.jpg)
ភ្នំពេញ: ស្ថិតនឹងស្ថានភាពបារម្ភជំងឺឪពុក ដែលដេកស្តូកស្តឹងនៅលើគ្រែពេទ្យ ទាំងជាប់ឧបករណ៍ស្ទង់ដង្ហើម និងចីពចរសព្វប្រាណ រំពេចនេះ គេក៏មើលឃើញយ៉ាងច្បាស់ជាក់ផងដែរ តារាចម្រៀងដែលវិវឌ្ឍខ្លួនឡើងកាន់តំណែងចាស់ជាអ្នកគ្រប់គ្រងទូទៅនៅផលិតកម្មថោន លោក ករុណា ពេជ្រ ក៏បង្ហាញសារបួងសួងដល់ទេវតា និងវត្ថុសាកសិទ្ធ ឲ្យជួយឲ្យឪពុកលោកឆ្លងផុតគ្រោះជីវិតពីជំងឺ និងអាលបានជាសះបើកភ្នែកឃើញកូនប្រុសមួយនេះសំពះផ្ទឹមរៀបការ។
រំពេចពីវិនាទីស្វាគមឆ្នាំសកលឆ្នាំ ២០១៨ ដែលជាប្រជាជាតិ ជុំវិញពិភពលោក គេជួបជុំក្រុមគ្រួសារក្អាកក្អាយ ដោយឡែកតារាចម្រៀង និង ជាអ្នកគ្រប់គ្រងផលិតកម្មថោនរូបសង្ហា លោក ករុណា ពេជ្រ ក៏បង្ហាញទាំងរូបឪពុកដេកស្តូកស្តឹងនៅលើគ្រែពេទ្យ ជាមួយនិងភាពពេចន៍រៀបរាប់ ក្នុងន័យបែបទុក្ខព្រួយថា «ហ៊ឺ ប៉ាលើសឈាមចូលសង្រ្គោះ បន្ទាន់ភ្លាមៗ…»។
ក្នុងសារដែលបង្ហាញពីទុក្ខព្រួយកំពុងរុករានលើជីវិតក្រុមគ្រួសារ តារាចម្រៀង ករុណា ពេជ្រ នោះ គេក៏ឃើញមានច្រើនផងដែរពីអ្នកគាំទ្រ ព្យាយាមផ្ញើសារលើទឹកចិត្ត តារាចម្រៀងក្នុងចិត្តពួកគេ ដោយថា «ជូនពរឲ្យ ឪពុក តារាចម្រៀង ករុណា ពេជ្រ បានជាពីជំងឺនេះនិងសូមឲ្យបងកាត់ចិត្ត មនុស្សល្អទេវតានឹងជួយ»។
តែយ៉ាងណាពីសារនេះហាក់មិន រញ្ជួយចិត្តតារាចម្រៀងរូបនេះឲ្យស្ងប់ប៉ុន្មាននោះទេ ខណនៅល្ងាចថ្ងៃ ទី៤ ខែមករា នេះ លោកក៏បង្ហាញសារកាន់តែធ្វើ ឲ្យអ្នកគាំទ្រក្តុកក្តូលថែមទៀតភ្ជាប់ ន័យអត្ថន័យជីវិត ដែលឪពុកម្តាយគ្រប់ ទន្ទឹងចង់ឃើញ សម្រេចក្តីប្រាថ្នាដល់ដ៏ពិសេសសម្រាប់ជីវិត ដែលក្នុងសារនោះ ករុណា ពេជ្រ បានរៀបរាប់ថា៖ «អារម្មណ៍មួយនេះ… ទឹកភ្នែកមិនដឹងខ្លួន។ សូមទេវតា ជួយថែរក្សា ប៉ាខ្ញុំផង…. គាត់ចង់ឃើញកូនគាត់ចូលរោងការខ្លាំងណាស់…។ កូនមានលទ្ធភាព តែចង់អោយប៉ា តស៊ូ មានកំលាំងកាយ និងកម្លាំងចិត្តដើម្បីជំនៈជំងឺនេះ »។
នៅព្រឹកថ្ងៃទី ៥ ខែមករានេះ តារាចម្រៀង ករុណា ពេជ្រ ក៏សារស័ព្ទប្រាប់ ភ្នំពេញ ប៉ុស្តិ៍ថា៖ «ពេលនេះឪពុកខ្ញុំបានឆ្លងផុតតំណាក់កាលវះកាត់ហើយ តែគាត់នៅមិនទាន់បានដឹងខ្លួននៅឡើយទេ»។
ក្នុងជំនួបជាមួយ ភ្នំពេញ ប៉ុស្តិ៍នេះ តារាចម្រៀង ករុណា ពេជ្រ បន្ទរនឹងពាក្យទទួលស្គាល់សារផ្សព្វផ្សាយមុននេះ បន់ឲ្យឪពុកជាបានអង្គុយក្បាលកន្ទេល លោកបន្តថា៖ «ជំងឺលើសឈាម ដាច់សរសេរខួក្បាលឪពុកខ្ញុំ វះកាត់កាលពីម៉ោង៨ព្រឹកថ្ងៃទី៤ ខែមករា។ តែពេលថា បើគាត់មានកំលាំងគ្រប់គ្រាន់អាចនឹងដឹងខ្លួនក្រោយវះកាត់បីថ្ងៃ តែបើកម្លាំងគាត់ខ្សោយអាចទៅដល់៧ឬ៨ថ្ងៃ»។
តែយ៉ាងណា លោក ករុណា ពេជ្រ ថា៖ «ខ្ញុំសង្ឃឹមឲ្យបានតែឪពុកខ្ញុំជា បានតែ៧០ភាគរយនោះក៏សប្បាយចិត្តណាស់ហើយ។ ដោយឃើញគាត់នៅមើលឃើញកូនៗនឹងគ្រួសារ»។
ក្នុងនោះ លោកក៏មិនភ្លេចពីការបកស្រាយសារបន់ព្រះសំពះទេវតា សូមឲ្យអ្នកមានគុណ បាននៅមើលឃើញ លោករៀបការ ដោយថា៖ «ខ្ញុំមានគូខ្ញុំហើយ ហើយខ្ញុំក៏មានគម្រោងរៀបការនៅឆ្នាំ ២០១៨ នេះ តាំងពីយូរហើយ ហើយគម្រោងនេះក៏នៅតែបន្ត ទាំងសប្បាយចិត្តដែរបានឪពុកឆ្លងផុតវះកាត់។ តែគ្រាន់ថា ដំណឹងនេះខ្ញុំមិនទាន់បង្ហាញវេលាជាក់លាក់»៕
