.jpg)
កីឡាករ Kreang Krai (ឆ្វេង) នឹងត្រូវប៉ះជាមួយជឹម ចិត្ត្រា។ សហការី
ភ្នំពេញ: កីឡាករប្រដាល់របស់ថៃ Kreang Krai ត្រូវបានរំពឹងទុកថា នឹងបន្ថែមស្ថិតិឈ្នះបាន ៣ ពិន្ទុក្នុងការប្រកួតជាមួយកីឡាករកម្ពុជាជឹម ចិត្រា ក្នុងព្រឹត្តិការណ៍ខ្សែក្រវាត់ខារ៉ាបាវទម្ងន់ ៦៥ គីឡូក្រាម នៅសង្វៀនអាស៊ីអាគ្នេយ៍ នារសៀលថ្ងៃទី ១៧ ខែមីនា ឆ្នាំ ២០១៨ ក្នុងសប្តាហ៍ទី ៦ ជុំទី ៣ ខណៈដែល ២ ប្រកួតកន្លងមក រូបគេឈ្នះកីឡាករខ្មែរទាំង ២ ប្រកួត។
ការយកឈ្នះលើជឹម ចិត្រា មកពីក្លិបខ្លារខិននោះ ទំនងមិនមែនជាឧបសគ្គធំសម្រាប់កីឡាករថៃ ក្នុងការធ្វើដំណើរឆ្ពោះទៅកាន់ការកក់កៅអីផ្តាច់ព្រ័ត្រនោះឡើយ។ កីឡាករកម្ពុជាម្នាក់ទៀតមឿន សុខហ៊ុច ត្រូវប្រឈមទៅនឹងជើងខ្លាំងថៃដូចគ្នា ដោយរូបគេត្រូវប៉ះជាមួយជើងខ្លាំង Sen Khum ស្របពេលដែលសុខហ៊ុច និងជឹម ចិត្ត្រា ប្រកួតកន្លងមក ឈ្នះ ១ និងចាញ់ ១ ប្រកួត មាន ៤ ពិន្ទុដូចគ្នា។
ទោះបីអ្នកប្រដាល់ខ្មែរទាំង ២ នាក់នេះចាញ់បន្តទៀតមានពិន្ទុតិចក៏នៅតែមានឱកាសបានឡើងម្នាក់ទៅដល់វគ្គផ្តាច់ព្រ័ត្រផងដែរពីព្រោះង៉ែត្ររដ្ឋា និង គឹម វាសនា បានចាញ់ ២ ប្រកួតម្នាក់ទៅហើយ។
Kreang Krai មានវ័យចាស់បន្តិចមែន ប៉ុន្តែ ២ ប្រកួតរបស់គេ បានបញ្ចប់ក្នុងលទ្ធផលល្អ ដោយបានផ្តួលកីឡាករកម្ពុជាង៉ែត្រ រដ្ឋា ឲ្យសន្លប់ក្នុងទឹកទី ៤ និងឈ្នះគឹម វាសនា ដោយពិន្ទុ។
គេជាអ្នកប្រដាល់ដែលចាស់វស្សាចិត្តធ្ងន់ ល្អជង្គង់ កែង និងកណ្ដាប់ដៃ មិនតែប៉ុណ្ណោះគេមានស្នៀតការពារបានល្អផងដែរ។ Kreang Krai មានប្រវត្តិប្រកួតចំនួន ៩៤ លើក ឈ្នះ ៧២ លើកចាញ់ ១៩ ដង ស្មើពិន្ទុ ៣ លើក និងវាយគូប្រកួតឲ្យសន្លប់បាន ១២ លើក។
ជឹម ចិត្ត្រា ពេលខ្លះរូបគេវាយបានល្អ តែពេលខ្លះក៏យ៉ាប់ និងឆាប់សន្លប់ដែរ។ ២ ប្រកួតរបស់ចិត្រា ក្នុងព្រឹត្តិការណ៍នេះ បានបញ្ចប់ដោយឈ្នះបាន ១ ប្រកួត និងចាញ់ ១ ប្រកួត។ គេមានប្រវត្តិប្រកួតចំនួន ៧៣ លើក ឈ្នះ ៥៨ លើក ចាញ់ ១៤ លើក ស្មើពិន្ទុ ១ លើក និងវាយគូប្រកួតឲ្យសន្លប់បាន ១០ ដង។
លោកស្រីឡុង រ៉ាវី អ្នកគ្រប់គ្រងជឹម ចិត្ត្រា បានបញ្ជាក់ថា កីឡាកររូបនេះហ្វឹកហាត់ និងត្រៀមបានល្អ ប៉ុន្តែការប្រកួតមិនហ៊ាននិយាយពីជ័យជម្នះមុននោះទេ ពីព្រោះសុទ្ធតែមានក្បាច់ប្តូរគ្នា។ ទោះជាយ៉ាងណាអ្នកស្រីបានបញ្ជាក់ថា ការចាញ់ ឬឈ្នះ គឺជាការវាយអស់ពីសមត្ថភាព ហើយក៏សូមផ្តាំទៅអ្នកដឹកនាំកីឡាករថៃមកប្រកួតមិនចាំបាច់បន្ធូរដៃឡើយគឺចាញ់ ឬឈ្នះតាមសមត្ថភាពពិត។
មឿន សុខហ៊ុច ក្លិបពុទ្ធសេរីវង្ស ត្រូវប៉ះ Sen Khum។ ក្នុងការប្រកួត ២ លើកកន្លងមក Sen Khum បានឈ្នះទាំង ២ ប្រកួត មាន ៦ ពិន្ទុដូច Kreang Krai ដែរ។ ចំពោះ សុខហ៊ុច វិញ ២ ប្រកួតរបស់គេ ឈ្នះមួយប្រកួត ចាញ់ ១ ប្រកួត មាន ៤ ពិន្ទុ។
SenKhum ប្រកួតចំនួន ៦៩ ដង ឈ្នះ ៦២ ចាញ់ ៦ និងស្មើពិន្ទុ ១ ដង ខណៈសុខហ៊ុច មានប្រវត្តិប្រកួតចំនួន ១៣៨ ដង ឈ្នះ ១១០ ដង ចាញ់ ២៤ ដង និងស្មើពិន្ទុ ៤ ដង៕
