.jpg)
សកម្មភាពប្រឡងខ្សែក្រវាត់កម្រិតបឋមរបស់សិស្សគន Hapkido។ យឺន ពន្លក
ភ្នំពេញ: កីឡាករ-កីឡាការិនីវ័យក្មេងចំនួន ១២ នាក់ មកពីសាលារៀនបឋមសិក្សាផ្សេងៗ ដែលបានហ្វឹកហាត់កីឡាហាប់គីដូនៅសហព័ន្ធខ្មែរកីឡាហាប់គីដូនាទីលានពហុកីឡដ្ឋានជាតិអូឡាំពិកកម្ពុជារយៈពេល ៦ ខែ បានប្រឡងឡើងខ្សែក្រវាត់ក្នុងកម្រិតបឋមពីខ្សែក្រវាត់ពណ៌ស ដល់ខ្សែក្រវាត់ពណ៌ទឹកក្រូចកាលពីល្ងាចថ្ងៃចន្ទ ទី ៥ ខែកុម្ភៈ ឆ្នាំ ២០១៨ ម្សិលមិញ។
លោកគង់ ចាន់ធីណា គ្រូបង្វឹក និងជាអគ្គលេខាធិការនៃសហព័ន្ធខ្មែរកីឡាហាប់គីដូ បានឲ្យដឹងថា៖ «ក្រោយការតស៊ូបង្វឹក ឬបណ្តុះបណ្តាលកីឡាប្រភេទ Hapkido នេះតាមកន្លែងសាធារណៈផ្សេងៗអស់រយៈពេលជាង ១០ ឆ្នាំ បច្ចុប្បន្នសហព័ន្ធខ្មែរកីឡាហាប់គីដូមានទីតាំងហ្វឹកហាត់ល្អ ទំនើប ស្តង់ដារអន្តរជាតិ ដែលបានទាក់ទាញយុវវ័យក្មេងៗមកហ្វឹកហាត់មានចំនួនគួរឲ្យកត់សម្គាល់»។
លោកបានបន្តថា៖ «ក្រោយពីលោកជា ប៊ុនហេង ប្រធានអង្គភាពកីឡាក្រសួងមហាផ្ទៃបានផ្តល់ទីតាំងហ្វឹកហាត់ល្អ នៅក្នុងស្តាតរយៈពេលជាង ៦ ខែរួចមក Hapkido ទទួលបានសិស្សក្មេងៗថ្មីចំនួន ៣០ នាក់ មកហាត់ជាប្រចាំរៀងរាល់ល្ងាចថ្ងៃសៅរ៍ និងអាទិត្យ ដែលមានខ្ញុំ និងគ្រូជំនួយ ២ នាក់ទៀតបង្ហាត់ផ្ទាល់តែម្តង»។
លោកបានកត់សម្គាល់ថា៖ «ជាលទ្ធផលក្នុងរយៈពេលចំនួនជាង ៦ ខែកន្លងមកនេះ យើងជម្រើសបានអ្នកឆ្នើមចំនួន ១២ នាក់ឡើងប្រឡងដាក់ពិន្ទុ ដើម្បីទទួលបានខ្សែក្រវាត់ក្នុងពេលនេះតែម្តង ពោលគឺអ្នកថ្មីបានឡើងខ្សែក្រវាត់ពណ៌សជាលើកដំបូង»។
លោកបានលម្អិតថា៖ «កីឡាករប្រឡងឡើងខ្សែក្រវាត់ពណ៌សមានចំនួន ៣ នាក់ ហ្វឹកហាត់រយៈពេល ៣ ខែឡើង បានខ្សែក្រវាត់ពណ៌សឆ្នូត។ អ្នកមានខ្សែក្រវាត់សឆ្នូតចំនួន ៤ នាក់ ហ្វឹកហាត់ ៣ ខែ បានឡើងខ្សែក្រវាត់ពណ៌លឿង។ អ្នកមានខ្សែក្រវាត់ពណ៌លឿងឆ្នូតចំនួន ៥ នាក់ ហ្វឹកហាត់បន្ថែម ៣ ខែឡើង បានទទួលខ្សែក្រវាត់ពណ៌ទឹកក្រូច»។
លោកគង់ មិថុនា គ្រូបង្វឹកជំនួយ បានឲ្យដឹងថា៖ «សិស្សថ្មីមកហ្វឹកហាត់នៅទីនេះភាគច្រើនជាសិស្ស ដែលមានអាយុពី ៨ ឆ្នាំ ទៅ ១៨ ឆ្នាំមកពីសាលាផ្សេងៗពីគ្នា»។
លោកគង់ មិថុនា បានបន្តថា៖ «ចំពោះបញ្ហានៃការហ្វឹកហាត់មានតម្លៃសមរម្យ និងសម្របសម្រួលទៅតាមជីវភាពខ្វះខាតរបស់សិស្សនីមួយៗ ពោលគឺនិយាយរួមអ្នកក្រីក្រក៏អាចហ្វឹកហាត់បានដែរ»។
លោកបានបញ្ជាក់ថា៖ «ផលប្រយោជន៍សំខាន់នៃការហ្វឹកហាត់កីឡាហាប់គីដូគឺដើម្បីសុខភាពរាងកាយជាចម្បង បន្ថែមលើសពីនេះ ក្បាច់និងស្នៀតហាប់គីដូចាប់ពីខ្សែក្រវាត់ខ្មៅ ១ ដាន់ឡើងទៅជាក្បាច់គុនការពារខ្លួនបានយ៉ាងល្អ ទាំងស្នៀតកាច់ ស្នៀតដួល និងស្នៀតលោត»។
លោកគង់ មិថុនា បានបន្ថែមទៀតថា៖ «Hapkido ក៏ជាមូលដ្ឋានគ្រឹះសម្រាប់កីឡាប្រយុទ្ធនានាផងដែរ ពីព្រោះកីឡា Hapkido មានស្នៀត និងក្បាច់ប្រយុទ្ធដែលប្រឈមទៅនឹងគ្រោះថ្នាក់ខ្លាំងដល់រាងកាយ ហេតុនេះការប្រយុទ្ធគ្នាម្តងៗគេត្រូវពាក់សម្ភារការពារឲ្យបានល្អត្រឹមត្រូវទើបអនុញ្ញាតឲ្យប្រកួតបាន»៕
