.jpg)
លោក ករុណា ពេជ្រ តារាចម្រៀងឡើងតំណែងជាអ្នកគ្រប់គ្រងផលិតកម្មថោន បង្ហោះសារថ្លាថ្លែងពីទំនាស់គ្រួសារ។ រូបថត ហ្វេសប៊ុក/ស៊ូ វុទ្ធី
ភ្នំពេញ : ខណៈកំពុងតែសស្រាក់សស្រាំឡើងចុះមើលមើលថែឪពុកសម្រាកស្តូកស្តឹងនៅលើគ្រែពេទ្យ គួបផ្សំនឹងជំនឿអាគមផ្សំអាយុដើរបែរបន់ អារក្ខអ្នកតាឲ្យជួយឲ្យឪពុកលោកឆ្លងផុតគ្រោះរស់ជីវិតនឹងអាលបានបើកភ្នែកឃើញកូនប្រុសមួយនេះសំពះផ្ទឹមរៀបការ តារាចម្រៀងវិវឌ្ឍខ្លួនជាអ្នកគ្រប់គ្រងទូទៅផលិតកម្មថោន លោក ករុណា ពេជ្រ បែរជារំលេចសារ បរិយាយខ្សែជីវិតកើតមកមានឪពុកពីរ ម្ដាយពីរ ទាំងជួបបញ្ហាចម្រូងចម្រាស់ពីមរតក ទ្រព្យសម្បត្តិ និងគុណស្រាយ។
នៅរសៀលថ្ងៃទី ២៣ ខែមករានេះ តារាចម្រៀងកំពុងជួបទុក្ខអ្នកមានគុណធ្លាក់ខ្លួនឈឺរូបនេះ បានផ្ដើមសេចក្ដីដោយចោទជាសំណួរឡើងថា៖ «ជីវិតខ្ញុំសំណាងណាស់មែនទេ ដែលកើតមកមានឳពុកពីរ ម្តាយពីរ ???»។
តារាចម្រៀងក្លាយជាអ្នកគ្រប់គ្រងទូទៅផលិតកម្មថោនរូបនេះបាន បរិយាយខ្សែជីវិតទៀតថា៖ «បន្ទាប់ពីមានឳពុកពីរ ម្តាយពីរហើយ តែខ្ញុំបែរជាចាកចេញពីផ្ទះមកជ្រកកោណ ម្នាក់ឯង តស៊ូ សុំផ្ទះមិត្តភក្តិជ្រក សុំបាយគេហូប សុំការងារគេធ្វើ ... ដោយសារមូលហេតុអ្វី ? ឆ្លងកាត់គ្រប់ព្យុះភ្លៀង ម្នាក់ឯងទំរាំមានថ្ងៃនេះ ដោយសារការអាណិតស្រលាញ់ ពីមិត្តភក្តិ និង ផ្តល់ឱកាស ពីមនុស្សជាច្រើនជុំវិញខ្លួនទៅវិញ.... តើវាសំណាងណាស់មែនទេ..??»។
លោក ករុណា ពេជ្រ ដើរសែនព្រេនបែរបន់លាបំណន់សុំឲ្យឪពុកបានជាសះស្បើយ។ រូបថត ហ្វេសប៊ុក
ក្នុងសារដដែល លោក ករុណា ពេជ្រ បានរំឭកនូវគុណរបស់ឪពុកលោក ចំពោះរូបលោកថា៖ « ខ្ញុំចេញតស៊ូ ម្នាក់ឯង តែពេលបានជោគជយ័ ខ្ញុំព្យាយាមយកអ្វីៗទាំងអស់នោះផ្តល់មកដល់គ្រួសារវិញ តើកន្លងមកនោះ មានអ្នកណាផ្តល់កម្លាំងចិត្តដល់ខ្ញុំទេ គឺមានតែប៉ាខ្ញុំម្នាក់គត់ដែលឲ្យតម្លៃកូនម្នាក់នេះ ទោះក្នុងសភាពបែបណា ក៏ប៉ានៅតែឲ្យកម្លាំងចិត្តដល់កូន ហើយជឿជាក់ថាកូន ជាមនុស្សល្អ ទោះបីកូនដើរតែលតោលម្នាក់ឯងក៏ដោយ ... ហើយមិនដែលលើកគុណជាមួយកូនម្នាក់នេះទេ ...»។
ខណៈកំពុងសោកសៅនឹងអាការៈឪពុកធ្លាក់ខ្លួនឈឺតាំងពីដើមឆ្នាំថ្មី លោក ករុណា ពេជ្រ បានរៀបរាប់ទៀតថា៖ «ដល់ពេលនេះ កូនដឹងថាប៉ាគិតពីកូន បានប៉ា ឈានដល់ដំណាក់កាលនេះ ដោយសារតែកូន កូនពិតស្តាយក្រោយណាស់ ដែលយករឿងនេះពិភាក្សាជាមួយប៉ា ... សោកស្តាយបំផុត...!!! ឥឡូវនេះប៉ា មិនទាន់ដឹងខ្លួនផង ហេតុអីបានសម្តី បោះទៅបោះមក រំលងខ្ញុំ និង ប៉ា ដែលក្នុងសភាពបែបនេះ យកល្អរៀងៗខ្លួនទៅវិញ...???»។
ក្នុងន័យបង្ហាញអារម្មណ៍ឈឺផ្សារស្ទួន ដែលណាមួយឪពុកឈឺ និងម៉្យាងទៀតត្រូវសាច់ញាតិវែកញែកដណ្ដើមយកគុណស្រាយនោះ លោក ករុណា ពេជ្រ បានប្រកាសថា៖ «អ្នកណាមានគុណខ្លះលើខ្ញុំ ចេញមុខបង្ហាញមុខមក កុំនិយាយក្រោយខ្នងខ្ញុំ ហើយកុំឲ្យខ្ញុំដោះស្រាយ ទៀតដែលកំពុងមានរឿងប៉ា មិនទាន់ធូរស្រាលផង ... ខ្លាចខ្ញុំសប្បាយ និងខ្ញុំមានសេចក្តីសុខខ្លាំងណាស់មែនទេ... កម្លាំងចិត្តក៏មានតិចតួច លុយក៏ចំណាយច្រើន ហើយមកបង្កើនបញ្ហាមកលើខ្ញុំទៀត ....»។
ឪពុករបស់លោក ករុណា ពេជ្រ បានចូលវះកាត់ និងសម្រាកនៅមន្ទីរពេទ្យកាលពីអំឡុងដើមឆ្នាំ២០១៨។ រូបថត ហ្វេសប៊ុក
ដោយអះអាងថានឹងរ៉ាប់រងថ្លៃព្យាបាលឪពុក ទាំងមិនពឹងប្រាក់ពីហោប៉ៅសាច់ញាតិដទៃនោះ លោក ករុណា ពេជ្រ បានបន្លឺទៀតថា៖ «ហើយសូមអ្នកទាំងអស់គ្នាកុំបាច់ភ័យព្រួយ រឿងចំណាយប៉ារបស់ខ្ញុំ ខ្ញុំមានលទ្ធភាពគ្រប់គ្រាន់ហើយ រឿងខ្ញុំ និង ប៉ាខ្ញុំ ខ្ញុំមិនឲ្យ អ្នកណា ពិបាកទេ .... សូមកុំតែនិយាយពីគ្នា ចុះឡើងៗ ឲ្យនាំតែរឿងដល់ខ្ញុំទៀតបានហើយ.....ហើយចុងក្រោយ បើពុកម៉ែ បងប្អូន ពូមីង បានលឺអ្វីពីគ្រួសារខ្ញុំ ថាអ្នកនេះ ល្អ អ្នកនោះអាក្រក់ សូមទុកវាត្រឹម ពុកម៉ែបងប្អូនចោះ នោះបើស្រលាញ់ខ្ញុំ.... បើម៉ែទាំងសងខាងស្រលាញ់កូន ឲ្យកូនសូមថា បើមានគេនិយាយថា ម៉ែនេះល្អ ថាម៉ែនោះអាក្រក់ សូមម៉ែ ប្រាប់គេនោះវិញថា ខ្ញុំអត់ចង់ដឹងលឺពីខាងនោះទេ គឺ ចង់ដឹងរឿងពីសុខទុក្ខតែកូនម្នាក់គត់បានហើយ នោះបានអារម្មណ៏ស្ងប់ ហើយបញ្ឈប់ការនិយាយយកល្អ ឬ ច្រណែន គ្នា ... សម្រាប់ខ្ញុំគឺម៉ែដូចគ្នា នេះអ្វីដែលខ្ញុំសុំ»។
ក្នុងសារដ៏វែងអន្លាយដដែលនោះ លោក ករុណា ពេជ្រ ក៏បានបញ្ជាក់ផងដែរពីតួលេខមរតកដែលឪពុកបានចែកកេរឲ្យយ៉ាងដូច្នេះថា៖ »រាល់ថ្ងៃនេះ ខ្ញុំនឹងប៉ា របស់ខ្ញុំ មិនបានខ្ចីលុយពីអ្នកណាម្នាក់ ឬ ម្តាយរបស់ខ្ញុំណាមួយ មករកស៊ី រកធ្វើការងារ ដោះស្រាយក្នុងគ្រួសារនោះឡើយ.... ប៉ារបស់ខ្ញុំមានលុយគាត់សល់ពីលក់ដី ចែកជាមួយម្តាយក្រោយរបស់ខ្ញុំគឺជាង ២០ ០០០០ $ ( ម្ភៃម៉ឺនដុល្លារ ) ហើយគាត់ដកលុយធ្វើបុណ្យ និងទិញផ្ទះមួយល្វែងពីរជាន់ ថែមទាំងមិនដាក់ឈ្មោះខ្លួនគាត់ទេ គឺ គាត់ឲ្យដាក់ឈ្មោះ ប្អូនស្រីខ្ញុំ និង ខ្ញុំ ទៀត... ហើយថែមសល់លុយ គាត់រ៉ាប់រ៉ង ថ្លៃ បណ្ណាការខ្ញុំឲ្យទៀត ទោះបីខ្ញុំមិនព្រមឲ្យគាត់ចេញ តែខ្ញុំចាំសម្តីគាត់ថា ក្នុងនាមគាត់ជាឳពុកត្រូវតែមានតួនាទីនេះ....»។
តារាចម្រៀង ករុណា ពេជ្រ វិវឌ្ឍខ្លួនជាអ្នកគ្រប់គ្រងផលិតកម្មថោន។ រូបថត ស៊ូ វុទ្ធី
ជម្រះមន្ទិលដែលមានញាតិពោលរឿងបំណុលនោះ តារាចម្រៀង ករុណា ពេជ្រ បានប្រកាសច្បាស់ៗថា៖ «ដូច្នេះ ពេលនេះ បើពុកម៉ែបងប្អូនលឺគេដើរនិយាយថា ខ្ញុំ ឬ ប៉ា ខ្ញុំជំពាក់លុយ ឬ ខ្ចីពីនេះ ពីនោះ ...នោះមិនមែនជាការពិតទេ ខ្ញុំ និង ប៉ា ខ្ញុំមានសមត្ថភាពគ្រប់គ្រាន់ល្មមហើយ ដោយមិនចាំបាច់ខ្ចីអ្នកណាម្នាក់ទេ...?? តែបើមានសូមប្រញាប់មកជួបខ្ញុំ ឥឡូវនេះ.......!!!!!»។
បន្ទាប់ពីបញ្ចេញសារដ៏ក្ដៅគគុកឈឺចិត្តនឹងទំនាស់គុណស្រាយ និងទ្រព្យសម្បត្តិក្នុងគ្រួសារនោះ លោក ករុណា ពេជ្រ បានទទូចថា៖ «កុំគិតថាខ្ញុំសំណាង ប៉ុន្តែគួរតែនាំសំណាងផ្លូវចិត្តដល់ខ្ញុំផង ពេលនេះខ្ញុំពិតជាមានកម្លាំងចិត្តខ្សោយណាស់... !!! សង្ឃឹមថា មួយប្រយោគនេះអ្វីៗនឹងល្អប្រសើរ ព្រោះខ្ញុំពិតជាអត់មានពេលជួបម្តងម្នាក់ ហើយដើរនិយាយបញ្ជាក់ការពិតច្រើនដងទេ... សូមយកពេលនេះគិតពីប៉ា ម្នាក់សិនបានហើយ…!»៕
សារដ៏វែងអន្លាយដែលលោក ករុណា ពេជ្រ រៀបរាប់ពីរឿងរ៉ាវរកាំរកូសក្នុងគ្រួសារ។ រូបថត ហ្វេសប៊ុក
