.jpg)
តារាឆ្នើម Lionel Messi ហ្វឹកហាត់ មុនពេលក្រុមជម្រើសជាតិអាហ្សង់ទីន ជួប អ៊ីតាលី រាត្រីនេះ។ AFP
ក្រុងមេនឆេស្ទ័រ: តារាឆ្នើម Lionel Messi នឹងចាប់ផ្តើមការធ្វើដំណើររបស់គេទៅកាន់យុទ្ធនាការ World Cup នៅរាត្រីនេះ ខណៈដែលក្រុមបាល់ទាត់ជម្រើសជាតិអាហ្សង់ទីន នឹងត្រូវប៉ះជាមួយនឹងក្រុមជម្រើសជាតិអ៊ីតាលីក្នុងការប្រកួតមិត្តភាពមួយ ដោយសង្ឃឹមថា អាចឈ្នះពានអន្តរជាតិដ៏ធំមួយក្នុងអាជីពដ៏ត្រចះត្រចង់របស់គេ។
ក្នុងក្លិប Barcelona ខ្សែប្រយុទ្ធឆ្នើម Messi បានជួបបទពិសោធនៃការទទួលជោគជ័យដ៏ធំធេង តាមរយៈការឈ្នះពាន La Liga ៨ លើក និងពានក្របខ័ណ្ឌ Champions League ៤ លើក ស្របពេលដែលរូបគេក៏បានឈ្នះពានកីឡាករឆ្នើមបំផុតប្រចាំឆ្នាំរបស់ពិភពលោក FIFA''s Ballon d''Or ៥ លើកផងដែរ។
ប៉ុន្តែ ការស្ថិតក្នុងសម្លៀកបំពាក់ពណ៌ផ្ទៃមេឃ និងឆ្នូតសរបស់ក្រុមអាហ្សង់ទីន បានផ្តល់នូវពេលវេលាដ៏គួរឲ្យឈឺចាប់បំផុតនៃអាជីពរបស់គេ។
ស្របពេលដែលកម្រទទួលបានជោគជ័យជាមួយនឹង ក្រុមអាហ្សង់ទីន មិនដូចទៅនឹងការលេងឲ្យក្លិប Barcelona កីឡាករ Messi បានស៊ូទ្រាំទៅនឹងការរិះគន់ផ្សេងៗពីសំណាក់អ្នកគាំទ្ររបស់ខ្លួនអស់រយៈពេលជាច្រើនលើក។ ពិតណាស់ មិនមាននរណាមិនចាត់ទុកថា Messi ជាកីឡាករម្នាក់ដ៏ឆ្នើមបំផុតរបស់ពិភពលោកឡើយ ប៉ុន្តែ អ្នកគាំទ្រជាច្រើនក្នុងប្រទេសអាហ្សង់ទីន ជឿជាក់ថា រូបគេមិនអាចត្រូវបានចាត់ទុកថា មានកម្រិតដូចទៅនឹងលោក Diego Maradona ឡើយ លុះត្រាតែរូបគេឈ្នះពានរង្វាន់ធំមួយជាមួយនឹងប្រទេសរបស់គេ ខណៈដែលលោក Maradona បានឈ្នះពាន World Cup ឆ្នាំ ១៩៨៦។
អ្វីដែលកាន់តែឈឺចាប់ទៅទៀតនោះគឺថា Messi បានរងបរាជ័យក្នុងការប្រកួតវគ្គផ្តាច់ព្រ័ត្រនៃយុទ្ធនាការធំ ៣ លើក ជាមួយនឹងក្រុមជម្រើសជាតិ អាហ្សង់ទីន ស្របពេលដែលពាន World Cup ឆ្នាំ ២០១៤ និងពានក្នុងព្រឹត្តិការណ៍ Copa America ឆ្នាំ ២០១៥ និងឆ្នាំ ២០១៦ សុទ្ធសឹងបានរបូតចេញពីដៃរបស់គេ។
Messi បានប្រាប់កម្មវិធីទូរទស្សន៍អាហ្សង់ទីន La Cornisa កាលពីពេលថ្មីៗថា៖ «ខ្ញុំបានយំជាច្រើនលើក ដោយសារតែការប្រកួតបែបនេះ សម្រាប់ការចាញ់ក្នុងវគ្គផ្តាច់ព្រ័ត្រ សម្រាប់អ្វីដែលពានទាំងនោះមានន័យចំពោះខ្ញុំ និងសម្រាប់ការមិនអាចសម្រេចក្តីសុបិនជាមួយនឹងក្រុមជម្រើសជាតិ។វាជាការខកចិត្តដ៏ធំមួយដែលលំបាក ក្នុងការទទួលយក»។
យុទ្ធនាការ World Cup ជាលើកកាលពីឆ្នាំ ២០១៤ ពិតជាបានផ្តល់ការខកចិត្តដ៏ធំចំពោះ Messi ខណៈដែលរូបគេបានខ្ជះខ្ជាយឱកាសមាសមួយក្នុងការជួយឲ្យអាហ្សង់ទីនមានគ្រាប់បាល់នាំមុខមុនក្នុងវគ្គផ្តាច់ព្រ័ត្រ នៅពេលប្រកួតជាមួយនឹងក្រុមជម្រើសជាតិអាល្លឺម៉ង់ ដែលបានបន្តយកឈ្នះ ១-០ នៅនាទីបន្ថែម ១៥ នាទី ២ ដង។
អ្វីដែលកាន់តែល្វីងជូរចត់ទៅទៀតនោះគឺថា រូបគេបានស៊ុតបាល់ប៉េណាល់ទីកាត់សេចក្តីមិនចូលទីជាលើកទី ១ ក្នុងអាជីពរបស់គេ នៅពេលដែលក្រុមជម្រើសជាតិអាហ្សង់ទីន ចាញ់ក្រុមជម្រើសជាតិស៊ីលី ក្នុងការប្រកួត Copa America វគ្គផ្តាច់ព្រ័ត្រ កាលពី ២ ឆ្នាំមុន។
បើទោះបី Messi នៅតែស្ថិត ក្នុងកម្រិតលេងដ៏កំពូលរបស់គេក៏ដោយ ខ្សែប្រយុទ្ធវ័យ ៣០ ឆ្នាំរូបនេះ ដឹងថា World Cup នៅរុស្ស៊ី ដែលនឹងចាប់ផ្តើមនៅខែមិថុនា អាចនឹងក្លាយជាឱកាសជាលើកចុងក្រោយរបស់គេ ក្នុងការដណ្តើមយកពានមាសដ៏ល្បីល្បាញបំផុតមួយនេះ។ រូបគេអាចនឹងនៅតែលេងក្នុងអាជីពជាកីឡាកររបស់គេ នៅត្រឹមយុទ្ធនាការ World Cup ឆ្នាំ ២០២២ ក្នុងប្រទេសកាតា ប៉ុន្តែ វ័យរបស់គេក៏កាន់តែចាស់ផងដែរ។ ការប្រកួតនេះនឹងចាប់ផ្តើមនៅម៉ោង ២:៤៥ ទៀបភ្លឺ៕
