Search form

Login - Register | FOLLOW US ON

Logo of Phnom Penh Post newspaper Phnom Penh Post - Man Utd និង Liverpool សម្លឹង​ការឈ្នះ​កៅអី​ផ្តាច់ព្រ័ត្រ

Content image - Phnom Penh Post
Sam Clucas (ឆ្វេង) របស់ Hull ដណ្តើម​បាល់​ជាមួយ Zlatan Ibrahimovic របស់ Man Utd​​។ Afp

Man Utd និង Liverpool សម្លឹង​ការឈ្នះ​កៅអី​ផ្តាច់ព្រ័ត្រ

ក្រុងឡុងដ៍: លោក Jose Mourinho អ្នកចាត់ការ​ទូទៅ​របស់ Manchester United បាន​សន្យាថា នឹង​ផ្តល់ការ​វាយ​សម្រុក​ដ៏ខ្លាំងក្លា​មួយ​សម្រាប់​ការប្រកួត​ពាន League Cup វគ្គ​ពាក់កណ្តាល​ផ្តាច់ព្រ័ត្រ ជើងទី ១ នៅ​រាត្រីនេះ នៅពេល​ធ្វើជា​ម្ចាស់ផ្ទះ​ទទួល​ក្រុម Hull City ដែល​លេងក្នុង​ក្របខ័ណ្ឌ Premier League តែមួយ។

Man United បានឈាន​ទៅ​ប្រកួត​ពាន FA Cup ជុំទី ៤ ដោយ​ងាយ កាលពី​ថ្ងៃសៅរ៍ ក្រោយពី​បាន​កត់ត្រា​ជ័យជម្នះ​ជាលើក​ទីជាប់ៗគ្នា​តាមរយៈ​ការផ្តួល​ក្រុម​ស្ថិតក្នុង​ក្របខ័ណ្ឌទី ២ Reading ៤-០ នៅ​កីឡដ្ឋាន Old Trafford។

ពួកគេ​នឹងត្រូវ​ប៉ះ​ជាមួយ​នឹង​ក្រុម Liverpool ដែល​ក៏ឈាន​ទៅវគ្គ​ពាក់កណ្តាល​ផ្តាច់ព្រ័ត្រ​នៃពាន League Cup ដែរនោះ ក្នុងការ​ប្រកួត​ក្របខ័ណ្ឌ​លីក​នៅចុង​សប្តាហ៍​នេះ ប៉ុន្តែ ខណៈដែល​ការឈ្នះ​កៅអី​ទៅកាន់​កីឡដ្ឋាន Wembley នៅសល់​ត្រឹមតែ ១៨០ នាទី​ទៀត លោក Mourinho មិនចង់​បោះបង់​ឱកាស​ណាមួយ​ឡើយ។

គ្រូបង្វឹក​រូបនេះ​បានឲ្យ​ដឹងថា៖ «យើង​នឹងត្រូវ​ប៉ះ​ជាមួយ​ក្រុម Liverpool ដែលជា​ការប្រកួត​ដ៏ធំ​មួយ​សម្រាប់យើង ប៉ុន្តែ យើងចង់​ឈានទៅ​វគ្គ​ផ្តាច់ព្រ័ត្រ»។

លោក Mourinho បានប្រាប់​បន្តថា៖ «ហេតុនេះ យើង​នឹងត្រូវ​ជួប​ជាមួយ​នឹង​ក្រុម Hull ដោយ​យើង​នឹង​ប្រើប្រាស់​រាល់​អ្វីដែល​យើង​មាន ថាមពល​ដែល​យើងមាន ខណៈ​យើង​ដឹងថា វាជាការ​ប្រកួត ២ ជើង ប៉ុន្តែ ជើងទី ២ គឺ​នៅក្រៅ​ដី។ ប្រសិនបើ​យើង​អាចធ្វើ​បានល្អ​ក្នុង​ជើងទី ១ ដែល​ធ្វើឲ្យ​មានប្រៀប យើង​នឹង​ព្យាយាម​ធ្វើឲ្យ​បាន»។

លោក Mourinho បានធ្វើការ​ផ្លាស់ប្តូរ​កីឡាករ​ជាច្រើន​សម្រាប់​ការប្រកួត​ជាមួយ​នឹង​ក្រុម Reading និងបាន​បញ្ជាក់ថា លោក​នឹងរក្សា​ការប្រើប្រាស់​សមាជិក​ក្រុម​ឈុតធំ​ដើម្បី​ទទួល​ក្រុម Hull។

ខ្សែ​ប្រយុទ្ធ Wayne Rooney អាច​នឹងលេង​ក្នុងនាម​ជា​កីឡាករ​បម្រុង​ពេល​ប៉ះ Hull ហើយ​ខ្សែការពារ Marcos Rojo កំពុងតែ​ស្ថិតក្នុង​ភាពប​ស្រពេចស្រពិល​ក្រោយពី​ត្រូវបាន​ប្តូរចេញ​ពេល​ប្រកួត​ជាមួយ​ក្រុម Reading ដោយសារតែ​បញ្ហា​សាច់ដុំ។

ខណៈដែល Eric Bailly នឹង​ត្រូវបំពេញ​កាតព្វកិច្ច​ក្នុង​យុទ្ធនាការ Africa Cup of Nations ជាមួយ​នឹង​ក្រុម​ជម្រើសជាតិ​កូតឌីវ័រ វាអាច​នឹងធ្វើ​ឲ្យ Phil Jones និង Chris Smalling ក្លាយជា​ខ្សែការពារ​ដែល​រឹងមាំ​គ្រប់គ្រាន់​សម្រាប់​លេង​ក្នុង​ជម្រើស​ដំបូង។

លោក Marco Silva បានចាប់ផ្តើម​ជាមួយ​នឹង​ជ័យជម្នះ​ក្នុងនាម​ជាគ្រូបង្វឹក​របស់ Hull ក្រោយពី​បានផ្តួល Swansea ២-០ ក្នុងការ​ប្រកួតពាន FA Cup កាលពី​ថ្ងៃសៅរ៍ ហើយ​លោកនឹង​រីករាយ​ក្នុងការ​ប៉ះ​ជាមួយ​នឹង​ក្រុម​របស់​លោក Mourinho។

ជាមួយ​គ្នានេះ ការរំពឹងទុក​ពីការដណ្តើម​កៅអី​ទៅ​វគ្គ​ផ្តាច់ព្រ័ត្រ​ដើម្បី​ទៅជួប Man United នឹងផ្តល់​ការលើក​ទឹកចិត្ត​ដល់ Liverpool ពេល​ពួកគេ​ធ្វើដំណើរ​ទៅ​ជួបក្រុម Southampton នៅ​ថ្ងៃពុធ សម្រាប់​ការប្រកួត​ជើងទី ១ នៃវគ្គ​ពាក់កណ្តាល​ផ្តាច់ព្រ័ត្រ​របស់​ពួកគេ។

ក្រោយពី​បាន​ប្រើប្រាស់​ក្រុម​ប្រជុំ​ដោយ​កីឡាករ​វ័យក្មេង​របស់ Liverpool ក្នុងពេល​បញ្ចប់​ក្នុង​លទ្ធផល​ស្មើ ០-០ ក្នុងការ​ប្រកួតពាន FA Cup ជាមួយ​នឹង​ក្រុម Plymouth Argyle លើ​ទឹកដី​ខ្លួនឯង​កាលពី​ថ្ងៃ​សៅរ៍ លោក​គ្រូបង្វឹក Jurgen Klopp ក៏​ត្រូវបាន​រំពឹងទុក​ថា នឹងប្រើប្រាស់​ក្រុម​ជម្រើស​ដំបូង​របស់​លោក​ផងដែរ។ ការប្រកួត​នេះនឹង​ចាប់ផ្តើម​នៅ​ម៉ោង ៣ ទៀបភ្លឺ៕

0

Comments

Please, login or register to post a comment