ភ្នំពេញ: គណៈកម្មាធិការអូឡាំពិកអន្តរជាតិហៅកាត់ថា (IOC) បានជំរុញ និងចង្អុលបង្ហាញឲ្យក្រុមហ៊ុន Toyota របស់ប្រទេសជប៉ុន និងប្រចាំនៅព្រះរាជាណាចក្រកម្ពុជា ពិភាក្សាជាមួយគណៈកម្មាធិការជាតិអូឡាំពិកកម្ពុជា (NOCC) ដើម្បីធ្វើជាដៃគូឧបត្ថម្ភក្នុងព្រឹត្តិការណ៍កីឡាស៊ីហ្គេម លើកទី ៣២ ឆ្នាំ ២០២៣ ដែលកម្ពុជា ទទួលធ្វើជាម្ចាស់ផ្ទះនោះ។ នេះតាមការអះអាងរបស់លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃម្សិលមិញក្នុងជំនួបជាមួយក្រុមហ៊ុន Toyota នៅទីស្នាក់ការ NOCC។
លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា មានប្រសាសន៍ថា៖ «នេះគឺជាការជួបគ្នាដំបូងក្រោមការចង្អុលបង្ហាញពីគណៈកម្មាធិការអូឡាំពិកអន្តរជាតិ (IOC) ឲ្យក្រុមហ៊ុន Toyota ពិភាក្សាលើខ្ទង់ឧបត្ថម្ភសម្រាប់ជួយដល់គណៈកម្មាធិការជាតិអូឡាំពិកកម្ពុជាក្នុងកម្រិតណាមួយដែលអាចធ្វើបាន»។
លោកបន្តថា៖ «នេះវាជាពេលដ៏ល្អបំផុតសម្រាប់ព្រឹត្តិការណ៍កីឡាដ៏ធំរបស់កម្ពុជា ដែលទទួលបានការការយកចិត្តទុកដាក់គាំទ្រផ្នែកសម្ភារ លើកដំបូងពីក្រុមហ៊ុនធំល្បីបែបនេះ។ ការគាំទ្ររបស់ Toyota ទៅលើគម្រោងរបស់ NOCC នឹងជួយដល់ការផ្សព្វផ្សាយចលនាគុណតម្លៃ និងគោលការណ៍តម្លាភាពរបស់អូឡាំពិកអន្តរជាតិ។ លោក Hiroyuki Itoh ប្រធានក្រុមហ៊ុន Toyota ប្រចាំកម្ពុជា បានសាទរ និងបានមកពិភាក្សាជាមួយគណៈកម្មាធិការជាតិអូឡាំពិកកម្ពុជាយើងហើយ»។
ក្រោមកិច្ចផ្ដួចផ្ដើមរបស់ IOC ក្រុមហ៊ុន Toyota មានមហិច្ឆតា និងការតាំងចិត្តខ្ពស់ក្នុងគោលបំណងគាំទ្រដល់សកម្មភាពរបស់ NOCC សម្រាប់ព្រឹត្តិការណ៍កីឡាអូឡាំពិកនៅទីក្រុងតូក្យូឆ្នាំ ២០២០ ហើយបន្តគាំទ្រពេញទំហឹងដល់ព្រឹត្តិការណ៍កីឡាស៊ីហ្គេមលើកទី ៣២ ឆ្នាំ ២០២៣ ដែលកម្ពុជានឹងធ្វើម្ចាស់ផ្ទះ។
ប៉ុន្តែ ទោះបីជាយ៉ាងណា លោក Itoh ប្រធានក្រុមហ៊ុន Toyota ប្រចាំកម្ពុជា មានប្រសាសន៍ថា៖ «Toyota និង NOCC ចាប់ផ្តើមមានការជួបប្រជុំគ្នា ដើម្បីឲ្យមានការឧបត្ថម្ភដល់ព្រឹត្តិការណ៍កីឡារបស់គណៈកម្មាធិការជាតិអូឡាំពិកកម្ពុជាទៅតាមអ្វីដែលយើងអាចធ្វើការសហការគ្នាទៅបាន»៕