ក្រុងឡុងដ៍: ការធ្វើដំណើររបស់ក្រុម Manchester United ទៅកាន់ទឹកដីក្រុម Sevilla ក្នុងការប្រកួតក្របខ័ណ្ឌ Champions League នៅរាត្រីនេះ គឺជាប្រភេទនៃឱកាសសម្រាប់ក្រុមយក្សរបស់អង់គ្លេសមួយនេះ ក្នុងការបង្ហាញពីភាពខ្លាំងរបស់ខ្លួន ក្រោយពីបានចំណាយប្រាក់ ៨៩ លានផោន (ស្មើ ១២៥ លានដុល្លារអាមេរិក) ដើម្បីទិញយក Paul Pogba ក្នុងរយៈពេលត្រឹមតែ ៤ ឆ្នាំ ក្រោយពីរូបគេបានចាកចេញពីកីឡដ្ឋាន Old Trafford ទៅកាន់ Juventus ដោយគ្មានតម្លៃខ្លួន។
ប៉ុន្តែ វានៅតែមិនទាន់ច្បាស់នៅឡើយទេថា ខ្សែបម្រើអន្តរជាតិបារាំងរូបនេះ អាចចូលលេងក្នុងជម្រើសដំបូងនាកីឡដ្ឋាន Sanchez Pizjuan សម្រាប់ការប្រកួតជើងទី ១ នៃវគ្គ ១៦ ក្រុមចុងក្រោយ ដោយសារតែការធ្លាក់ចុះទម្រង់លេង និងបញ្ហានៃភាពរឹងមាំរបស់គេ ឬយ៉ាងណាឡើយ។
Pogba មិនធ្លាប់លេងឲ្យបានរយៈពេល ៩០ នាទីពេញសោះ ក្នុងរយៈពេល ១ ខែមកហើយ ខណៈដែលរូបគេមិនត្រូវបានប្រើប្រាស់ដោយលោក Jose Mourinho ឡើយក្នុងពេលពួកគេបានរងបរាជ័យក្រោមស្នាដៃក្រុម Tottenham និង Newcastle ស្របពេលរូបគេ ក៏ត្រូវបានមើលរំលងដោយ គ្រូបង្វឹកសញ្ជាតិព័រទុយហ្គាល់រូបនេះផងដែរ ក្នុងពេលពួកគេបានយកឈ្នះលើក្រុម Huddersfield នាកីឡដ្ឋាន Old Traford។
បណ្តញសារព័ត៌មានជាច្រើនក្នុងប្រទេសបារាំង បានចេញផ្សាយកាលពីសប្តាហ៍មុនថា Pogba មិនពេញចិត្តនឹងតួនាទីដែលត្រូវបានផ្តល់ឲ្យរូបគេដោយលោក Mourinho ឡើយ ជាពិសេសការដាក់ឲ្យ រូបគេលេងក្នុងតំបន់ការពារដោយគ្រូបង្វឹករូបនេះ។
លោក Mourinho បានបញ្ជាក់ថា Pogba នឹងលេងក្នុងតួនាទីដែលរូបគេពេញចិត្តនៅតំបន់បម្រើស្លាប ក្នុងពេល Man United ដណ្តើមបានជ័យជម្នះក្នុងពាន FA Cup លើទឹកដីក្រុម Huddersfield កាលពីថ្ងៃសៅរ៍ ប្រសិនបើរូបគេមិនត្រូវបានលុបឈ្មោះចេញនៅមុនពេលការប្រកួតដោយសារតែបញ្ហាជំងឺទេនោះ។
វត្តមានរបស់តារាឆ្នើម Alexis Sanchez នៅតំបន់ប្រយុទ្ធខាងឆ្វេងរបស់ Man United កាលពីខែមករា កាន់តែធ្វើឲ្យមិនមានភាពស៊ីចង្វាក់គ្នាកាន់តែខ្លាំង ខណៈដែល Pogba និងតារាឆ្នើមអន្តរជាតិស៊ីលីរូបនេះ មិនទាន់បានចូលលេងរួមជាមួយគ្នារយៈពេល ៩០ នាទីពេញនៅឡើយទេ។
លោក Mourinho បានចាត់ទុកពាក្យចរចាមអារ៉ាមផ្សេងៗទៅលើការបែកបាក់ទំនាក់ទំនងរវាងរូបលោក និង Pogba គឺជារឿងកុហក ប៉ុន្តែ លោកមិនបានលាក់បាំងពីការរិះគន់របស់លោកលើទម្រង់លេងរបស់កីឡាករវ័យ ២៤ ឆ្នាំរូបនេះឡើយ។
គ្រូបង្វឹកសញ្ជាតិព័រទុយហ្គាល់រូបនេះបានឲ្យដឹងថា៖ «នៅពេលនេះ រូបគេលេងមិនបានល្អឡើយ ហើយក្រុមក៏ត្រូវការរូបគេក្នុងកម្រិតដ៏ល្អមួយដែរ»។
ការប្រកួតទាំង ២ គូ នៅរាត្រីនេះនឹងចាប់ផ្តើមនៅម៉ោង ២:៤៥ ទៀបភ្លឺ៕