.jpg)
លោក ករុណា ពេជ្រ រៀបគ្រឿងសំណែនបែរបន់សុំឪពុកបានជាសះស្បើយ។ ហ្វេសប៊ុក
ភ្នំពេញ: មកដល់ថ្ងៃទី ១១ ខែមករានេះ គឺជាថ្ងៃទី ៧ ក្រោយពីឪពុកតារាចម្រៀងវិវឌ្ឍខ្លួនជាអ្នកគ្រប់គ្រងទូទៅផលិតកម្មថោន លោក ករុណា ពេជ្រ ឆ្លងផុតការវះកាត់ជំងឺដាច់សរសៃឈាមខួរក្បាលជោគជ័យ នៅមន្ទីរពេទ្យជប៉ុនដ៏ល្បីនៅកម្ពុជា ជាមួយនឹងការសរសើរមន្ទីរពេទ្យផ្អើលអស់ទាំងអ្នកសិល្បៈ។
តែក្នុងការទន្ទឹងរង់ចាំសំឡេងឪពុកនៅមិនបន្លឺឡើងលុះវេលា ៧ ថ្ងៃ នៅមិនទាន់លេចចេញ តារាចម្រៀងលោក ករុណា ពេជ្រ ក៏មិនស្ងប់ក្នុងអារម្មណ៍ ក៏ស្រាប់តែនឹកភ្នកបែបជំនឿដល់កំហុសអចេតនារបស់ ឪពុក លើផ្នែកអរូបិយ ដើរសែនថ្វាយម្ចាស់ទឹកម្ចាស់ដី អារក្ខអ្នកតា មួយកន្លែងហើយក៏ស្ទុះទៅមួយកន្លែងទៀត។
នៅព្រឹកថ្ងៃទី ១១ ខែមករា ម្សិលមិញនេះ តារាចម្រៀង ដែលបង្ហាញសកម្មភាពកតញ្ញូ តបគុណអ្នកមានគុណ នៅមើលថែឪពុកគេងលើគ្រែពេទ្យ រហូតលាន់មាត់ខ្លួនឯងបង្អួតអ្នកគាំទ្រថា «ពេលនេះដូចយកពេទ្យធ្វើផ្ទះ» នោះ លោក ករុណា ពេជ្រ ក៏ធ្វើឲ្យអ្នកគាំទ្រផ្ទុះក្តីអាសូរបន្ថែមផងដែរ និងរូបភាពលោកអង្គុយនៅទីវាលស្មៅ ក្នុងដៃកាន់ធូបប្រណម នៅមុខមានតង្វាយថ្វាយអារក្ខអ្នកតា ជាមួយនឹងសារជូនដំណឹងថា៖ «ធ្លាប់តែមកជាមួយប៉ា ឥឡូវប៉ា ឈឺ កូនមកសែនជំនួសប៉ា ម្នាក់ឯង ដើម្បីលាមាត់ លាសម្តី ជាមួយម្ចាស់ទឹកម្ចាស់ដី ហើយសូមម្ចាស់ទឹក ម្ចាស់ដី កុំប្រកែប្រកាន់ប៉ាខ្ញុំ ហើយសូមឲ្យគាត់បានដឹងខ្លួនឆាប់ៗ បន្ទាប់ពីទទួលបានតង្វាយនេះហើយ»។
ក្នុងសារតារាចម្រៀង ដែល មិនមានចេតនាបង្ហាញពីទីតាំង គេក៏សង្កេតឃើញ អ្នកលេងបណ្ដាញសង្គមហ្វេសប៊ុកជាច្រើនបង្ហាញសារ ជូនពរឲ្យឪពុកតារាចម្រៀង លោក ករុណា ពេជ្រ ឲ្យរឹងមាំ ឆាប់ជាសះស្បើយពីជំងឺ បន្ទាប់ពីមានការបន់ស្រន់នេះរួច។
តែក្នុងជំនួបជាមួយ ភ្នំពេញ ប៉ុស្តិ៍ តារាចម្រៀងកាន់តំណែងធំនៅទ្រនំថោន លោក ករុណា ពេជ្រ បានបង្ហាញឲ្យដឹងថា៖ «ទីតាំងដែលខ្ញុំយកតង្វាយទៅថ្វាយអ្នកតា ថែរក្សានោះ ស្ថិតនៅក្នុងទឹកដីស្វាយជ្រំ ខាងកើតអរិយក្សត្រហ្នឹងទេ»។
លោក ករុណា ពេជ្រ ក៏បានបញ្ជាក់ថា៖ «ទីនោះមិនមែនទីកំណើតនៃសាច់ញាតិខ្ញុំណាម្នាក់ទេ តែមុននេះឪពុកខ្ញុំគាត់បានបន់លក់ដី ហើយក៏លក់ដាច់ ហើយគាត់ក៏បានសែនថ្វាយអ្នកតានៅទីនោះម្តងហើយ តែខ្ញុំនៅមិនអស់ចិត្ត ក៏រៀបធ្វើម្តងទៀត»។
ទន្ទឹមនឹងដំណើរបែរបន់នេះផងដែរ លោកក៏បង្ហើបពីគម្រោងដើរលាបំណន់ភ្លាមៗដែរថា៖ «ហើយនៅល្ងាចនេះខ្ញុំក៏បន្តទៅរៀបធ្វើពិធីនេះនៅបាត់ដឹង ឧដុង្គ កំពង់ស្ពឺ មួយកន្លែងទៀត ព្រោះទីនោះគ្រួសារខ្ញុំក៏បានចាក់ដីមួយកន្លែងដែរ»។
តារាចម្រៀងទើបតែភ្ជាប់ពាក្យបានប៉ុន្មានខែលោក ករុណា ពេជ្រ ក៏បានបន្ថែមថា៖ «តែយ៉ាងណារយៈពេល ៧ ថ្ងៃ ក្រោយឪពុកខ្ញុំវះកាត់ គាត់ក៏មិនទាន់ដឹងខ្លួនមែន តែគាត់កម្រើកបានខ្លះហើយ ហើយក៏អាចបើកភ្នែកបានតិចៗហើយដែរ ទាំងគ្រូពេទ្យក៏ប្រាប់ថា សុខភាពគាត់ប្រសើរហើយ នៅមិនយូរគាត់នឹងដឹងខ្លួនហើយ។ តែអ្វីដែលខ្ញុំធ្វើ ដើរសែនព្រេនគ្រប់កន្លែងដែលគាត់រកស៊ីនោះ គឺខ្ញុំនៅមិនអស់ចិត្ត ព្រោះថា គ្រូទាយក៏បានបង្ហាញ (តាមផ្លូវជំនឿ) ថា មានការប៉ះពាល់គេខ្លះដែរ»៕
