Search form

Login - Register | FOLLOW US ON

Logo of Phnom Penh Post newspaper Phnom Penh Post - Ronaldo និង​លោក Ranieri ឈ្នះពាន​ពី FIFA

Content image - Phnom Penh Post
Ronaldo ថើប​ពាន​កីឡាករ​ឆ្នើម​ប្រចាំឆ្នាំ​របស់ FIFA ក្នុង​កម្មវិធី​ប្រគល់​រង្វាន់​។ Afp

Ronaldo និង​លោក Ranieri ឈ្នះពាន​ពី FIFA

ក្រុងហ្សួរិច: ខ្សែប្រយុទ្ធ Cristiano Ronaldo បានឈ្នះ​ពានរង្វាន់​កីឡាករ​ឆ្នើម​បំផុត​ប្រចាំឆ្នាំ​របស់ FIFA កាលពី​ថ្ងៃចន្ទ ដែល​ពានថ្មី​ចុងក្រោយ​គេ​សម្រាប់​តារា​ឆ្នើម​របស់ក្លិប Real Madrid និងក្រុម​ជម្រើសជាតិ​ព័រទុយហ្គាល់​រូបនេះ ក្រោយ​ជួបឆ្នាំ​ដ៏ត្រចះ​ត្រចង់​ក្នុងឆ្នាំ ២០១៦ ជាមួយ​ទាំងក្លិប និងប្រទេស​របស់គេ។

លោក Claudio Ranieri គ្រូបង្វឹក​របស់​ក្រុម Leicester City បានឈ្នះ​ពាន​ក្នុងនាម​ជាគ្រូបង្វឹក​ឆ្នើម​បំផុត​ប្រចាំឆ្នាំ ក្រោយពី​ក្រុមរបស់​លោក​បានឈ្នះ​ពានក្របខ័ណ្ឌ Premier League ដ៏មិន​នឹកស្មាន​ដល់។

ប៉ុន្តែ ការចាប់អារម្មណ៍​ផ្សេងៗ​នារាត្រី​នេះបាន​ធ្លាក់​ទៅលើ Ronaldo វ័យ ៣១ ឆ្នាំ ម្តងទៀត ក្រោយពី​រូបគេ​បាន​យកឈ្នះ​លើ​ខ្សែប្រយុទ្ធ Lionel Messi ដើម្បី​ឈ្នះពាន​កិត្តិយស​នេះ ក៏ដូចជា​ខ្សែប្រយុទ្ធ​អន្តរជាតិ​បារាំង Antoine Griezmann ដែល​ជាប់ឈ្មោះ​ជាកីឡាករ​ឆ្នើម​ប្រចាំឆ្នាំ​ក្នុងព្រឹត្តិការណ៍​ជើងឯក​ប្រចាំ​ទ្វីបអឺរ៉ុប កាលពី​ឆ្នាំមុន។

Ronaldo បានឈ្នះ​ពានរង្វាន់​បាល់មាស Ballon d'Or រួចជាស្រេច ក្រោយពី​ឈ្នះពាន Champions League ជា​លើកទី ៣ របស់គេ តាមរយៈ​ការ​ស៊ុតបាល់​បញ្ចូលទី ១៦ គ្រាប់​ក្នុងការ​ប្រកួត ១២ លើក ក៏ដូចជា​ឈ្នះពាន​ជាមួយ​ក្រុម​ជម្រើសជាតិ​ព័រទុយហ្គាល់ ក្នុង Euro ឆ្នាំ ២០១៦ ដែលជា​ពានរង្វាន់​ធំដំបូង​គេរបស់​ប្រទេស​នេះ។ ក្រោយពី​ត្រូវបាន​ពាននេះ​ពីលោក Gianni Infantino ប្រធាន​របស់ FIFA ខ្សែប្រយុទ្ធ Ronaldo បានឲ្យ​ដឹងថា៖ «២០១៦ គឺជា​ឆ្នាំ​ដ៏ល្អ​បំផុតនៃ​អាជីព​របស់ខ្ញុំ»។

លោក Ranieri វ័យ ៦៥ ឆ្នាំ ដែល​បានផ្តួល​លោក Zinedine Zidane គ្រូបង្វឹក​របស់ Real និងលោក Fernando Santos គ្រូបង្វឹក​របស់​ក្រុមព័រទុយហ្គាល់​នោះ បានឲ្យ​ដឹងថា ពានកិត្តិយស​ក្នុងនាម​ជាគ្រូបង្វឹក​ឆ្នើម​បំផុតនេះ គឺជា​សមិទ្ធផល​ដ៏មិនគួរ​ឲ្យជឿ ក្រោយពី​លោក​បាន​ទទួលពាន​នេះពី​អតីតកីឡាករ​ឆ្នើម​របស់​អាហ្សង់ទីន​គឺលោក Diego Maradona។

ម៉ាឡេស៊ី រំភើប​ក្រោយ​ឈ្នះ​រង្វាន់​គ្រាប់បាល់​ល្អ​ប្រចាំឆ្នាំ​ពី FIFA

អ្នកគាំទ្រ​វិស័យ​កីឡាបាល់ទាត់​ម៉ាឡេស៊ី បាន​ជួប​ការរំភើប​រីករាយ​យ៉ាងខ្លាំង​កាលពី​ថ្ងៃអង្គារ ក្រោយពី​បានដឹង​នូវ​ព័ត៌មាន​កីឡាករ​រួមជាតិ​របស់គេ​បានឈ្នះ​ពានរង្វាន់​គ្រាប់​បាល់ល្អ​ជាងគេ​ប្រចាំឆ្នាំ​របស់ FIFA សម្រាប់​ការ​ស៊ុតបាល់​ពិន័យ Free-kick កោង​ចុះឡើង​ចូលទី​យ៉ាង​អស្ចារ្យ​របស់គេ។

គ្រាប់បាល់​យ៉ាងល្អ​របស់​ខ្សែបម្រើ Mohamad Faiz Subri សម្រាប់​ក្លិប Penang FA ក្នុងការប្រកួត​ក្របខ័ណ្ឌ​ម៉ាឡេស៊ី Super League កាលពី​ខែកុម្ភៈ នាំឲ្យ​មានការ​ចងចាំ​ដល់​គ្រាប់បាល់​ដ៏អស្ចារ្យ​របស់​អតីត​ខ្សែការពារ​អន្តរជាតិ​ប្រេស៊ីល Roberto Carlos នៅពេល​ប្រកួត​ជាមួយនឹង​ក្រុមបារាំង កាលពី​ឆ្នាំ ១៩៩៧។

Faiz Subri បានទទួល​សំឡេង​គាំទ្រ​ជិត ៦០ ភាគរយ​ក្នុងការ​បោះឆ្នោត​ទូទាំង​ពិភពលោក​លើ​គេហទំព័រ​របស់ FIFA។

ខ្សែបម្រើ​រូបនេះ បាន​ថ្លែង​អំណរគុណ​ដល់​គ្រូបង្វឹក ក្រុម និង​ក្រុមគ្រួសារ​របស់គេ ខណៈដែល​រូបគេ​បានទទួល​ពាននេះ​ក្នុង​កម្មវិធី​ប្រជុំ​ដោយ​តារា​ឆ្នើមៗ​មួយ​របស់ FIFA នៅ​ទីក្រុង Zurich កាលពី​រាត្រី​ថ្ងៃចន្ទ ដើម្បី​ក្លាយជា​កីឡាករ​អាស៊ី​ដំបូងគេ​ក្នុងការ​ឈ្នះពាន​ដ៏ល្បី​ឈ្មោះថា Puskas Award នេះ។

រូបគេ​បានឲ្យ​ដឹងថា៖ «ខ្ញុំមិន​ធ្លាប់​គិតថា ខ្ញុំនឹង​មកដល់​កម្រិត​នេះ និងអាច​ឈរ​ជាមួយ​នឹង​កីឡាករ​កម្រិត​ពិភពលោក​នៅ​កន្លែង​ដ៏អស្ចារ្យ​នេះឡើយ»៕

0

Comments

Please, login or register to post a comment