.jpg)
លោក ប៊ូ សុផល តំណាងលោក ជា ប៊ុនហេង បានផ្តល់ប្រាក់រង្វាន់ដល់កីឡាករ កាលពីថ្ងៃចន្ទ។ យឺន ពន្លក
ភ្នំពេញៈ អ្នកប្រដាល់គុនខ្មែរ ចំនួន ៥៤ នាក់ មកពីក្លិបចំនួន ១៦ ដែលចំណុះឲ្យសមាគមប្រដាល់ក្រសួងមហាផ្ទៃ បានទទួលប្រាក់ឧបត្ថម្ភពីលោក ជា ប៊ុនហេង ទីប្រឹក្សាលោក ស ខេងឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីថ្ងៃចន្ទ នៅអង្គភាពកីឡាក្រសួងមហាផ្ទៃ ក្នុងពហុកីឡដ្ឋានជាតិ។
លោកជា ប៊ុនហេង ជាប្រធានអង្គភាពកីឡាក្រសួងមហាផ្ទៃ ផងនោះ បានថ្លែងថា៖ «ការឧបត្ថម្ភដល់អ្នកប្រដាល់ទាំងនេះ ដើម្បីជួយលើកទឹកចិត្ត ឲ្យពួកគេខិតខំប្រឹងប្រែងឲ្យបានល្បី ព្រោះកីឡាប្រភេទនេះ ប្រើប្រាស់កម្លាំងខ្លាំង និងប្រឈមទៅនឹងឧបសគ្គ និងគ្រោះថ្នាក់ច្រើន ហើយការផ្តល់ប្រាក់រង្វាន់ផ្តល់ជូនកីឡាករទាំង ៥៤ នាក់នេះ គឺគិតត្រឹមកីឡាករដែលបានប្រកួតក្នុងអំឡុង ខែធ្នូ ឆ្នាំ ២០១៧ កន្លងមកថ្មីៗ ចំណែកខែផ្សេងៗមុនខែធ្នូ ២០១៧ យើងបានផ្តល់ជូនរួចអស់ហើយ»។
ចំណែកលោកវរសេនីយ៍ត្រី គង់ ចាន់ធីណា ជំនួយការលោក ជា ប៊ុនហេង និងជាគ្រូបង្វឹកក្បាច់គុនផ្នែកកីឡានៅអង្គភាពក្រសួងមហាផ្ទៃ បានប្រាប់ថា៖ «កីឡាករទាំង ៥៤ នាក់ ដែលទទួលបានប្រាក់រង្វាន់ពីលោកឧត្តមសេនីយ៍ឯក ជា ប៊ុនហេង ពេលនេះ ជាកីឡាកររបស់ក្លិប ដែលស្ថិតក្នុងសមាគមកីឡាប្រដាល់ក្រសួងមហាផ្ទៃ ហើយបានឡើងប្រកួត តាមសង្វៀននានា ទាំងជាមួយគូអន្តរជាតិ និងប្រកួតជាមួយខ្មែរគ្នាឯង»។
តាមរយៈការផ្តល់ប្រាក់រង្វាន់ កាលពីម្សិលមិញនោះ គឺកីឡាករណា ដែលប្រកួតឈ្នះកីឡាករបរទេស ដោយផ្តួលឲ្យសន្លប់ បានប្រាក់រង្វាន់ ២០ ម៉ឺនរៀល អ្នកឈ្នះត្រឹមពិន្ទុបាន ១០ ម៉ឺនរៀល ឯគូប្រដាល់ខ្មែរគ្នាឯង អ្នកឈ្នះដោយផ្តួលដៃគូឲ្យសន្លប់ ទទួលបាន ១០ ម៉ឺនរៀល អ្នកឈ្នះត្រឹមពិន្ទុ ទទួលបាន ៥ ម៉ឺនរៀល។ ចំណែកកីឡាករវ័យក្មេង ថ្មីៗដែលបានឱកាសឡើងប្រកួតជាគូបើកឆាក ឬគូចុងក្រោយ ត្រូវបានលោក ជា ប៊ុនហេង ឧបត្ថម្ភម្នាក់ ១០ ម៉ឺនរៀល ទោះបីឈ្នះ ឬចាញ់ ក៏ដោយ ដើម្បីជាការលើកទឹកចិត្តឲ្យពួកគេខំប្រឹងហ្វឹកហាត់បន្ថែមទៀត។
ជាមួយគ្នានេះ លោក ជា ប៊ុនហេង បានបញ្ជាក់ថា៖ «ខ្ញុំនឹងខិតខំស្វែងរកការគាំទ្របន្តទៀតពីសប្បុរសជន និងថ្នាក់ដឹកនាំ ដើម្បីប្រមូលថវិកា សម្រាប់យកមកឧបត្ថម្ភដល់កីឡាករ សម្រាប់ឆ្នាំថ្មី ២០១៨ នេះ»។
ទោះជាយ៉ាងណា លោក ជា ប៊ុនហេង បានត្អូញត្អែរថា ការឧបត្ថម្ភមិនមែនតែកីឡាប្រដាល់មួយប្រភេទនេះទេ ព្រោះនៅក្នុងអង្គភាពកីឡាក្រសួងមហាផ្ទៃ មានរហូតដល់ ២៧ ប្រភេទកីឡា ហើយជាគោលការណ៍ សម្រាប់ឆ្នាំ ២០១៨ នេះ អង្គភាពកីឡាក្រសួងមហាផ្ទៃ មានផែនការដណ្តើមយកចំណាត់ថ្នាក់លេខ ១ ក្នុងការប្រកួតកីឡាជាតិ លើកទី ២ ក្នុងចំណោមអ្នកចូលរួម ២៥ ខេត្ត-រាជធានី ព្រមទាំងក្រសួង ២ គឺក្រសួងមហាផ្ទៃ និងក្រសួងការពារជាតិ៕
