Search form

Login - Register | FOLLOW US ON

Logo of Phnom Penh Post newspaper Phnom Penh Post - ករុណា ពេជ្រ ដឹក​ដៃគូ​ដណ្ដឹង​រៀបការ​ឆ្នាំ ២០១៨

Content image - Phnom Penh Post
លោក ករុណា ពេជ្រ និង​នារី​ជាគូ​ដណ្ដឹង​ឈ្មោះ ស្រីកា។ ហ្វេសប៊ុក

ករុណា ពេជ្រ ដឹក​ដៃគូ​ដណ្ដឹង​រៀបការ​ឆ្នាំ ២០១៨

ភ្នំពេញៈ ផ្ទុយពី​សម្ដី​បដិសេធ​រឿង​ភ្ជាប់​ពាក្យ​មុន​នោះ​ក្រោយ​ពីមាន​ការ​បែក​ធ្លាយ​រូបថត​អុជ​ធូប​សំពះ​ជាមួយ​នារី​រូប​ស្រស់ និង​ថាស​ជំនូន​បណ្ដាការ​ត្រៀបត្រា ទីបំផុត​តារា​ចម្រៀង​ប្រុស​រូប​សង្ហា អ្នក​ចាត់ការ​ទូទៅ​ថ្មី​របស់​ផលិតកម្ម​ថោន​លោក ករុណា ពេជ្រ បាន​ទទួល​ស្គាល់​ថា លោក​ពិត​ជាមាន​នារី​ម្ចាស់​បេះដូង​ក្រៅ​រង្វង់​សិល្បៈ ហើយ​គ្រោង​នឹង​រៀបចំ​ពិធី​ធំដុំ​ចូលស្តី​ដណ្តឹង និងអាច​បញ្ចប់​ភាព​នៅលីវ​ក្រោយ​កំណត់​ពេលា​រៀបការ​បាន។

អ្នក​ចាត់ការ​រូប​សង្ហា​ធ្លាប់ជា​តារា​ចម្រៀង​ពេញ​និយម​ពី​ស្រទាប់​យុវវ័យ​ច្រើន​ឆ្នាំ មុន​នឹងមាន​រាសី​ឡើងធំ​ឈរ​នៅ​លើ​ទ្រនំ​ផលិតកម្ម​ថោន​នាដើម​ឆ្នាំ ២០១៧ នេះ បាន​បង្ហើប​ប្រាប់​ការពិត​ដល់ ភ្នំពេញ ប៉ុស្តិ៍ ពី​ម្សិលមិញ​ថា៖ «បាទ! នោះ​ជាដំណឹង​ពិត​មែន ខណៈ​រឿង​យើង​ត្រូវបាន​ក្រុម​គ្រួសារ​ទាំង​សងខាង​បាន​ស្គាល់គ្នា​រួចហើយ។ ចំពោះ​ពេល​វេលា​រៀបចំ​ពិធី​តាម​ប្រពៃណី​នោះ នៅ​មិនទាន់​គិតគូរ​នៅ​ឆ្នាំនេះ​បានទេ​បង!»។

លោក ករុណា ពេជ្រ ដែល​ត្រូវ​បាន​គេស្គាល់​ជា​តារា​ចម្រៀង​ប្រុស​ចេញ​មុខមាត់​ដោយ​បើក​ចំហ​នៅក្នុង​ការឃោសនា​បក្ស​កាន់​អំណាច​យ៉ាង​គគ្រឹក​គគ្រេង ពីឆ្នាំ ២០១៣ ព្រោះ​តែមាន​តួនាទី​ជា​ជំនួយការ​ដ៏ជំនិត​របស់​កូន​ប្រុស​លោក​នាយក​រដ្ឋមន្ត្រី រូបនោះ​បន្ត​ថា៖ «ដោយ​សារតែ​ពេល​វេលា​មិនទាន់​អំណោយ​ផលល្អ​សម្រាប់​ពិធី​នៅ​ក្នុងឆ្នាំ ២០១៧ ទើប​មិន​រហ័ស​កំណត់​ពេល​ច្បាស់​លាស់ ខណៈ​ការមើល​វេលា​របស់​អាចារ្យ​ថា​ពេលា​នៃពិធី​មង្គល​របស់ខ្ញុំ និង​អនាគត​ម្ចាស់​បេះដូង​នោះ មិន​ល្អ​ឡើយ​នៅឆ្នាំ ២០១៧ នេះ ត្រូវ​រង់ចាំ​ទៅដល់​ពេលវេលា​ក្រោយ​ចូល​ឆ្នាំថ្មី​ឆ្នាំ ២០១៨ ឯណោះ ទើបជា​វេលា​ល្អ​អាច​រៀបចំ​ពិធី​មង្គល​នោះ​បាន។ ម្យ៉ាង​ទៀត​ឆ្នាំនេះ គូស្នេហ៍​ខ្ញុំនាង​ជា​និស្សិត​រៀន​មិនទាន់​ចប់​បរិញ្ញាបត្រ​គឺនៅ​ត្រឹម​ឆ្នាំទី ៣ នៅ​ឡើយ ហើយ​ក៏មិន​ចង់​រៀបចំ​ពិធី​នៅ​ក្នុង​ខណៈពេល​នេះដែរ​ព្រោះ​ខ្លាច​រំខាន ឬ​ប៉ះពាល់​ដល់​ការសិក្សា​របស់​នាង»។

បើ​យោង​តាម​ប្រភព​លេចឮ​ពីអ្នក​រាប់អាន​ជិតស្និទ្ធ​នឹង​ក្រុម​គ្រួសារ​អនាគត​ភរិយា​លោក ករុណា ពេជ្រ នោះ​ក៏មាន​ការ​ទម្លាយ​ដែរ​ថា គ្រួសារ​ខាង​ស្រីជា​អ្នកមាន​ឋានៈ​មុខមាត់​ក្នុង​សង្គម និង​ទ្រព្យធន​ស្តុកស្តម្ភ ហើយ​ទំនាក់​ទំនង​ស្នេហា​រវាង​លោក ករុណា ពេជ្រ និង​នារី​ជាសង្សារ ដែល​ចាស់ទុំ​ទាំង​សងខាង​បាន​ជួបគ្នា​ក្នុង​ពិធី​ចូល​សួរនាំ នាពេល​កន្លង​មក​ហើយ​បាន​បែកធ្លាយ​ថា​ជាពិធី​ភ្ជាប់​ពាក្យ​ពួកគេ​នោះ គឺ​អ្នក​ទាំង​ពីរបាន​ស្គាល់គ្នា​ខណៈ​ទាំង​សងខាង​នៅឯ​ក្រៅ​ប្រទេស។

តែ​តារា​ទ្រព្យ​ស្ដុក​មាន​ផ្ទះ​វីឡា​តម្លៃ ៤១ ម៉ឺន​ដុល្លារ និងជិះ​រថយន្ត​ទំនើប​កប់ស៊េរី​លោក ករុណា ពេជ្រ ក៏មិន​បាន​បញ្ជាក់​អ្វីច្រើន​ឡើយ ដោយ​លោក​គ្រាន់តែ​ប្រាប់​ថា៖ «ទំនាក់ទំនង​ពួក​យើង​គឺជា​ការណែនាំ​ដោយ​ចាស់ទុំ​ទាំងពីរ​គ្រួសារ ខណៈ​ខ្ញុំ និង​ស្រីកា [ឈ្មោះ​ក្រៅ​របស់​អនាគត​ភរិយា​លោក ករុណា ពេជ្រ] ទើប​តែបាន​ស្គាល់គ្នា​នា​រយៈពេល​បួន​ប្រាំ​ខែថ្មីៗ​នេះ​ប៉ុណ្ណោះ»៕

0

Comments

Please, login or register to post a comment