.jpg)
សន្និសីទសារព័ត៌មានស្តីពីការប្តូរយុទ្ធសាស្ត្ររបស់ Ganzber Top Fighters។ យឺន ពន្លក
ភ្នំពេញ: កម្មវិធីប្រដាល់នៃសង្វៀនអាស៊ីអាគ្នេយ៍ (SEATV) ពេលយប់ថ្ងៃសៅរ៍ ពីម៉ោង៨ ដល់ម៉ោង ១០ និង ៣០ យប់ ដែលមានឈ្មោះថា Ganzberg Top Fighters បានដាក់ឲ្យដំណើរការប្រកួតឡើងវិញបន្ទាប់ពីផ្អាកការប្រកួតមួយរយៈពេលខ្លីកន្លងមក។
ការបើកឲ្យមានប្រកួតឡើងវិញនេះត្រូវបានគេមើលឃើញថា មានយុទ្ធសាស្ត្រថ្មី រូបមន្តប្រកួតថ្មី មានគូដណ្តើមប្រាក់លានរវាងកីឡាករល្បីៗថ្នាក់ជាតិ និងគូមិត្តភាពអន្តរជាតិ ក៏ដូចជាមានកីឡាករមកពីអឺរ៉ុប និងថៃ ដើម្បីប្រជែងយកភាពខ្លាំងស្វែងរកការគាំទ្រពីមហាជន ខណៈដែលកម្មវិធីប្រកួតប្រដាល់គុនខ្មែររៀងរាល់ចុងសប្តាហ៍ជាច្រើនសង្វៀន ហាក់ដូចជាកំពុងតែប្រជែងទីផ្សារគ្នាក្នុងការស្វែងរកកីឡាករល្បីៗមួយចំនួនដើម្បីឡើងប្រកួត។
ស្ថានភាពប្រកួតដ៏មមាញឹក និងច្រើនសង្វៀនបានធ្វើឲ្យកីឡាករខ្លាំងឆ្នើមៗមួយចំនួនសឹងតែរកពេលវេលាហ្វឹកហាត់មិនបានគ្រប់គ្រាន់ ពីព្រោះតម្រូវការប្រកួតច្រើនពេក។
លោក Josef Brune តំណាងអ្នកឧបត្ថម្ភកម្មវិធី Ganzberg Top Fighters មានប្រសាសន៍ក្នុងសន្និសីទសារព័ត៌មានកាលពីចុងសប្តាហ៍មុនថា៖ «ការបើកឲ្យប្រកួតឡើងវិញនេះគឺយើងមានយុទ្ធសាស្ត្រថ្មីរូបមន្តប្រកួតថ្មី ប្រាក់រង្វាន់ច្រើន និងជ្រើសរើសកីឡាករដែលមានសមត្ថភាពល្អមកប្រកួតជូន ដើម្បីឲ្យមហាជនទស្សនាឲ្យពេញចិត្ត»។
លោក Josef Brune បន្តថា៖ «កម្មវិធីប្រកួតប្រដាល់របស់ Ganzberg Top Fighters នេះទទួលបានការគាំទ្រច្រើន ហើយយើងកំពុងតែធ្វើវាឲ្យកាន់តែល្អ ដោយសហការជាមួយខាងស្ថានីយទូរទស្សន៍ SEATV និងសហព័ន្ធកីឡាប្រដាល់គុនខ្មែរដើម្បីឲ្យការប្រកួតកាន់តែប្រសើរឡើងៗជាលំដាប់»។
លោកយិន ខេមរា នាយកទីផ្សារ និងទំនាក់ទំនងសាធារណៈរបស់ SEATV បានឲ្យដឹងថា៖ «យើងបានស្វែងរកនូវរូបមន្តប្រកួតល្អជាងមុន ទាក់ទាញជាងមុន តម្លៃខ្លួនប្រកួតកីឡាករថ្នាក់ជាតិកាន់តែច្រើនជាងមុន ក្នុងនោះកីឡាករមានមកពីអឺរ៉ុប និងថៃ ហើយការគ្រប់គ្រងបច្ចេកទេស និងការកាត់សេចក្តី ក៏មានភាពសុក្រឹត និងតម្លាភាព ផងដែរ ដើម្បីទទួលបានការគាំទ្រខ្លាំងពីមហាជន»។
លោកញាន សុធី នាយកគ្រប់គ្រងកម្មវិធីប្រដាល់ប្រចាំសង្វៀនអាស៊ីអាគ្នេយ៍ បានប្រាប់ឲ្យដឹងថា៖ «យុទ្ធសាស្ត្រនៃការរៀបចំប្រកួតក្នុងកម្មវិធី Ganzberg Top Fighters នេះគឺការរៀងរាល់យប់ថ្ងៃសៅរ៍ នៅស្ទូឌីយោទូរទស្សន៍អាស៊ីអាគ្នេយ៍ ដោយក្នុងមួយលើកៗតម្រូវឲ្យមានគូមិត្តភាពអន្តរជាតិចំនួន ២ គូពោលគឺកីឡាករខ្មែរជាមួយថៃ និងកីឡាករខ្មែរជាមួយកីឡាករមកពីប្រទេសអីរ៉ុប»។
លោកបានបន្តថា៖ «ជាមួយគ្នានេះដែរ យើងនឹងដាក់ឲ្យមានគូដណ្តើមប្រាក់លានចំនួន ២ គូរវាងកីឡាករខ្មែរ និងខ្មែរដើម្បីសន្សំពិន្ទុឆ្ពោះទៅយកទឹកប្រាក់ចំនួន ១០ លានរៀលពី GanzbergTop Fighter»។
លោកបានបន្ថែមទៀតថា៖ «ក្នុងនាមអ្នកគ្រប់គ្រងកម្មវិធី តែងតែស្វែងរកយុទ្ធសាស្ត្រថ្មីៗបម្រើជូនអ្នកទស្សនា ហើយតាមការស្ទាបស្ទង់នោះ សង្វៀនរបស់យើងរៀបចំប្រកួតបានល្អជាងគេ។ បន្ថែមពីលើនេះ សម្រាប់កីឡាករឈ្នះប្រាក់លាន ចំណាត់ថ្នាក់លេខ ១ នឹងទទួលបានប្រាក់ចំនួន ១០ លានរៀល ហើយអ្នកឈ្នះលេខ ២ ទទួលបានតែ ២ លានរៀលប៉ុណ្ណោះ»។
កម្មវិធី Ganzberg Top Fighters នេះធ្លាប់បើកការប្រកួតនៅរាល់ព្រឹកថ្ងៃអាទិត្យ នៅសង្វៀនអាស៊ីអាគ្នេយ៍ក្រោយមកបានប្តូរទៅប្រកួតនៅយប់ថ្ងៃសៅរ៍ និងបានផ្អាកការប្រកួតមួយរយៈ ហើយចាប់ពីខែមីនា ឆ្នាំ ២០១៨ នេះតទៅ នឹងបើកការប្រកួតជាថ្មី ដោយប្តូរយុទ្ធសាស្ត្រថ្មីក្នុងការប្រកួត៕
