ភ្នំពេញ: អង្គភាព ONE Fighting Championship (ONE FC) នឹង​ធ្វើឲ្យ​សង្វៀន Stadium Putra ក្នុង​ទីក្រុង​គូឡាឡាំពួក​ក្រើក​ម្តង​ទៀត​ជាមួយ​នឹង​ព្រឹត្តិការណ៍​នៃ​ការ​ប្រកួត​យុទ្ធគុន​ចម្រុះ​នៅ​ថ្ងៃ​ទី​១៧ ខែ​តុលា ដែល​ត្រូវ​បាន​ដាក់​ឈ្មោះ​ថា ONE FC: Roar of Tigers​។ ការ​ប្រកួត​ចំនួន​បួន​គូ​ទៀត​ត្រូវ​បាន​ប្រកាស​បញ្ចូល​សម្រាប់​កម្មវិធី​ដ៏រំភើប​មួយ​នេះ ដែល​នឹង​ត្រូវ​ដាក់​ការ​ប្រកួត​ក្នុង​ទម្រង់​៦៥,៨​គីឡូក្រាម​រវាង​កីឡាករ “Ruthless” Rob Lisita (ឈ្នះ​១៤​លើក និង​ចាញ់​៦​លើក និង​កីឡាករ​មិន​ស្គាល់​ចាញ់ Marat Gafurov (ឈ្នះ​៩​លើក មិន​ដែល​ចាញ់) របស់​រុស្ស៊ី ធ្វើ​ជា​គូឯក​។ តារា​ឆ្នើម​របស់​ម៉ាឡេស៊ី Peter Davis នឹង​ត្រូវ​វិល​ទៅ​កាន់​សង្វៀន​ដាក់​ទ្រុង​របស់ ONE FC នៅពេល​ដែល​រូប​គេ​ប៉ះ​ជាមួយ​នឹង​កីឡាករ​សញ្ជាតិ​ហ្វីលីពីន Vaughn Donayre ក្នុង​ប្រភេទ​ទម្ងន់​៧០,៣​គីឡូក្រាម​។