទាំងអស់​គ្នា ដែល​តែងតែ​យកចិត្ត​ទុកដាក់​រៀបចំ​ឲ្យ​មានការ​ប្រកួត​កីឡា​ ស្ប៉េស្យាល់ ​អូឡាំពិក ជូន​បងប្អូន និង​ក្មួយៗ​ជា​ជនពិការ​ខ្សោយ​បញ្ញា ហើយ​សកម្មភាព​នេះ សបញ្ជាក់​ពីការ​ចូលរួម​ចំណែក​ក្នុងការ​អភិវឌ្ឍ​សង្គម ជាពិសេស​ការលើក​កម្ពស់​សុខុមាលភាព​ជនពិការ ដើម្បី​ឲ្យ​ជនពិការ​រស់​នៅ​ដោយ​ថ្លៃថ្នូរ និង​គ្មានការ​រើសអើង»។

លោក សុខា បាន​ថ្លែង​បែប​នេះ នៅ​ពេល​លោក​ចូលរួម​ក្នុង​ពិធី​បិទការ​ប្រកួត​កីឡា​ ស្ប៉េស្យាល់ ​អូឡាំពិក​ថ្នាក់​ជាតិ ឆ្នាំ ២០១៧ នៅ​ពហុកីឡដ្ឋាន​ជាតិ កាល​ពី​ថ្ងៃ​ចន្ទ ខណៈ​ការប្រកួត​នេះ មាន​អ្នកចូលរួម​រហូត​ដល់ ១៦៩ នាក់ (ស្រី ៥៤ នាក់) មកពី​អនុ​គណៈកម្មាធិការ​ ស្ប៉េស្យាល់ អូឡាំពិក​ខេត្ត​ចំនួន ៥ មាន​ខេត្ត​បាត់ដំបង កំពង់ធំ ស្វាយរៀង តាកែវ និង​ខេត្ត​ព្រៃវែង ព្រមទាំង​អង្គការ FSN, PSE, CCAMH, KPF និង​អង្គការ PACHID ហើយ​ពួកគេ​ប្រកួត​កីឡា​អត្តពលកម្ម បាល់ទាត់ និង​កីឡា​ប៊ូល។

យ៉ាងណា​ក៏ដោយ លោក សែម សុខា បាន​ធ្វើការ​អំពាវនាវ​ថា៖ «ខ្ញុំសុំ​ឲ្យ​អនុគណៈកម្មាធិការ​ ស្ប៉េស្យាល់ ​អូឡាំពិក រាជធានី ខេត្ត ក៏​ដូចជា​អង្គការ សមាគម​នានា ដែល​គ្រប់គ្រង​ផ្ទាល់​ដល់​ជន​ពិការ​ខ្សោយ​សតិបញ្ញា សូម​យកចិត្ត​ទុកដាក់​បីបាច់​ថែរក្សា និង​ផ្តល់​ឱកាស​ឲ្យ​ពួកគាត់​បាន​ហ្វឹកហាត់ និង​ចូលរួម​ការប្រកួត​នានា​ឲ្យ​បាន​ច្រើន»។

គួររំឭក​ថា គណៈកម្មាធិការ​ជាតិ​ ស្ប៉េស្យាល់ ​អូឡាំពិក​កម្ពុជា បាន​បង្កើត​ឡើង នៅ​ឆ្នាំ ២០០៥ ហើយ​បាន​រៀបចំ​ការហាត់ និង​ការប្រកួត​ជា​រៀងរាល់​ឆ្នាំ ដើម្បី​វាស់​ស្ទង់ និង​វាយ​តម្លៃ​កម្រិត​សមត្ថភាព និង​ជ្រើស​អត្តពលិក​ឆ្នើម ចូលរួម​ការប្រកួត​អន្តរជាតិ​ដូចជា​កីឡា​ ស្ប៉េស្យាល់ ​អូឡាំពិក​រដូវក្តៅ និង​រដូវរងា​ពិភពលោក កីឡា​ ស្ប៉េស្យាល់​អូឡាំពិក​ថ្នាក់​តំបន់​អាស៊ី​ប៉ាស៊ីហ្វិក និង​ថ្នាក់​តំបន់​ទន្លេមេគង្គ។

ជាក់ស្តែង គណៈកម្មការ​រៀបចំ នឹង​ធ្វើការ​ជ្រើសរើស​កីឡាករ​ឆ្នើម ៨ នាក់ មាន​អាយុ ១៦ ឆ្នាំ​ដល់ ២១ ឆ្នាំ ចេញ​ពីការ​ប្រកួត​នេះ ដើម្បី​ហ្វឹកហាត់​ត្រៀម​ចូលរួម​ការប្រកួត​កីឡា​បាល់ទាត់​ ស្ប៉េស្យាល់ ​អូឡាំពិក​ថ្នាក់​តំបន់​មេគង្គ នៅ​មីយ៉ាន់ម៉ា ក្នុង​ខែ​វិច្ឆិកា ខាងមុខ​នេះ៕

0

Comments

Please, login or register to post a comment