Search form

Login - Register | FOLLOW US ON

Logo of Phnom Penh Post newspaper Phnom Penh Post - 7NG ចាប់​ប្រកួត​ប្រជែង​ជ្រើសរើស​រក សេះ ​ល្អ​ប្រចាំ​ខែ

Content image - Phnom Penh Post
សកម្មភាព​ប្រណាំង​សេះ​ប្រចាំខែ​មករា នៅទី​លាន SCT Sport Complex។ រូប សហការី

7NG ចាប់​ប្រកួត​ប្រជែង​ជ្រើសរើស​រក សេះ ​ល្អ​ប្រចាំ​ខែ

ភ្នំពេញៈ ក្រោយពី​បានបញ្ចប់​ការប្រកួត​រដូវកាល​ទី ១ ឆ្នាំ ២០១៦ ប្រកបដោយ​ជោគជ័យ​នោះ ក្រុមហ៊ុន 7NG បាន​ចាប់ផ្តើម​ធ្វើការ​ប្រកួត​ប្រណាំង​សេះ នៅលើ​ទីលាន SCT Sport Complex ក្នុង​ទឹកដី​វិហារ​សួគ៌ ស្រុក​ខ្សាច់កណ្តាល ខេត្ត​កណ្តាល ជា​បន្តទៀត ដើម្បី​រកសេះ​ល្អៗ ឡើងទៅ​ប្រកួត​វគ្គ​ផ្តាច់ព្រ័ត្រ ក្នុង​ខែធ្នូ ឆ្នាំ ២០១៧ ខណៈ​ប្រាក់រង្វាន់​នៅ​ឆ្នាំនេះ បាន​កើនឡើង​ទ្វេដង​ឯណោះ។

វាដូចគ្នា​ទៅនឹង​ការប្រកួត កាលពី​ឆ្នាំ ២០១៦ ដែរ គឺ 7NG នឹង​រៀបចំ​ឲ្យមាន​ការប្រកួត​ប្រណាំង​សេះ ជាប្រចាំ​ខែ ហើយសេះ​ដែល​ទទួលបាន​លេខ ១ ដល់លេខ ៣ តាម​ប្រភេទ​នីមួយៗ ជាពិសេស​សេះ​ប្រកួត​នៅក្រុម A ត្រូវបាន​គណៈកម្មការ​កត់សម្គាល់​យ៉ាងច្បាស់ ដើម្បី​យកទៅ​ប្រៀបធៀប​ជាមួយ​សេះ​ទទួលបាន​ជ័យជម្នះ​ក្នុងខែ​នីមួយៗ រួចទើប​សម្រេចយក​សេះល្អ​ដាច់គេ ទៅ​ប្រកួត​ផ្តាច់ព្រ័ត្រ នៅ​ចុងឆ្នាំ ២០១៧ នេះ ដើម្បី​ដណ្តើមយក​ប្រាក់រង្វាន់​ចំនួន ២៥០០០ ដុល្លារ។

លោក​ឧកញ៉ា ស្រី ចន្ធូ ដែលជា​អ្នក​ផ្តួចផ្តើម​បង្កើតឲ្យ​មានការ​ប្រកួត​ប្រណាំង​សេះ​នេះ ធ្លាប់បាន​ប្រាប់ថា ក្រុម​ការងារ​របស់​លោក នឹងធ្វើ​ការប្រកួត​ប្រណាំង​សេះនេះ ឲ្យបាន​រៀងរាល់ឆ្នាំ​ហើយ​ការដ្ឋាន​របស់​លោក​ផ្ទាល់​ក៏មាន​សេះល្អៗ​ច្រើន​ក្បាល​ផងដែរ ប៉ុន្តែ​អ្នក​ស្រឡាញ់​កីឡា​ជិះសេះ​លោក ស្រី ចន្ធូ នៅតែ​បើក​ទូលាយ​សម្រាប់​អ្នកមាន​សេះ ឲ្យមក​ដាក់ពាក្យ​ចូលរួម​ប្រកួត ដើម្បី​ធ្វើឲ្យ​ព្រឹត្តិការណ៍​នេះ កាន់​តែមាន​ទ្រង់ទ្រាយ​ធំ។

យ៉ាងណាមិញ សម្រាប់​ការប្រកួត​ប្រណាំង​សេះ​ប្រចាំ​ខែមករា ដែល​ត្រូវបាន​ធ្វើឡើង កាលពី​ថ្ងៃអាទិត្យ គឺមាន​ការប្រកួត​ទៅលើ​គ្រប់​ប្រភេទ​សេះ រួមមាន​ក្រុម A ក្រុម B ក្រុម C ក្រុម D និងក្រុម E ហើយ​កីឡាករ​ជម្រើសជាតិ​ជិះសេះ​កម្ពុជា ចំនួន ៣ នាក់ ក៏បាន​ចូលរួម​ក្នុងការ​បញ្ជា​ជិះសេះ​នាំចូល​មកពី​ប្រទេស​ថៃ និង​វៀតណាម ស្ថិតក្នុង​ក្រុម A ផងដែរ ខណៈ​ក្រុម B,C,D និងក្រុម E ជា​ប្រភេទ​សេះ​ក្នុងស្រុក។

កីឡាករ លន់ សុភ័ក្ត្រា នៃក្រុម​ជិះសេះ​ជម្រើសជាតិ​កម្ពុជា បាន​និយាយ​ក្រោយ​ការប្រកួត​ថា៖ «ពេលខ្ញុំ​ចេញទៅ​ប្រកួត​នៅក្រៅ​ប្រទេស ខ្ញុំ​ធ្លាប់តែ​ប្រកួត​វិញ្ញាសា​បញ្ជាសេះ​លោត​ឆ្លងកាត់​ឧបសគ្គ និង​បញ្ជា​សេះឲ្យ​រាំ ឯការបញ្ជា​សេះលើ​ទីលាន​រាបស្មើ​ដោយ​ប្រើ​ល្បឿន​បែបនេះ ខ្ញុំទើប​តែ​មកលេង​នៅទីនេះ​ទេ ហេតុនេះ​វាមិន​ស្រួល​ប៉ុន្មាន​ឡើយ ដែល​ទាមទារ​ឲ្យយើង​ត្រូវ​ហ្វឹកហាត់​បន្ថែមទៀត ប៉ុន្តែខ្ញុំ​មើលឃើញថា​ទីលាន SCT Sport Complex នេះមាន​កម្រិត​ស្តង់ដារ ដូចនៅ​ប្រទេស​ផ្សេងៗ​ដែរ»។

ចំពោះ​លទ្ធផល ការប្រណាំង​សេះក្រុម A ដែលជា​ក្រុម​មានសេះ​ល្អ​ជាងគេ និងមាន​កម្ពស់ ១,៧ ម៉ែត្រ​ឡើង​នោះ សេះ​ឈ្មោះ LV បាន​លេខ ១ ប្រចាំ​ខែ​មករា ដោយ​ទទួលបាន​រង្វាន់ ១ ពាន់ដុល្លារ ឯសេះ​ឈ្មោះ Rosi បានលេខ ២ និង​ប្រាក់រង្វាន់ ៧០០ ដុល្លារ ហើយ​លេខ ៣ បាន​ទៅលើ Carino អមដោយ​ប្រាក់រង្វាន់ ៥០០ ដុល្លារ។

គួររំឭកថា ការប្រកួត​កាលឆ្នាំ ២០១៦ សេះ​ឈ្មោះ MABELL បាន​លេខ ១ អម​ជាមួយ​ប្រាក់រង្វាន់ ១៥០០០ ដុល្លារ លេខ ២ សេះ​ឈ្មោះ Rosi ប្រាក់រង្វាន់ ១៥០០ ដុល្លារ និងលេខ ៣ សេះ​ឈ្មោះ ម៉លលី ប្រាក់រង្វាន់ ១០០០ ដុល្លារ៕

0

Comments

Please, login or register to post a comment