Search form

Login - Register | FOLLOW US ON

Logo of Phnom Penh Post newspaper Phnom Penh Post - ករុណា ពេជ្រ ឡើង​តំណែង​ធំ បួងសួង​ខ្លាច​កូនចៅ​កាច់កុង

Content image - Phnom Penh Post
តារាចម្រៀង ករុណា ពេជ្រ។ វុទ្ធី

ករុណា ពេជ្រ ឡើង​តំណែង​ធំ បួងសួង​ខ្លាច​កូនចៅ​កាច់កុង

ភ្នំពេញ: ក្រោយការ​ចាកចេញ​ទាំង​អាល័យ​របស់​អតីត​ប្រធាន​គ្រប់គ្រង​ទូទៅ​របស់​ផលិតកម្មថោន លោក អ៊ា វឌ្ឍនា ដោយ​ទទួល​មរណភាព​កាលពី​ពេលថ្មីៗ​កន្លង​ទៅនេះ មហាជន​មានការ​ចាប់អារម្មណ៍​នឹង​ចង់ដឹង​ពីសមាសភាព​របស់​អ្នក ដែលអាច​ចូលមក​ជំនួស​តំណែង​មួយ​ជាខ្លាំង ខណៈ​ខាង​ផលិតកម្ម​ហាក់​ដូចជា​មិនបាន​បញ្ចេញ​ជា​សាធារណៈ នូវព័ត៌មាន​ទាន់ទិន​នឹង​តំណែង​របស់​ប្រធាន​គ្រប់គ្រង​នៅឡើយ​ទេ។ ប៉ុន្តែ​ពេលនេះ​ពន្លឺក៏​លេចឡើង​ច្បាស់ ជាមួយ​នឹងសម្ដី​អ្នកស្នង​តំណែង​ក៏ទទួល​ស្គាល់​ផងដែរ។

ដោយឡែក​កាលពី​ម្សិលមិញ​នេះ​នៅក្នុង​គណនី​ហ្វេសប៊ុក​របស់​តារា​ចម្រៀង​រូបសង្ហា​ប្រចាំ​ផលិតកម្ម​ថោន ករុណា ពេជ្រ បាន​បង្ហោះសារ​គួរឲ្យ​ចាប់អារម្មណ៍​មួយថា លោកបាន​ចូល​កាន់តែ​តំណែង​ធំថ្មី​មួយ ដែល​ខុសពី​ជំនាញ​របស់​លោក គ្រាន់​តែមាន​បទពិសោធ​ខ្លះ​តែប៉ុណ្ណោះ ដែល​ក្នុងនោះ​ករុណា ពេជ្រ ថែមទាំង​បង្ហាញ​រូបភាព​កំពុង​សែន​ជំនាង​ក្រុមហ៊ុន សូម​ជោគជ័យ​ក្នុងការងារ​ក្នុងថ្ងៃ​ឡើងកាន់​តំណែង​ធំដំបូង​របស់ខ្លួន​ទៀតផង។

តារាចម្រៀង​ប្រចាំ ផលិតកម្ម​ថោន​រូបនេះ​បន្តថា៖ «ភ័យ​ណាស់ខ្ញុំ ក្តីបារម្ភ​ក៏ច្រើន ថ្ងៃនេះ​ជាថ្ងៃ​ដំបូង ដែល​ចូលកាន់​ការងារថ្មី​មួយទៀត ដែល​ផ្ទុយពី​ជំនាញ​ដែល​រៀនចប់ មានតែ​បទពិសោធ​ខ្លះ​តែប៉ុណ្ណោះ។ ដូច្នេះ​មានតែ​មកអុជ​ធូប បួងសួង​ម្ចាស់​ទឹកម្ចាស់ដី ជំនាង​ក្រុមហ៊ុន​និងតុ​ធ្វើការ​សូមសេចក្តីសុខ​កុំឲ្យភ័យ ជាពិសេស​ជួយ​បន្ទន់ចិត្ត​បុគ្គលិក​គ្រប់​ជាន់ថ្នាក់​ឲ្យអាណិត​ស្រឡាញ់​ខ្ញុំ ហើយ​សូមឲ្យ​គាត់គោរព​ការងារ ពេលវេលា​របស់​គាត់ចំពោះ​ក្រុមហ៊ុន កុំឲ្យ​ពួកគាត់​មានគំនិត​កាច់កុង​គ្នាឬ​ចាំមើល​បំណាំ​ខ្ញុំអី។ សូមឲ្យ​រួបរួមគ្នា​ដើម្បី​ភាព​ជោគជ័យ​ទាំងអស់គ្នា ដោយ​មិនអាច​ខ្វះ​អ្នកណា​ម្នាក់បាន ដើម្បី​ក្រុមហ៊ុន​រីកចម្រើន​ល្បីរន្ទឺ​ទើបបាន​មានមុខ​ទៅជួប​ថៅកែ»។

បន្ថែមនោះ ក្នុងជំនួប​ជាមួយ​នឹង ភ្នំពេញ ប៉ុស្តិ៍​តាម​ទូរស័ព្ទ អ្នកគ្រប់គ្រង​ទូទៅ​ផលិតកម្មថោន ទើបឡើង​តំណែង​ថ្មីថ្មោង ជាតារា​ចម្រៀង​រូបសង្ហា​លោក ករុណា ពេជ្រ ក៏បាន​លាន់មាត់​ឡើង​យ៉ាង​ដូច្នេះថា៖ «ល្បីដល់​ហើយបង ព័ត៌មាន​សួរ​ច្រើនណាស់​រឿងហ្នឹង»។

លោក​ក៏បាន​ថ្លែងប្រាប់​ពីអារម្មណ៍​បែបភ័យ​អរថា៖ «ថា​តំណែងធំ​ក៏បាន តែបើ​ថាភ័យ​នោះ វាភ័យ​ណាស់​ទៅហើយ​សម្រាប់​តំណែង ដែល​ក្រុមហ៊ុន​ឲ្យមក​ធ្វើនេះ»។

តារាចម្រៀង ករុណា ពេជ្រ ក៏បន្ទរ​ដោយ​សម្ដី​បែប​ដាក់ខ្លួន​ថា៖ «ដូច​បងប្អូន​ដឹង​ហើយ ខ្ញុំជា​តារាចម្រៀង តែ​ពេលនេះ​មកជា​អ្នកគ្រប់គ្រង បើមិន​ភ័យម៉េច ចេះតែ​បារម្ភ​អ៊ីចឹង ប៉ុន្តែនេះ​ជាការ​ចាត់ចែង​របស់​ថៅកែ​ផលិតកម្ម»។

លោក ករុណា ពេជ្រ ក៏បង្ហើប​ឲ្យ​ដឹងថា៖ «មុននេះ​ខ្ញុំទៅ​ច្រៀង​នៅ​អាមេរិក ហើយ​តាម​គម្រោង​នឹងវិល​មកវិញ​នៅ​ពាក់កណ្តាល​ខែពីរ​នេះទេ តែពេល​ដែលបង អ៊ា វឌ្ឍនា ស្លាប់​ក្រុមហ៊ុន​ក៏បាន​ទាក់ទងមក​មុនពេល​កំណត់។ លោក​បញ្ជាក់ថា ថៅកែ​គាត់ហៅ​ឲ្យខ្ញុំ​ចុះមក​វិញមុន​កំណត់​ព្រោះថា មាន​ការងារ​ជាច្រើន ដែល​បង វឌ្ឍនា គាត់ធ្វើ​មិនទាន់​ចប់ ហើយ​គាត់​ក៏ជួប​រឿង​អ៊ីចឹង។ ពេលនេះ​ខ្ញុំត្រូវ​ទទួល​ជំនួស ដែល​ថៅកែ​ទម្លាក់ឲ្យ»។

បើទោះ​ជា លោក ករុណា ពេជ្រ ហាក់​បង្ហាញពី​ក្តីបារម្ភ​ក្នុង​នាទីជាអ្នក​គ្រប់គ្រង ប៉ុន្តែ​យ៉ាងណា​លោកក៏​បញ្ជាក់ប្រាប់ ថា៖ «ការពិត​ទៅ​តួនាទី​ជាអ្នក​គ្រប់គ្រង​នេះ មុនបង មាស សុខរតនៈ បាន​ចូលមក​ផលិតកម្ម​ថោន​នេះខ្ញុំ​ក៏ធ្លាប់​កាន់​ដែរ តែកាល​នោះ​បុគ្គលិក​តិច។ តែ​ពេលនេះ​បុគ្គលិក​ច្រើន ហើយខ្ញុំ​ក៏មិនមែន​ជាអ្នករៀន​ខាងជំនាញ​គ្រប់គ្រង​ផង ក៏ចេះតែ​បារម្ភ។ ប៉ុន្តែ ខ្ញុំ​ក៏បាន​តាំងចិត្ត និង​ធ្វើឲ្យ​បាន ជាមួយនឹង​ការតាំង​ចិត្ត និង​ព្យាយាម»៕

0

Comments

Please, login or register to post a comment