Search form

Login - Register | FOLLOW US ON

Logo of Phnom Penh Post newspaper Phnom Penh Post - OPEC នឹង​ព្យាយាម​សម្រេច​​ឲ្យ​បាន​កិច្ចព្រមព្រៀង​មួយ

OPEC នឹង​ព្យាយាម​សម្រេច​​ឲ្យ​បាន​កិច្ចព្រមព្រៀង​មួយ

ក្រុងបាងកកៈ ប្រទេស​ជា​សមាជិក​អង្គការ​នាំ​ចេញ​ប្រេង ​(​OPEC) នឹង​ព្យាយាម​​បង្កើន​តម្លៃ​ប្រេង​នៅ​ទីក្រុង​វីយែន​ ប្រទេស​អូទ្រីស​នៅ​​ថ្ងៃ​ពុធ​សប្តាហ៍​​នេះ​តាមរយៈ​ការ​សម្រេច​បាន​ការ​​​​​កាត់​បន្ថយ​ទិន្នផល​លើក​ដំបូង​របស់​ខ្លួន​​នៅក្នុង​រយៈពេល​ ៨ ​ឆ្នាំ​ទោះបី​ជា​​កិច្ចព្រមព្រៀង​មួយ​នៅ​ឆ្ងាយ​ពី​​ភាព​ប្រាកដប្រជា​ក្តី។

ការ​បរាជ័យ​ក្នុង​ការ​ទទួល​បាន​កិច្ចព្រមព្រៀង​នេះ​អាច​ធ្វើ​ឲ្យ​តម្លៃ​ប្រេង​ធ្លាក់​ចុះ​ហើយ​អាច​ជំរុញ​ឲ្យ​មាន​ការ​ចាប់ផ្ដើម​ឡើង​វិញ​នូវ​ការ​ពិភាក្សា​អំពី​គោលបំណង​របស់​អង្គការ OPEC ដែល​មាន​អាយុ​ ៥៦ ​ឆ្នាំ​មួយ​នេះ។

លោក Alexandre Andlauer អ្នក​វិភាគ​ក្នុង​វិស័យ​ថាមពល​​បាន​ប្រាប់​ទីភ្នាក់ងារ​ព័ត៌មាន AFP ​ថា​ការ​មិន​ទទួល​បាន​កិច្ចព្រមព្រៀង​មួយ «អាច​ជា​ការ​បញ្ចប់​របស់​ OPEC»។ ភាព​​ទុទិ្ទដ្ឋិនិយម​អំពី​ចក្ខុវិស័យ​សម្រាប់​កិច្ចព្រមព្រៀង​មួយ​​បាន​ធ្វើឲ្យ​តម្លៃ​ប្រេង​ធ្លាក់​ចុះ​កាន់​តែ​ទាប​កាលពី​ថ្ងៃ​សុក្រ។

កាលពី​ខែ​កញ្ញា​អង្គការ​ OPEC បាន​យល់ព្រម​ជា​គោលការណ៍​​ក្នុង​ការ​កាត់​បន្ថយ​​​ការ​​ផលិត​​មក​នៅ​ត្រឹម​ចន្លោះ​ពី ៣២,៥ ទៅ ៣៣ លាន​បារ៉ែល​​ក្នុង​មួយ​ថ្ងៃ​ដែល​មាន​ន័យ​ថា​​កាត់​បន្ថយ​ចន្លោះ​ពី​ ៦ សែន​ទៅ ១,១ ​លាន​បារ៉ែល​ក្នុង​មួយ​ថ្ងៃ​។

ប្រទេស​សមាជិក​ទាំង​ ១៤​ របស់​ OPEC សង្ឃឹម​ថា​ការណ៍​​នេះ​នឹង​កាត់​បន្ថយ​​ការ​ផ្គត់ផ្គង់​លើស​តម្រូវ​ការ​​​ដ៏ច្រើន​ និង​​បង្កើន​តម្លៃ​ទីផ្សារ​របស់​​ប្រេង​ពី​កម្រិត​អាក្រក់​បំផុត​នៅ​ពេល​បច្ចុប្បន្ន​របស់​ខ្លួន​​ក្រោម​ ៥០ ​ដុល្លារ​ក្នុង​មួយ​បារ៉ែល​។

វា​ក៏​បង្ហាញ​ផង​ដែរ​នូវ​ការ​បញ្រ្ចាស​នៃ​យុទ្ធសាស្ដ្រ​រយៈពេល​​ពីរ​ឆ្នាំ​របស់​អារ៉ាប៊ីសាអ៊ូឌីត​ក្នុង​ការ​ធ្វើ​ឲ្យ​ប្រេង​ជន់លិច​ទីផ្សារ​ដើម្បី​សម្លាប់​គូ​ប្រជែង​របស់​ខ្លួន​ជាពិសេស​​​​ក្រុមហ៊ុន​ផលិត​ប្រេង​ពី​ថ្ម​សែល​របស់​សហរដ្ឋ​អាមេរិក​៕ LA

0

Comments

Please, login or register to post a comment