Search form

Login - Register | FOLLOW US ON

Logo of Phnom Penh Post newspaper Phnom Penh Post - McGlynn ស្រេកឃ្លាន​ដឹកនាំ​ បឹងកេត ​ឆ្ពោះ​ទៅរក​ជោគជ័យ

Content image - Phnom Penh Post
លោក John McGlynn ត្រៀម​រួចរាល់​ក្នុង​ការ​ដឹកនាំ​ឲ្យបឹងកេត ឆ្ពោះ​ទៅរក​ភាព​ជោគជ័យ​។ ស្រេង ម៉េងស្រ៊ុន

McGlynn ស្រេកឃ្លាន​ដឹកនាំ​ បឹងកេត ​ឆ្ពោះ​ទៅរក​ជោគជ័យ

ភ្នំពេញ: លោក John Ynwa Mcglynn បាន​សន្យាថា លោកនឹង​ខិតខំ​ប្រឹងប្រែង​ឲ្យ​អស់ពី​លទ្ធភាព​របស់​លោក​ក្នុងការ​ដឹកនាំ​ឲ្យក្លិប​បឹងកេតអង្គរ ធ្វើដំណើរ​ឆ្ពោះ​ទៅកាន់​ជ័យជម្នះ ក្រោយពី​លោក​ត្រូវបាន​តែងតាំង​ជា​គ្រូបង្វឹក​បង្គោល​ក្នុង​កិច្ចសន្យា​រយៈពេល ១ ឆ្នាំ កាលពី​ថ្ងៃចន្ទ ដើម្បី​ជំនួស​កន្លែង​របស់​លោក​ប្រាក់ សុវណ្ណារ៉ា របស់​កម្ពុជា។

នេះជា​លើកទី ២ ហើយ​ដែល​លោក McGlynn ក្លាយជា​គ្រូបង្វឹក​បង្គោល​របស់​បឹងកេត ក្រោយពី​បាន​ចំណាយពេល​ដ៏ខ្លី​ក្នុងការ​ដឹកនាំ​ក្រុម​ម្ចាស់​ជើងឯក​មិត្តហ្វូន​ខេមបូឌានលីក​រដូវកាល​ឆ្នាំ ២០១៥-២០១៦ មួយនេះ កាលពី​ឆ្នាំ ២០១៥ សម្រាប់​យុទ្ធនាការ​ដណ្តើមពាន​រង្វាន់​សម្តេច​ហ៊ុនសែន។

កាលនោះ លោក​បាន​ជួយឲ្យ​ក្រុម​បឹងកេត បញ្ចប់​ដោយ​ឈរលេខ ១ ក្នុងពូល​មួយ​ដែល​ក៏មាន​ក្រុម​ភ្នំពេញ​ក្រោន និង​ក្រសួង​ការពារជាតិ​ផងដែរ មុននឹង​ចាញ់​ក្រុម​ណាហ្គាវើល ក្នុងការ​ប្រកួត​វគ្គ ៨ ក្រុម​ចុងក្រោយ។ ប៉ុន្តែ ទោះបីជា​យ៉ាងណា លោក McGlynn ជឿជាក់ថា កំណត់ត្រា​ដ៏គួរ​ឲ្យ​ចាប់អារម្មណ៍​របស់លោក​ក្នុង​រយៈពេល​ដ៏ខ្លី​នេះ បាន​នាំឲ្យ​លោក​ត្រូវបាន​តែងតាំង​ជា​គ្រូបង្វឹក​ម្តងទៀត។

គ្រូបង្វឹក​សញ្ជាតិ​អូស្ត្រាលី​ដើមកំណើត​អង់គ្លេស​វ័យ ៤៩ ឆ្នាំ​រូបនេះ​បាន​ប្រាប់​ភ្នំពេញ ប៉ុស្តិ៍ កាលពី​ម្សិលមិញ​ថា៖ «ខ្ញុំពិតជា​រំភើប​ណាស់ ក្នុងការ​ត្រូវបាន​តែងតាំង​ជាគ្រូបង្វឹក​បឹងកេត​អង្គរ​ម្តងទៀត។ ខ្ញុំ និងក្លិប​ស្គាល់គ្នា​យ៉ាងច្បាស់ ហេតុនេះ ខ្ញុំគិតថា យើង​នឹងធ្វើ​ការងារ​ជាមួយគ្នា​បានល្អ»។

ការងារ​ដ៏ចម្បង​នៅ​ចំពោះមុខ​របស់​លោក​នាពេល​បច្ចុប្បន្ន គឺការ​ដឹកនាំ​ក្រុម​របស់​លោក​ឲ្យឆ្លង​ផុត​ការប្រកួត​ជម្រុះ​នៃពាន AFC Cup ក្នុងពេល​ប៉ះ​ជាមួយ​ក្រុមឡាវ Lao Toyota នាថ្ងៃទី ៣១ ខែមករា នៅលើ​ទឹកដី​ខ្លួនឯង មុននឹង​ប្រកួត​ជើងទី ២ នាថ្ងៃទី ៧ ខែកុម្ភៈ ខាងមុខនេះ។

លោក McGlynn បាន​ទទួល​ស្គាល់ថា៖ «គោលដៅ​របស់ខ្ញុំ​នៅពេលនេះ​គឺការដណ្តើម​ឲ្យបាន​ជ័យជម្នះ​ក្នុងការ​ប្រកួត​នេះ។ បើទោះ​បីនេះ​មិនមែនជា​ពេលវេលា​ដ៏ល្អ​បំផុត​ក្នុង​ការរៀបចំ​ក្រុម ប៉ុន្តែ វាក៏​ជា​ឱកាស​ដ៏ល្អ​មួយ​សម្រាប់​ខ្ញុំ​ផងដែរ»។

ស្របពេល​ជាមួយ​គ្នានេះ លោក​ក៏បាន​បង្ហើប​ពីការ​ជួសជុល ក៏ដូចជា​ការកែ​សម្រួល​ទៅលើ​ទម្រង់​លេង​របស់​ក្រុមថ្មី​របស់​លោក​ផងដែរ។ លោក McGlynn បានឲ្យ​ដឹងថា៖ «ខ្ញុំ​នឹងធ្វើ​ការកែប្រែ​ទម្រង់​លេង​របស់​ក្រុម​បន្តិចបន្តួច បង្វឹក​ទៅលើ​ស្មារតី​របស់​កីឡាករម្នាក់ៗ ព្រោះការ​មាន​ស្មារតី​ខុសគ្នា នឹង​នាំឲ្យ​មាន​ទម្រង់​លេង​ខុសគ្នា»។

លោក McGlynn ដែលបាន​ចំណាយពេល​រស់នៅ​កម្ពុជា រយៈពេល ៤ ឆ្នាំ​មកហើយ​នោះ បាន​ចាប់ផ្តើម​អាជីព​ក្នុង​កីឡា​បាល់ទាត់​កម្ពុជា​ជាមួយនឹង​ក្លិបកីឡា​បាល់ទាត់​ភ្នំពេញក្រោន កាលពី​រដូវកាល​ឆ្នាំ ២០១៣-២០១៤ ក្នុងនាម​ជាគ្រូបង្វឹក​ជំនួយ ហើយ​រដូវកាល​នោះ ក្រុម​របស់​លោក​បានធ្វើ​ដំណើរ​ឆ្ពោះទៅ​កាន់ការ​ឈ្នះពាន​ក្របខ័ណ្ឌ​កំពូល​របស់​កម្ពុជា។ ទោះបីជា​យ៉ាងណា គ្រូបង្វឹក​រូបនេះ ក៏ទទួល​ស្គាល់​ពីសម្ពាធ និង​ផលលំបាក​ក្នុងការ​ដឹកនាំ​ឲ្យបឹងកេត​ឆ្ពោះទៅរក​ភាព​ជោគជ័យ​ផងដែរ។

លោកបាន​បន្ថែមទៀតថា៖ «វាជា​ការងារ​ដ៏​ធំមួយ ហើយវា​មិនមែន​ជាការងារ​ងាយស្រួល​ស្រួល​ឡើយ។ ប៉ុន្តែ ខ្ញុំពិតជា​មាន​គោលដៅ​ក្នុងការ​ឈ្នះពាន​ជាច្រើន ដូចជា​មិត្តហ្វូនខេមបូឌានលីក និង​ពានរង្វាន់​សម្តេច​ហ៊ុនសែន​ជាដើម»៕

0

Comments

Please, login or register to post a comment