Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្មវិធី​ប្រកួត​ភាពយន្ត​ខ្លី K-Film ប្រកាស​ជយលាភី​រដូវកាល​ទី ៣

Content image - Phnom Penh Post
ក្រុម​ផលិត​ករវ័យ​ក្មេង និង​ក្រុម​ការងារ​របស់​ភ្នាក់ងារ Kotra នាពេល​ប្រគល់​រង្វាន់​ដល់ម្ចាស់​ជយ​លាភី​ទាំងបីរូប។ ហុង មិនា

កម្មវិធី​ប្រកួត​ភាពយន្ត​ខ្លី K-Film ប្រកាស​ជយលាភី​រដូវកាល​ទី ៣

ភ្នំពេញៈ ភាពយន្ត​ខ្លី​រឿង​ «Life and Light»​ ជា​វណ្ណកម្ម​របស់​ផលិតករ​វ័យ​ក្មេង​ឈ្មោះ ឈិន ឡុង បាន​ទទួល​ជយលាភី​ចំណាត់​ថ្នាក់លេខ ១ ពី​កម្មវិធី​ប្រកួត​ប្រជែង​ភាពយន្ត​ខ្នាតខ្លី ឬ​ K-Film Contest ដែល​រៀបចំ​ដោយ​ទីភ្នាក់ងារ​ជំរុញ​ការ​វិនិយោគ​ពាណិជ្ជកម្ម​កូរ៉េហៅកាត់​ថា​ភ្នាក់ងារ KOTRA នោះ​បាន​ប្រគល់​រង្វាន់​ដល់​ម្ចាស់​ជយលាភី​រដូវកាល​ទី ៣ កាល​ពី​ថ្ងៃទី ៩ ខែមីនា ឆ្នាំ ២០១៦ កន្លងមក​ ក្រោម​ប្រធានបទ​ឈ្មោះ​ថា «ពន្លឺ និង​ភូមិខ្ញុំ» សម្រាប់​ដំណាក់​កាលទី ៣ នៃការ​ផលិត​ភាពយន្តក្រោម ៣ នាទី។

Content image - Phnom Penh Post
ឈិន ឡុង ជា​ម្ចាស់​ជយលាភី​លេខ ១។ ហុង មិនា

ចំពោះ​ប្រធានបទ «ពន្លឺ និង​ភូមិ​ខ្ញុំ»​ ឆ្លុះបញ្ចាំង​ពី​ទិដ្ឋភាព​នៃ​ជីវិត​របស់​ប្រជាជន​ខ្មែរ​ដែល​រស់នៅ​ក្នុង​ភូមិ​ធម្មជាតិ​សម្តេច​តេជោ ឃុំស្រអែម ស្រុកជាំក្សាន្ត​ ខេត្ត​ព្រះវិហារ​ ដែល​កំពុង​តែ​ជួបនឹង​ផលលំបាក​ខ្វះខាត​នូវ​ថាម​ពលពន្លឺ​ ឬអគ្គិសនី​ប្រើប្រាស់​ប្រចាំថ្ងៃ​ ខណៈ​ភ្នាក់ងារ KOTRA បាន​នាំ​យកនូវ​សម្ភារ និងឧប​ករណ៍បន្ទះ​សូឡា​ប្រើពន្លឺ​ព្រះអាទិត្យ​របស់​ក្រុមហ៊ុនកូរ៉េ​ឈ្មោះ Dawon ទៅ​ចែក​ជូន​ប្រជាជន​ចំនួន ៥០ គ្រួសារ​ជា​អាទិភាព​មុន​ដំបូង​គេ។

ជយ​លាភីលេខ ១ ទទួល​បាន​រង្វាន់​កា​មេរ៉ា​មួយ​គ្រឿងតម្លៃ ៥០០ ដុល្លារ បានទៅ​លើ​ផលិត​ករ ឈិន ឡុង ចំណែក​ឯលេខ ២ បានទៅ​លើ​ផលិត​ករ ស្វាយ លីម៉េង បាន​ទទួល​រង្វាន់​កាមេរ៉ា​មួយ​គ្រឿង​តម្លៃ ៤០០ ដុល្លារ ជាមួយ​ភាពយន្ត​ខ្លីរឿង «Light and Future» ដែល​សាច់​រឿង​និយាយ​ពី​ជីវិត​តស៊ូរបស់​កុមារា​ម្នាក់ទ្រាំ​រស់​នៅ​ក្នុង​ស្ថានភាព​លំបាក​ ហើយអនាគត​របស់គេ​នឹង​ប្រែប្រួល​ក៏ដោយ​សារ​ពន្លឺនៃ​ជីវិត។​ ជយលាភីលេខ ​៣ បាន​ទៅ​លើ​ផលិត​ករ​ស្រី កញ្ញា កែវ ចរិយា ដោយ​ទទួល​បាន​រង្វាន់​ឧបករណ៍​អគ្គិសនី​ Multi-Sunlight មួយ​គ្រឿងរបស់​ក្រុមហ៊ុន Dawon។

ឈិន ឡុង បាន​ប្រាប់​ពី​អត្ថន័យ​នៃ​សាច់រឿង​ខ្លួនថា៖ «ភាពយន្តនេះ​ចង់​បង្ហាញ​ពី​ស្ថានភាព​ជីវិត​ប្រជាជន​ដែល​ខ្វះខាត​នូវ​ថាមពល​ពន្លឺ​ ឬអគ្គិ​សនី​ប្រើប្រាស់​ប្រចាំថ្ងៃ និងភាព​រីករាយ​នៃ​ជីវិត​របស់​ពួកគាត់​បន្ទាប់ពី​បាន​ទទួលសម្ភារ​ និង​ឧប​ករណ៍បន្ទះ​សូឡា​ប្រើពន្លឺ​ព្រះអាទិត្យ​ពីកូរ៉េ»។

កញ្ញា កែវ ចរិយា សម្តែង​អារម្មណ៍​ត្រេកអរ និងកោត​សរសើ​រនូវ​កម្មវិធី K-Film Contest នេះ​ថា៖ «ទោះបី​ជាលើក​ដំបូង​នេះ​សម្រាប់​នាងខ្ញុំ ទទួល​បាន​នូវចំណាត់​ថ្នាក់លេខ ៣ ក្តី តែ​វាជា​ការ​លើកទឹក​ចិត្តមួយ​ទៅលើ​សមិទ្ធផល​ស្នាដៃ​ខ្លួនឯង​ដែល​បាន​ខិតខំ។ Kotra រៀប​ចំកម្មវិធី K-Film Contest​ នេះ​ឡើង​មាន​លក្ខណៈល្អ និង​ជា​សកម្មភាព​លើក​ទឹកចិត្ត​ទៅ​ដល់​ផលិតករ​ក្មេងៗ​ឲ្យខិតខំ​ប្រឹងប្រែង​បង្កើត​ស្នាដៃ​ផ្ទាល់​ខ្លួន​បន្ថែម​ទៀត​ដើម្បីរក្សា​នូវ​តម្លៃលើ​វិស័យ​ភាពយន្ត​ខ្លួន​ឯងឲ្យ​បានល្អ​ប្រសើរ»។

លោក វ៉ែន សិទ្ធិ ប្រធាន​គ្រប់គ្រង​ទូទៅ​នៃ​កម្មវិធី​ប្រកួត​ប្រជែង​ភាពយន្ដ​ខ្នាតខ្លី​បាន​ឲ្យ​ដឹងថា៖ «កម្មវិធី​នេះ​ប្រារព្ធ​ធ្វើ​ឡើងក្នុង​គោល​បំណង​ចូល​រួមជួយ​ផ្សព្វផ្សាយ និងលើក​ស្ទួយវិស័យ​ឧស្សាហកម្ម​ភាពយន្ត​តាមរយៈ​ស្នាដៃ​ផលិត​រឿង​ខ្លីៗរបស់​ផលិតករ​ខ្មែរ​នាសម័យ​ក្រោយ និង​ចង់រួម​ចំណែក​ក្នុង​សកម្មភាព​ល្អ​ៗនៅ​សង្គម​ខ្មែរ»៕

0

Comments

Please, login or register to post a comment