ជនភៀសខ្លួនពីសង្គ្រាម Shakhtar Donetsk នឹងត្រូវធ្វើដំណើរទៅកាន់ការប្រកួតក្របខ័ណ្ឌ Champions League នៅរាត្រីនេះ ជាមួយនឹងក្រុមយក្សរបស់អ៊ីតាលី AS Roma ទាំងការជឿជាក់ បើទោះបីមិនបានទិញចូលកីឡាករថ្មីៗច្រើន និងខ្វះការហ្វឹកហាត់ក៏ដោយ។
សង្គ្រាមនៅភាគខាងកើតនៃប្រទេសអ៊ុយក្រែន រវាងកងកម្លាំងរដ្ឋាភិបាល និងក្រុមបះ-បោរដែលគាំទ្រដោយរុស្ស៊ី បានបង្ខំឲ្យ Shakhtar ត្រូវធ្វើការប្រកួតក្នុងផ្ទះខ្លួនឯង ឆ្ងាយពីកីឡដ្ឋាន Donbass Arena អស់រយៈពេល ៤ ឆ្នាំមកហើយ។
កាលពីឆ្នាំ ២០១៤ ក្លិបនេះបានផ្ទេរទៅកាន់ទីក្រុង Lviv ដែលជាតំបន់ភាគខាងលិចរបស់អ៊ុយក្រែន ជាប់ទៅនឹងប្រទេសប៉ូឡូញ ប៉ុន្តែ អ្នកគាំទ្រក្នុងតំបន់នោះ ដែលភាគច្រើនជាអ្នកគាំទ្ររបស់ក្លិប Karpaty ជារឿយៗបានបង្ហាញពីការប្រឆាំងនឹងក្លិបមានមូលដ្ឋាននៅទីក្រុង Donetsk មួយនេះ ឬក៏មិនចាប់អារម្មណ៍តែម្តង។
កាលពីឆ្នាំមុន ម្ចាស់ក្លិបរបស់ Shakhtar បានសម្រេចចិត្តផ្លាស់ប្តូរទីតាំងនៃទីលានរបស់ខ្លួនទៅកាន់ទីភាគខាងកើតគឺ Kharkiv ដែលមានចម្ងាយប្រមាណជា ២៥០ គីឡូម៉ែត្រ ពីទីក្រុងដើម Donetsk របស់ពួកគេ។
Shakhtar ដែលជាក្លិបតែមួយមកពីអឺរ៉ុបខាងកើតមានវត្តមានក្នុងក្របខ័ណ្ឌ Champions League វគ្គ ១៦ ក្រុមចុងក្រោយនេះ នឹងធ្វើជាម្ចាស់ផ្ទះទទួលក្រុម Roma នៅកីឡដ្ឋាន Metalist Kharkiv។
ជម្លោះក្នុងប្រទេសអ៊ុយក្រែន បានធ្វើឲ្យលោកមហាសេដ្ឋី Rinat Akhmetov ម្ចាស់ក្លិប Shakhtar បោះបង់ការគ្រប់គ្រងរបស់ខ្លួនទៅលើអណ្តូងរ៉ែ និងរោងចក្រចម្រាញ់លោហធាតុជាច្រើនដែលមានទីតាំងស្ថិតនៅតំបន់កាន់កាប់ដោយក្រុមបះបោរនៅភាគខាងកើត។
បញ្ហានេះ បានធ្វើឲ្យលោកមហាសេដ្ឋី Akhmetov ខាតបង់ប្រាក់ជាច្រើន ក៏ដូចជារំខានដល់ការទិញចូលកីឡាករថ្មី និងបង្ខំឲ្យម្ចាស់ក្លិបរូបនេះ ផ្តោតលើការរក្សាកីឡាករបរទេសដែលមានស្រាប់ ក៏ដូចជាបង្ខំចិត្តប្រើប្រាស់កីឡាករដែលមានទេពកោសល្យក្នុងស្រុក។
Shakhtar មិនបានធ្វើការហ្វឹកហាត់ច្រើនឡើយ ដោយសារតែការសម្រាករយៈពេល ២ ខែ ប៉ុន្តែបានកម្តៅសាច់ដុំសម្រាប់ការប្រកួត Champions League នៅរាត្រីនេះ តាមរយៈការផ្តួលក្រុម Chornomorets Odesa ៥-០ កាលពីថ្ងៃសុក្រ នៅពេលដែលក្របខ័ណ្ឌលីកអ៊ុយក្រែន បានចាប់ផ្តើមប្រកួតជាមួយ។
ការប្រកួតទាំង ២ គូ នៅរាត្រីនេះនឹងចាប់ផ្តើមនៅម៉ោង ២:៤៥ ទៀបភ្លឺ៕