.jpg)
អត្តពលិករុស្ស៊ី ចូលរួមក្នុងកម្មវិធីបើកការប្រកួត ក្នុងនាមជាអត្តពលិកដែលតំណាងឲ្យអូឡាំពិក។ AFP
ក្រុងព្យុងឆាង: អត្តពលិករុស្ស៊ី នឹងមិនអាចចូលរួមដើរដង្ហែជាក្បួនពីក្រោយផែនទីរបស់ពួកគេឡើយក្នុងកម្មវិធីបិទការប្រកួតព្រឹត្តិការណ៍អូឡាំពិក ទីក្រុងព្យុងឆាង ឆ្នាំ ២០១៨ ក្រោយពីគណៈកម្មាធិការអូឡាំពិកអន្តរជាតិហៅកាត់ថា IOC បានបោះឆ្នោតជាឯកច្ឆន្ទក្នុងការរក្សាការដាក់បម្រាមសម្រាប់ការប្រើប្រាស់សារធាតុហាមឃាត់។
ប៉ុន្តែ IOC បានបញ្ជាក់ថា ការដាក់ពិន័យព្យួរនេះ អាចនឹងត្រូវលុបចោលវិញក្នុងពេលខាងមុខ ប្រសិនបើរកមិនឃើញករណីប្រើប្រាស់សារធាតុហាមឃាត់បន្ថែមទៀតពីព្រឹត្តិការណ៍នេះទេនោះ ក្រោយពីអត្តពលិករុស្ស៊ី ២ នាក់ត្រូវបានពិនិត្យឃើញជាវិជ្ជមានទៅលើការប្រើសារធាតុហាមឃាត់ ក្នុងទីក្រុងព្យុងឆាង។
រុស្ស៊ី ត្រូវបានគេដាក់បម្រាមកាលពីខែធ្នូ ក្នុងការចូលរួមក្នុងព្រឹត្តិការណ៍អូឡាំពិកឆ្នាំ ២០១៨ ក្រោយពីការរកឃើញពីការបន្លំនៃការប្រើប្រាស់សារធាតុញៀនក្នុងទ្រង់ទ្រាយធំ ប៉ុន្តែ អត្ដពលិកចំនួន ១៦៨ នាក់ ដែលត្រូវបានប្រកាសថា «ស្អាតស្អំ» ត្រូវបានអនុញ្ញាតឲ្យចូលរួមប្រកួតដោយមិនតំណាងឲ្យប្រទេសណាមួយឡើយ។
ពួ
កគេបានធ្វើការប្រកួតដោយតំណាងឲ្យអត្តពលិកអូឡាំពិក មកពីរុស្ស៊ី ក្រោមការណែនាំយ៉ាង តឹងរ៉ឹង ក្នុងនោះរាប់បញ្ចូលទាំងបម្រាមលើការប្រើប្រាស់ទង់ជាតិ ពណ៌តំណាងជាតិ និងចម្រៀងជាតិរបស់រុស្ស៊ី ផងដែរ។
ការបោះឆ្នោតក្នុងការរក្សាទុកនូវបម្រាមនេះ បានកើតឡើង ក្រោយពីមានការណែនាំមួយពីសំណាក់ក្រុមប្រឹក្សាប្រតិបត្តិរបស់ IOC ដែលបានជួបប្រជុំគ្នាកាលពីថ្ងៃសៅរ៍ និងកាលពីព្រឹកថ្ងៃអាទិត្យ ម្សិលមិញ ដើម្បីកំណត់ជោគវាសនារបស់រុស្ស៊ី។ IOC «អាចធ្វើការពិចារណាក្នុងការលុបចោលការដាក់ពិន័យព្យួរនេះ ក្រោយពីអត្តពលិកអូឡាំពិក មកពីប្រទេសរុស្ស៊ី បានគោរពការសម្រេចចិត្តរបស់ IOC កាលពីថ្ងៃទី ៥ ខែធ្នូ»។ នេះបើយោងទៅតាមការបញ្ជាក់របស់លោក Thomas Bach ដែលជាប្រធានរបស់ IOC។
លោក Bach បានឲ្យដឹងថា៖ «ប៉ុន្តែ អត្តពលិករុស្ស៊ី ២ នាក់ ត្រូវបានពិនិត្យឃើញជាវិជ្ជមានសម្រាប់ការប្រើប្រាស់សារធាតុហាមឃាត់នៅទីនេះក្នុងទីក្រុងព្យុងឆាង។ នេះគឺជារឿងខកចិត្តដ៏ធំមួយ និងមិនអនុញ្ញាតឲ្យ IOC លុបចោលការដាក់ពិន័យព្យួរលើរុស្ស៊ី សម្រាប់កម្មវិធីបិទការប្រកួតឡើយ»៕
