.jpg)
សកម្មភាពប្រណាំងសេះដណ្តើមពានរង្វាន់ Smart Land Home Championship របស់ 7NG។ ហេង ជីវ័ន
ភ្នំពេញៈ ព្រឹត្តិការណ៍ប្រកួតកីឡាប្រណាំងសេះដណ្ដើមពានរង្វាន់ Smart Land Home Champion បានចាប់ផ្តើមប្រកួតសម្រិតសម្រាំងរកសេះខ្លាំងប្រចាំរដូវកាលទី ៣ ឆ្នាំ ២០១៨ នៅលើទីលាន SCT Sport Complex ក្នុងតំបន់អភិវឌ្ឍន៍ 7NG ក្នុងឃុំវិហារសួគ៌ ស្រុកខ្សាច់កណ្ដាល កាលពីថ្ងៃអាទិត្យ កន្លងមកនេះ។
បើតាមគណៈកម្មការរៀបចំការប្រកួតនេះ បានឲ្យដឹងថា ការប្រកួតប្រណាំងសេះ នៅឆ្នាំនេះ អាចនឹងដំណើរទៅបានរលូនជាងឆ្នាំមុន ព្រោះមានក្រុមហ៊ុនចំណីសេះដ៏ធំមួយ បានចូលរួមឧបត្ថម្ភធំ បើទោះបីជា លក្ខខណ្ឌនៃការប្រកួត យើងធ្វើដូចឆ្នាំមុនៗក៏ដោយ។
លោក អឿន សុផល តំណាងគណៈកម្មការរៀបចំការប្រកួតនេះ បានប្រាប់ប្រព័ន្ធផ្សព្វផ្សាយថា៖ «អ្វីដែលប្លែក សម្រាប់ការប្រណាំងសេះពានរង្វាន់ Smart Land Home Champion នៅឆ្នាំ ២០១៨ នេះ គឺយើងមានក្រុមហ៊ុនចំណីសេះ បានចូលរួមឧបត្ថម្ភធំ ក្នុងកម្មវិធីនេះ»។
លោកបានបន្ថែមថា៖ «ចំពោះលក្ខខណ្ឌនៃការប្រកួត គឺយើងធ្វើដូចសព្វដងដែរ ប៉ុន្តែនៅឆ្នាំ ២០១៨ នេះ យើងមានការប្រកួតដណ្តើមយកពានធំចំនួន ២ គឺ ១ ធ្វើនៅក្នុងខែមេសា មុនថ្ងៃមហាសង្ក្រាន្ត ចូលឆ្នាំប្រពៃណីខ្មែរ ហើយពានធំ ១ ទៀត ធ្វើក្នុងខែធ្នូ។ រីឯប្រាក់រង្វាន់ យើងនឹងបង្កើនទៅតាមផែនការរបស់យើងពី ១ ឆ្នាំទៅ ១ ឆ្នាំ ដើម្បីបង្កើនសមត្ថភាពសេះ ក៏ដូចជាលើកស្ទួយម្ចាស់សេះ ក្នុងការថែទាំសេះឲ្យបានល្អ»។
ក្រុមហ៊ុនភើហ្វីក ខមភេនៀន ដែលជាសម្ព័ន្ធរបស់ក្រុមហ៊ុនមេ នៅថៃ គឺជាអ្នកចូលរួមឧបត្ថម្ភធំ ក្នុងការប្រណាំងសេះរបស់ 7NG នៅឆ្នាំ ២០១៨ នេះ ហើយ លោក វីរ៉ាយុត យ៉ាមភីផាត់ ប្រធានផ្នែកលក់ចំណីសត្វចិញ្ចឹមរបស់ក្រុមហ៊ុននេះ ហាក់មានការចាប់អារម្មណ៍ទៅលើព្រឹត្តិការណ៍ប្រណាំងសេះនេះ។
លោក វីរ៉ាយុត យ៉ាមភីផាត់ បានថ្លែងថា៖ «ខ្ញុំសូមអរគុណដល់ 7NG ដែលបានរៀបចំកម្មវិធីប្រណាំងសេះនេះ។ យើងបានចាប់អារម្មណ៍ជាមួយព្រឹត្តិការណ៍នេះ ទើបយើងមកទាក់ទង ដើម្បីឧបត្ថម្ភ ព្រោះក្រុមហ៊ុនយើង មាននាំចូលចំណីសត្វ និងចំណីសេះ ដែល 7NG ធ្លាប់ប្រើកន្លងមកដែរ អ៊ីចឹងយើងនឹងឧបត្ថម្ភផលិតផលនេះ ទៅដល់សេះ ដែលទទួលបានជយលាភី សម្រាប់យកទៅប្រើប្រាស់»។
គួរបញ្ជាក់ថា សម្រាប់ការប្រណាំងសេះ ដណ្ដើមពានរង្វាន់ Smart Land Home Champion នេះ នឹងត្រូវធ្វើការប្រកួតជម្រុះរៀងរាល់ ១ ខែម្តង ដើម្បីស្វែងរកសេះល្អៗទៅប្រកួតផ្តាច់ព្រ័ត្រ ដណ្តើមយកពានធំ ខណៈការប្រកួតផ្តាច់ព្រ័ត្រ ប្រចាំឆ្នាំ ២០១៧ ដែលមានប្រាក់រង្វាន់ ២៥០០០ ដុល្លារ ត្រូវលើកយកមកធ្វើនៅខែមេសា ឆ្នាំ ២០១៨ នេះ ទើបធ្វើឲ្យការប្រកួតនៅឆ្នាំនេះ មានការប្រកួតពានធំរហូតដល់ ២ បែបនេះ។
សម្រាប់ការប្រកួតប្រចាំខែមករា ដែលបានធ្វើឡើង កាលពីថ្ងៃអាទិត្យ កន្លងមកនេះ មានសេះចំនួន ៣០ ក្បាល ហើយត្រូវបានបែងចែកការប្រកួតជា ២ ពូល គឺពូល D និងពូល C។
ជាលទ្ធផល សេះឈ្មោះ អារ៉េ ទទួលបានលេខ ១ ប្រចាំពូល D ឯលេខ ២ បានទៅសេះឈ្មោះ អាផ្កាយ និងលេខ ៣ សេះឈ្មោះ ប្រុសប៉ាវ ឯពូល C លេខ ១ បានទៅសេះឈ្មោះ Hero លេខ ២ សេះឈ្មោះ Mandoza និងលេខ ៣ សេះឈ្មោះ NA VA RA៕
